Search form

Tob 5

Tobiya ni Arafayɛli be taga ɲɔgɔn fɛ Mɛdi

1Tobiya y'a facɛ Tobi jaabi ko: «N faa, i ye min fɔ ne ye, ne bena o bɛɛ kɛ. 2Nga ne ni Gabayɛli te ɲɔgɔn lɔn, ne bena se ka wari nin minɛ cogo di? Ne bena mun kɛ ka n yɛrɛ yira a la, janko a ka se ka ne lɔn, ani ka la ne la, ka wari nin di ne ma? Ne te Mɛdi sira lɔn fana!» 3Tobi y'a jaabi ko: «An tun ye sɛbɛ dɔ dilan, ale y'a bulonɔ bila a kan, ne fana ye n ta bil'a kan. Ne y'a faran fila ye. Ale tora n'a tilan kelen ye, ka wari fara o kan, kelen fana tora ne bolo. A saan mugan filɛ, ne ye wari nin mara yen. Sisan n deen, i ka mɔgɔsɔbɛ dɔ ɲini min bena i bila sira, an bena o tigi sara n'aw kɔsegira tuma min na. Ayiwa, taga wari nin minɛ Gabayɛli fɛ.»

4Tobiya bɔra ko a be taga mɔgɔ ɲini min b'o sira lɔn kosɔbɛ, n'a bena se k'a bila sira fɔɔ Mɛdi jamana na. A ye mɛlɛkɛ Arafayɛli lɔnin sɔrɔ kɛnɛma a ɲafɛ, nga a m'a lɔn ko Ala ka mɛlɛkɛ lo. 5A y'a fɔ a ye ko: «N teri, i bɔra min?» Mɛlɛkɛ y'a jaabi ko: «Ne ye i balima Isirayɛliden dɔ ye, ne nana yan janko ka baara ɲini.» Tobiya y'a fɔ a ye ko: «I be Mɛdi sira lɔn wa?» 6Mɛlɛkɛ y'a jaabi ko: «Ɔnhɔn, ne tagara yen siɲɛ caaman, n be sira nunu bɛɛ lɔn kosɔbɛ. Ne ye n ka taama caaman minw kɛ o yɔrɔ la, ne jigira an balima Gabayɛli fɛ Aragɛsi dugu kɔnɔ, Mɛdi jamana na. Tile fila taama be Ɛkibatani ni Aragɛsi cɛ,h o dugu fila nunu be kuluw yɔrɔ la.»

7Tobiya y'a fɔ a ye ko: «Ne kɔnɔ, n tericɛ, ne be taga n facɛ lasɔmi ka na. Ne mako b'i la, i ka ne bila sira, n bena i sara.» 8Mɛlɛkɛ ko: «Ayiwa, n b'i kɔnɔ yan, nga i kana mɛn.»

9Tobiya segira soo k'a facɛ lasɔmi, a ko: «Ne ye mɔgɔ dɔ sɔrɔ, an balima Isirayɛliden dɔ lo.»

Tobi y'a fɔ a ye ko: «N deen, a wele ko a ka na, ne k'a lɔn a bɔra fadenyabolo min na, an'a buruju, janko k'a lɔn ni an be se k'an jigi la a kan, a k'i bila sira.»

10Tobiya bɔra k'a wele ko: «N tericɛ, n facɛ mako b'i la.»

Mɛlɛkɛ donna soo kɔnɔ. Tobi kɔnna k'a fo. A y'a laminɛ ko: «Ala ka hɛrɛ kɛ i ye kosɔbɛ.» Tobi ko: «Ne be se ka hɛrɛ sɔrɔ tugu cogo di? N ɲaa cɛnna pewu, n te se ka tile ye tugu, n be dibi kɔnɔ i n'a fɔ suu, min te yeli kɛ tugu. Ne bɛ ɲanamanw ni suuw cɛ, n be mɔgɔw kumakan mɛn, nga n t'u ye.»

Mɛlɛkɛ y'a fɔ a ye ko: «I jaa gwɛlɛya! Ala bena i kɛnɛya yanni dɔɔni, o la, e k'i jaa gwɛlɛya!»

Tobi y'a fɔ a ye ko: «N deen Tobiya b'a fɛ ka taga Mɛdi. I bena se k'a bila sira ka to ka sira yir'a a la wa? Ne bena i sara, n balimacɛ.»

A y'a jaabi ko: «Ne be se k'a bila sira. Ne be sira nunu bɛɛ lɔn. Ne tagara Mɛdi siɲɛ caaman, k'o mara kɛnɛyɔrɔw n'a kuluyɔrɔw bɛɛ yaala, ne b'o yɔrɔw siraw bɛɛ lɔn kosɔbɛ.»

11Tobi y'a fɔ a ye ko: «N balimacɛ, i ka somɔgɔw ye jɔnw ye? I buruju ye jumɛn ye? A fɔ ne ye, n balimacɛ.»

12Mɛlɛkɛ ko: «Mun na i b'a fɛ k'o lɔn?»

Tobi y'a fɔ a ye ko: «N balimacɛ, ne b'a fɛ k'a lɔn sɔbɛ la, i ye jɔn deen ye, ani i tɔgɔ.»

13Mɛlɛkɛ y'a jaabi ko: «Ne ye Ananiyasi kɔrɔba deen ye. I balima dɔ lo. Ne tɔgɔ ko Azariya.»

14Tobi y'a fɔ a ye ko: «E ni ce, n balimacɛ. Ala ka to n'i ye! Ne tun b'a fɛ ka tiɲɛ lɔn i somɔgɔw ka koo la, kana jigi n na o kosɔn. I ye ne balima dɔ ye, i ka mɔgɔw ka ɲi kosɔbɛ. Ne ye Semeliyasi kɔrɔba dencɛ fila nunu lɔn kosɔbɛ, Ananiyasi ni Natan. U tun be to ka taga ni ne ye Zeruzalɛmu, n'an be batoli kɛ ɲɔgɔn fɛ. U ma siraɲuman bila. I balimaw ye mɔgɔɲumanw ye, i bɛmaw ka ɲi. Ala ka sira diya.»

15A y'a fɔ tugu ko: «Ne bena i sara tile o tile, warigwɛ kuru kelen, dumunifɛn minw bena di ne dencɛ ma, o ɲɔgɔn bena d'i ma fana. 16N'i ye ne deen bila sira ka ɲa, n bena dɔ fara i ka sara kan.»

17Mɛlɛkɛ ko: «Ayiwa, ne ben'a bila sira. I kana siran, an bena taga hɛrɛ la ka segi yan hɛrɛ la. Bari siranyako tɛ sira nin na.»

Tobi y'a fɔ a ye ko: «Ala ka hɛrɛ kɛ i ye, n balimacɛ!» O kɔ, a y'a deen wele k'a fɔ a ye ko: «N deen, i mako bena se fɛɛn min ma taama nin na, i k'o labɛn, ka taga n'i balimacɛ ye. Sankolotigi Ala k'aw mara o yɔrɔ la, k'aw ɲuman segi ne fɛ! A ka mɛlɛkɛ k'aw bila sira k'aw kɔlɔsi, n deen!»

Tobiya bɔra ko a be sira ta tuma min na, a y'a bolo meleke a facɛ n'a bamuso kaan na k'u fo. Tobi y'a fɔ a ye ko: «Ala ka sira diya!» 18A bamuso daminɛna ka kasi, a y'a fɔ Tobi ye ko: «Mun na i y'a kɛ ne deen tagara do? Ale lo te an bololabere ye wa? Ale min be to ka bɔ ka na. 19Nafa jumɛn be wari caaman sɔrɔ la? An deen man fisa ni wari ye wa? 20Matigi y'an bila yɔrɔ min na, o k'an wasa!»

21A cɛɛ y'a fɔ a ye ko: «I kana hami, an deen ka taama bena diya, a taatɔ n'a segitɔ fɔɔ yan. Loon min na a ɲuman bena segi i fɛ, i ben'o ye. 22I kana hami, kana siran n'u ye, ne muso. Mɛlɛkɛɲuman ben'a bila sira, a ka taama bena ɲa, a bena kɔsegi hɛrɛ la.» 23O kɔ, a muso ye kasi dabila.

ALA KA KUMA

© 2008 Alliance Biblique du Burkina Faso

More Info | Version Index