Search form

Dus 5

(Kanbelen)

1N be nana n ka nankɔ la n dɔgɔmuso, ne maminɛmuso,

ka n ka fɛɛn kasadiman ni n ka wusulan bɔ,

ka n ka liɲaga n'a tulu dumu,

ka n ka duvɛn ni n ka nɔnɔ min!

(Teriw)

Aw ka dumuni kɛ, terimanw,

ka minni kɛ

k'aw ɲanamini kanuya kɔnɔ!

Sunguru ma daa yɛlɛ joona

(Sunguru)

2Ne tun be sinɔgɔra, nga ne ma ɲinɛ,

n ka kanbelen be daa kɔkɔra,

n tulo b'a kaan na. A ko:

(Kanbelen)

«Daa yɛlɛ n dɔgɔmuso,

ne maminɛmuso,

ne ka tuganin, ne ka dafanin!

Bari ne kuun bɛɛ ye komiji ye,

ne kunsigi bɛɛ ɲigira sufɛ jii bolo.»

(Sunguru)

3Ne ye n ka fani bɔ ka ban,

ne be segi k'o don cogo di?

Ne ye n seenw ko ka ban,

ne be segi k'o nɔgɔ cogo di?

4Ne kanubaga y'a bolo don daa woo fɛ,

ne kɔnɔ bɛɛ gwanna.

5Ne wilila ko n be daa yɛlɛ n kanubaga ye,

ne bolo bɛɛ tun ye tulu kasadiman ye,

tulu kasadiman bɔra ne tigɛ la

ka kɛ daa sɔgɔlan kan.

6Ne ye daa yɛlɛ n kanubaga ye,

o y'a sɔrɔ a y'a kɔɔ don, a tagara.

Ne tun te n yɛrɛ kala ma tugu,

n bɔr'a kɔ.

Ne y'a yɔrɔ ɲini ka dɛsɛ, n m'a ye.

Ne y'a wele ka dɛsɛ,

a ma ne laminɛ.

7Dugu kɔlɔsibagaw ye ne kunbɛn,

n'u be dugu munumununa.

U ye ne bugɔ ka n mandimi,

ka ne ka delekeba bɔ n kaan na,

dugu laminikogo kɔlɔsibaga nunu!

8Ee! Zeruzalɛmu sunguruw,

n'aw ye ne kanubaga ye,

aw bena mun le fɔ a ye sa?

Ne b'a ɲini aw fɛ, aw k'a fɔ a ye

ko cɛko kɛra bana ye n ma!

(Sunguruninw)

9Ele min cɛɛ ka ɲi ni musow bɛɛ ye,

o tuma na, mun le b'i kanubaga nin na

n'o te kanbelen tɔw la?

Mun le y'a fisaya ni kanbelen tɔw ye

fɔɔ n'i b'o koo ɲininga anw fɛ?

(Sunguru)

10Ne kanubaga gwɛnin lo,

a fari be manamana.

N'a be kanbelen waa tan cɛma,

a be lɔn ka bɔ u bɛɛ la.

11A kuun be i ko sanu, sanu yɛrɛ yɛrɛ.

A kunsigi be i ko koto,

u finna i ko kaankaan.

12A ɲadenw cɛɛ ka ɲi i ko tuganin, kɔda la.

U gwɛra i ko nɔnɔ.

U sigicogo ka ɲi.

13A yewagaw be i ko nankɔ kasadiman,

wusulan falennin be yɔrɔ min.

A dagolo cɛɛ ka ɲi i ko lisiyiri,

mire kasadiman be bɔra min na.

14A bolow bɛɛ ye sanu ye,

kabakuru sɔngɔgwɛlɛnw ɲagaminin be min na.

A fari cɛɛ ka ɲi i ko samaɲin nugunin,

kabakuru bulamanw dondonnin be min na.

15A senkalaw be i ko kabakurugwɛ,

minw lɔra sanu yɛrɛ yɛrɛ kan i ko dugumatugu.

A ɲada ka ɲi i ko Liban kuluw,

bɔɲɔgɔnko t'a la i ko sɛdiriyiri.

16A daa ka di,

a yɔrɔ bɛɛ be ne nigɛla wili.

Ne kanubaga be ten le,

Zeruzalɛmu sunguruw, ne ka kanbelen be ten le!

ALA KA KUMA

© 2008 Alliance Biblique du Burkina Faso

More Info | Version Index