Search form

Tob 12

Arafayɛli b'a yɛrɛ yira

1U ka nisɔndiya banna tuma min na, Tobi y'a deen Tobiya wele k'a fɔ a ye ko: «N deen, i hakili to a la k'i taamaɲɔgɔn ka sara d'a ma, ani ka dɔ fara a kan.» 2Tobiya y'a ɲininga ko: «Baba, n ka joli d'a ma? An segira ni fɛɛn minw ye, hali ni ne y'o tilan kelen d'a ma, o tɛ bɔnɛ ye ne fɛ. 3A segira ni ne ye hɛrɛ la. A ye n muso kɛnɛya, a ye ne dɛmɛ ka segi n'i ka wari ye, a y'i kɛnɛya. O bɛɛ kɔ, ne ka kan k'a sara ni mun ye?» 4Tobi ko: «N deen, aw nana ni fɛɛn minw bɛɛ ye, a bɛnnin lo a k'o tilan kelen sɔrɔ.» 5Tobiya y'a wele k'a fɔ a ye ko: «I segira ni fɛɛn minw bɛɛ ye, i k'o tilan kelen minɛ o ka kɛ i ka sara ye, ka taga hɛrɛ la!»

6Arafayɛli y'u wele ka bɔ gɛrɛfɛ k'a fɔ u ye ko: «Aw ka Ala tanu! A ye koo min bɛɛ kɛ aw ye, aw k'o wango la nimanfɛnw bɛɛ ɲana! A ka ɲi k'a tanu ani k'a makiri. Aw ka Ala ka kɛwaliw fɔ mɔgɔw bɛɛ ye, o bɛnnin lo. Aw kan'o wango dabila. 7Ka masacɛ ka gundo mara, o ka ɲi. Nga Ala ka kɛwaliw kɔni, a bɛnnin lo k'o yira kɛnɛ kan. O ka kan ka fɔ, k'o fɔ a fɔcogo la.

«N'aw be koɲuman kɛ, kojugu tena aw sɔrɔ. 8Ka Ala dali sɔbɛ la, ani ka fantanw sɔn tilenninya la, o ka fisa ni nafolo ye min sɔrɔla tilenbaliya la. Mɔgɔ ka dɛsɛbagatɔw sɔn, o ka fisa ka sanu ɲini k'a ton i fɛ. 9Ka fantanw sɔn, o be mɔgɔ kisi saya ma, o be mɔgɔ saniya ka bɔ hakɛ bɛɛ la. Minw be fantanw sɔn, olu bena sijan sɔrɔ. 10Minw be hakɛ ni tilenbaliyako kɛ, olu ye u yɛrɛw jugu ye.

11«Sisan, ne bena tiɲɛ bɛɛ fɔ aw ye, ne tena foyi dogo aw la. Ne tun y'a fɔ aw ye ka tɛmɛ ko, ka masacɛ ka gundo mara, o ka ɲi, nga a bɛnnin lo Ala ka kɛwali ka yira kɛnɛ kan fɔɔ ka ɲa. 12Ayiwa, e ni Sara ye Matigi dali tuma min na, ne le ye aw ka dalili lase Matigi kabakoman ma, ani e tun be suuw don tuma min na. 13I tun ma siga ka wili ka bɔ dumuni kunna ka taga mɔgɔ dɔ suu don. O tuma na, Ala ye ne ci i fɛ ko ne k'i kɔrɔbɔ. 14Nga a ye ne ci k'i n'i biranmuso Sara kɛnɛya fana. 15Ne ye Arafayɛli ye, mɛlɛkɛ wolonwula minw lɔnin bɛ Matigi kabakoman ɲakɔrɔ, n'u labɛnnin be ka baara kɛ a ye, ne ye olu dɔ ye.»

16U fila bɛɛ hakili ɲagamina, u y'u kunbiri gwan k'u ɲaa biri duguma, siranya y'u minɛ. 17Nga mɛlɛkɛ y'a fɔ u ye ko: «Aw kana siran. Ala ka hɛrɛ kɛ aw ye! Aw ka Ala fo tuma bɛɛ! 18Ne tun be ni aw ye tuma min na, o ma kɛ ne ka ɲuma nɔɔ ye, Ala sago tun lo. Aw ka kan k'ale lo fo aw sii tile bɛɛ la, k'ale tanu. 19Dumuni kɛtuma na, aw tun b'a yera ko ne tun be dumuni kɛra, k'a sɔrɔ ne tun te foyi kɛra. Aw ɲaa tun sirila le. 20O la, aw ka Matigi Ala tanu dugukolo kan, k'a ka boɲa fɔ. Sisan ne bena kɔsegi ka yɛlɛ ka taga n cibaga fɛ. Koo min ye aw sɔrɔ, aw k'o bɛɛ sɛbɛn.» O kɔ, a yɛlɛla ka taga sankolo la. 21Tobi n'a deen wilila ka lɔ, u m'a ye tugu. 22U ye Ala tanu ni dɔnkili ye. A ye koba minw bɛɛ kɛ o yɔrɔ la, u y'o fɔ, ka Ala ka mɛlɛkɛ yeko fana fɔ.

ALA KA KUMA

© 2008 Alliance Biblique du Burkina Faso

More Info | Version Index