Search form

Tob 14

1Tobi tilar'a ka dɔnkili la ten, a ye min la ka barika la Ala ye.

Tobi ka saya

2Tobi sara hɛrɛ la k'a sii to saan kɛmɛ ni tan ni fila. U y'a suu don mɔgɔbaba suu doncogo la Ninivu. A ɲaa fiɲɛntuma na, a tun be ni saan bi wɔɔrɔ ni fila ye. A ɲaa nana yɛlɛ, a ye nafolo caaman sɔrɔ ka dagamu. A tora ka fantanw sɔn, ani ka Ala tanu tuma bɛɛ, k'a ka boɲa fɔ.

3-4A satuma na, a y'a dencɛ Tobiya wele ka ladili d'a ma ko: «N deen, i deenw minɛ, e ka teliya ka taga n'u ye Mɛdi jamana na, bari kira Nawumu ye Ala ka kuma min fɔ Ninivu kama, ne lanin b'o la. A ye fɛɛn min bɛɛ fɔ, o bɛɛ bena kɛ. O bɛɛ bena Asiri jamana ni Ninivu dugu sɔrɔ. Isirayɛli kiraw Ala ye minw ci, ye olu fɛɛn min bɛɛ fɔ, o bɛɛ bena kɛ. Foyi tena bɔ u ka kuma na, u ka fɔta bɛɛ bena kɛ a waati latigɛnin na. Mɛdi jamana sigi bena fisaya i ma ni Asiri jamana ni Babilɔni jamana ta ye. Bari ne b'a lɔn ani n lanin b'a la ko Ala ye fɛɛn min fɔ, o bɛɛ bena kɛ tiɲɛ na, hali kirayakuma dakuru ɲaa kelen tena to kɛbali ye. An balima minw siginin be Isirayɛli jamana kɔnɔ, u bena olu kelen kelen bɛɛ tɔgɔ sɛbɛn, k'u minɛ ka taga n'u ye yɔrɔ dɔ la min ka jan hɛrɛyɔrɔ nin na. Isirayɛli jamana bɛɛ lakolon bena to, mɔgɔ tena sɔrɔ Samari ni Zeruzalɛmu kɔnɔ tugu, ani Ala ka soo bena jɛni ka cɛn pewu ka to ten waati dɔ kɔnɔ. 5Nga Ala bena makari u la tugu k'u kɔsegi Isirayɛli. U ben'a batoso lɔ kura ye, nga a tena kɛ i ko fɔlɔta, fɔɔ waati latigɛnin ka se. O kɔ, u bɛɛ bena kɔsegi ka bɔ jɔnya la, ka Zeruzalɛmu lɔ kura ye ɲumaman. Ala ka soo fana bena lɔ kura ye o yɔrɔ la ka kɛɲɛ ni Isirayɛli kiraw ka fɔta ye a kosɔn. 6Dugukolo kan siyaw bɛɛ bena kɔsegi ka siran Ala ɲa tiɲɛ tiɲɛ na. U ka joo kuntan minw tun b'u bila fili la, u bena olu to yen, ka waati bɛɛ Ala tanu ka tilenninya kɛ. 7Isirayɛliden minw bena to tilenninya la, Ala bena olu kisi o loon na, u bɛɛ bena ɲɔgɔn lajɛn ka na Zeruzalɛmu. Ibrayima ka dugukolo bena d'u ma, u bena sigi yen hɛrɛ la kudayi. Ala koo ka di minw ye tiɲɛ na, olu bena nisɔndiya, nga kojugukɛlaw ni minw be Ala hakɛ ta, olu bena tunu ka bɔ dugukolo kan.

8-9«Sisan n deenw, ne ka ladili filɛ nin ye: Aw ka baara kɛ Ala ye sɔbɛ la, k'a diyanako kɛ. Aw k'a fɔ aw deenw ye ko u ka tilenninya kɛ ani ka fantanw sɔn, k'u hakili to Ala la, ani k'a tɔgɔ tanu n'u sɔbɛ ye n'u barika bɛɛ ye tuma bɛɛ. E kɔni, n deen, i ka bɔ Ninivu, kana to yan. N'i ye i bamuso suu don ne gɛrɛfɛ ka ban tuma min na, kana si dugu nin kɔnɔ hali suu kelen yɛrɛ. Bari ne y'a ye ko kojugu be kɛra dugu nin kɔnɔ haali, ani namarako caaman, mɔgɔ si te maloya o la. 10N deen, Nadan ye koo min bɛɛ kɛ a lamɔbaga Ayikari la, i k'o filɛ sa. A m'a ɲanaman fili kasobon juguman kɔnɔ wa? Min tun be i n'a fɔ kaburu. Nga a y'o kɛ mɔgɔ min na, Ala y'o kojugu nin segi a yɛrɛ ma ale ɲana. Ayikari bɔra kɛnɛma tugu, Nadan donna dibi la, a tena bɔ min na fewu, bari a tun ye cogo ɲini ka Ayikari faga. Ayikari tun ye fantanw sɔn minkɛ, Nadan tun ye jaan min la a ɲa janko k'a faga, a bɔra o la. Nadan yɛrɛ benna jaan nin kɔnɔ min kɛra sababu ye a bɔnɛn'a nii na. 11Ayiwa n deenw, o la, fantanw sɔnko be na ni min ye, ani kojugukɛ be na ni min ye, aw k'o filɛ. Kojugukɛ be na ni saya le ye.

«N nii be ɲini ka bɔ.» U y'a minɛ ka la a ka dilan kan, a sara. U y'a suu don mɔgɔbabaw suu doncogo la.

Tobiya labancogo

12Tobiya bamuso sara tuma min na, a y'a suu don a facɛ ta gɛrɛfɛ. O kɔ, a tagara n'a muso ye Mɛdi jamana na, ka sigi Ɛkibatani, a birancɛ Araguwɛli gɛrɛfɛ. 13A tun b'a biranw boɲa kosɔbɛ u ka kɔrɔya la. U sara, a y'u suu don Ɛkibatani, Mɛdi jamana na. O kɔ, a ye Araguwɛli cɛɛn ta i n'a fɔ a tun y'a facɛ Tobi cɛɛn ta cogo min na. 14Ale Tobiya fana sara k'a sii to saan kɛmɛ ni tan ni wolonwula la. Mɔgɔw tun b'a jati kosɔbɛ. 15Yanni a be sa, a y'a mɛn ko Ninivu halakira. Mɛdi masacɛ Siyakisarej ye Ninivuka minw minɛ ka na n'u ye, a ye olu natɔ ye Mɛdi jamana na. Ala ye fɛɛn min bɛɛ kɛ Ninivukaw ni Asiri jamana mɔgɔ tɔw la, a y'a tanu o kosɔn. A nisɔndiyara Ninivu halakiko la. K'a to sii la, a tun bɛ Matigi Ala tanu, min ka kan ni tanuli ye tuma bɛɛ. Amiina.

ALA KA KUMA

© 2008 Alliance Biblique du Burkina Faso

More Info | Version Index