Search form

Tob 2

Tobi bekɔrɔbɔ

1Ne segira soo Azaradɔn ka tile la, ka n muso Ana ni n dencɛ Tobiya ye tugu. An ka *Pantekɔti ɲanagwɛ waati la, an be min kɛ lɔgɔkun wolonwulanan na *Hɔrɔnya ɲanagwɛ tɛmɛnin kɔ, u ye dumuniɲuman labɛn ne ye. Ne sigira ko n be dumuni kɛ, 2u nana dumuni diman sifa caaman bila tabali kan ne ɲakɔrɔ. Ne y'a fɔ n deen Tobiya ye ko: «N deen, wili ka taga an balimaw cɛma, minw nana Ninivu jɔnya la. Banba ka dɛsɛbagatɔ dɔ sɔrɔ u cɛma min tilennin be Matigi ye. N'i ye dɔ sɔrɔ, na n'a ye a ka dumuni kɛ ni ne ye. N deen, ne bena kɔnɔni kɛ fɔɔ i ka kɔsegi ka na.» 3Tobiya wilila ka taga dɛsɛbagatɔ dɔ ɲiniyɔrɔ an balimaw cɛma, nga a segira ka n'a fɔ ko: «N faa!» Ne y'a jaabi ko: «Mun kɛra, n deen?» A ko: «N faa, u ye an ka siya dɔ faga k'a suu fili forobayɔrɔ la, a be yen halibi, u tun y'a kaan dɛrɛ le!» 4Ne wilila teliya la ka n ka dumuni to yen, ne tun ma maga a la fɔlɔ. N tagara cɛɛ nin suu ta forobayɔrɔ la, k'a bila gwata dɔ kɔrɔ yanni suu ka ko, n b'a suu don.b 5Ne segira soo, ka ko ka dumuni kɛ dusukasi la. 6- Ne hakili tora kira Amɔsi ka kuma na, a tun ye min fɔ Betɛli kama ko:

«Aw ka ɲanagwɛw bena yɛlɛma ka kɛ sanga ye,

aw ka dɔnkiliw bena yɛlɛma ka kɛ kasi ye.»

O kɔ, ne daminɛna ka kasi. 7Suu kora tuma min na, ne bɔra ka taga dingɛ sogi ka suu nin don. 8Ne sigiɲɔgɔnw tun be ne lɔgɔbɔra k'a fɔ ko: «A tɛ siran halibi! U tun y'a yɔrɔ ɲini janko k'a faga o koo nin ɲɔgɔn kama, a bolila. A filɛ sisan, a b'a la tugu ka suu dɔw don!»

9O suu kelen na, ne konin kɔ, ne bɔra ka la luu kɔnɔ kogo kɔrɔ, ne ma fani biri n ɲada kan funteni kosɔn. 10Ne tun m'a lɔn ko kɔnɔnin dɔw tun be kogo nin na, ne sanfɛ. U boo gwanninman donna n ɲaaw na, o ye gwɛɛ bila n ɲadenw kan. Ne banbana, ka to ka taga furakɛlaw fɛ janko ka furakɛ, nga k'u to ni u be furaw kɛra ne ye, n ɲaa tora ka dibi ka taga gwɛɛ nin barika la. A laban, n kɛra fiɲɛntɔ ye. Ne tora ten saan naani kɔnɔ. N balimaw bɛɛ hakili ɲagamina n kosɔn la. Ayikari jantora ne la saan fila kɔnɔ fɔɔ ka taga se a taatuma ma Elimayidec mara la.

11O waati la, ne muso Ana tun be fani dan k'an balo n'o ye. 12A tun be to k'o dan ka taga u di a sanbagaw ma, olu tun be to k'o sara a ye. Ayiwa, Disitirɔsid kalo tile wolonwulanan loon, a tun ye fani dɔ dan ka ban, a tagar'o di a sanbagaw ma, olu y'o sɔngɔ d'a ma ka tila ka baden d'a ma naan na. 13A sera soo tuma min na, baden nin y'a daminɛ ka kasi. Ne ye n muso wele k'a ɲininga ko: «Baden nin bɔra min? Soɲalita tɛ fewu? Kɔsegi ka ta'a d'a tigiw ma! Fɛɛn min soɲana, an te se k'o dumu.» 14A y'a fɔ ne ye ko: «Ayi, boɲafɛn lo, u y'a di ne ma ka fara n ka sara kan!» O bɛɛ n'a ta, ne ma l'a la, ne tora k'a fɔ a ye ko a k'a kɔsegi a tigiw ma. Ne dimin'a kɔrɔ baden nin kosɔn. A ye ne jaabi ko: «I ye fantanw sɔn cogo min na, o ye mun ɲa i ye? I ka kɛwaliɲumanw tɔnɔ kɛra mun ye? Bɛɛ b'a lɔn o ye fɛɛn min ɲa i ye!»

ALA KA KUMA

© 2008 Alliance Biblique du Burkina Faso

More Info | Version Index