Search form

Tob 10

Tobi ni Ana be hami u deen kosɔn

1O waati la, mɔgɔ ka kan ka loon minw kɛ ka taga Aragɛsi ani ka segi, Tobi tun be o jati loon o loon. O loonw tɛmɛna, a dencɛ ma na. 2A y'a miiri ko: «Kɔni koo dɔ le m'a minɛ k'a to o yɔrɔ la dɛ? N'a sɔrɔ Gabayɛli sara, ni mɔgɔ te yen ka wari nin d'a ma.» 3A daminɛna ka hami kosɔbɛ. 4A muso Ana ko: «N deen sara, a te yen tugu!» A fana daminɛna ka kasi ani ka dusukasikumaw fɔ a dencɛ kosɔn, k'a fɔ ko: 5«Gwale bɔra ne ma, n deen, ne sɔnna i ka taga, e min yeko be ne nisɔndiya!» 6Tobi y'a jaabi ko: «I daje, i kana hami, ne muso, a ka kɛnɛ. Siga t'a la, barinako dɔ le y'u sɔrɔ o yɔrɔ la, bari a bilasirabaga ye mɔgɔsɔbɛ ye, an balima dɔ lo. Kana i yɛrɛ tɔɔrɔ a kosɔn, ne muso, yanni dɔɔni, a bena se.» 7A muso y'a jaabi ko: «Kana foyi fɔ ne ye tugu! Kana n nigɛ tugu, ne deen sara!» A dencɛ tun tagara ni sira min ye, loon o loon, muso nin tun be to ka teliya ka bɔ ka taga o kan k'a sira filɛ. A tun ma la mɔgɔ si ka kuma na. Ni suu kora, a be don soo kɔnɔ n'a be dusukasikumaw dɔrɔn fɔ, ani ka kasi fɔɔ ka dugu gwɛ, a tun te se ka sinɔgɔ.

Tobiya be segi

8Araguwɛli tun kalila k'u bena tile tan ni naani minw kɛ a denmuso ka kɔɲɔya la, olu tɛmɛnin kɔ, Tobiya tagar'a fɔ a ye ko: «N be sira dali, bari ne b'a lɔn kosɔbɛ ko n facɛ ni n bamuso ma l'a la tugu ko u bena ne ye. O kosɔn, n b'i dali baba, sira di ne ma ka segi n facɛ fɛ. Ne tun y'a to cogoya min na, ne y'o fɔ i ye ka tɛmɛ.» 9Nga Araguwɛli y'a fɔ Tobiya ye ko: «To yan n deen, to ni ne ye. Ne bena ciden dɔw bila ka taga i facɛ Tobi fɛ, olu bena i kibaruya fɔ a ye.» Tobiya y'a fɔ a ye ko: «Ayi, ne b'i dali sɔbɛ la, sira di ne ma ka segi n facɛ fɛ.» 10O la, Araguwɛli ye Sara d'a ma, n'a ka nafolo tilan kelen: a ye baaraden cɛmanw ni musomanw, ani misiw ni sagaw, ani faliw ni ɲɔgɔmɛw, ni faniw, ani warigwɛ ni minan dɔ wɛrɛw d'a ma. 11A ye sira d'u ma, u nisɔndiyara. A ye Tobiya fo ko: «Ala k'i mara kɛnɛya la, n deen, ka sira diya i la! Matigi min ye Sankolotigi ye, ale ka e n'i muso Sara ɲuman se, k'a to ne ka se k'aw deenw ye sanni n be sa!» 12A y'a fɔ a denmuso Sara ye ko: «Taga i birancɛ fɛ. K'a ta sisan ma, i biranw be i n'a fɔ i wolobagaw. Taga hɛrɛ la n denmuso, Ala k'a kɛ ne ka koɲuman mɛn i ka koo la ka ne to sii la!» O kɔ, a y'u fo ka sira d'u ma. 13Ɛdina sɔrɔla k'a fɔ Tobiya ye ko: «N deen, e min koo ka gwɛlɛ ne ma kosɔbɛ, Matigi ka se n'i ɲuman ye, k'a to ne ka se k'i ni n denmuso Sara deenw ye sanni n be sa! Ne be n denmuso kalifa i ma Matigi ɲana. Kan'a dusu kasi loon si. N deen, taga hɛrɛ la! K'a ta sisan ma, ne ye i bamuso ye, Sara ye i balimamuso ye. N'an bɛɛ tun be se k'o hɛrɛ ɲɔgɔn sɔrɔ an sii bɛɛ la, o tun ka ɲi!» O kɔ, a y'a bolo meleke u la ka sira d'u ma, u nisɔndiyanin tagara. 14A kɛra ten, Tobiya nisɔndiyaninba bɔra Araguwɛli fɛ, n'a be Matigi tanura, min ye sankolo ni dugukolo tigi, ni diɲɛ Masa ye, bari a y'a kɛ a ka taama ɲana. Araguwɛli y'a fɔ a ye ko: «Ala ka hɛrɛ kɛ i ye, i ka se k'i wolobagaw boɲa i sii bɛɛ la!»

ALA KA KUMA

© 2008 Alliance Biblique du Burkina Faso

More Info | Version Index