Search form

Tob 8

1U tilara dumuni na tuma min na, latuma sera. U tagara ni kanbelen ye o boon nin kɔnɔ. 2Tobiya hakili jigira Arafayɛli ka kumaw la. A ye jigɛ biɲɛ n'a dusukun bɔ a ka bɔɔrɔ kɔnɔ k'u bila wusulandaga kɔnɔ, takami kan. 3Jigɛ kasa ye jina gwɛn, a ye boli ta fɔɲɔ fɛ ka taga fɔɔ Ezipiti jamana na. Arafayɛli tugur'a kɔ ka ta'a minɛ k'a siri ni jɔrɔkɔ ye yɔrɔnin kelen. 4U ye Tobiya to yen ka boon daa tugu. A wilila ka bɔ dilan kan k'a fɔ Sara ye ko: «Ne muso, wili, an k'an Matigi dali ko a ka makari an na k'an kisi.» 5Sara wilila. U y'a daminɛ ka Matigi dali, k'a ɲini a fɛ ko a k'u kisi. Tobiya y'a fɔ ko:

«An faaw ka Ala, an b'i tanu!

I tɔgɔ ka tanu waati nataw bɛɛ la!

Sankolo kɔnɔ danfɛnw ni dugukolo kan taw bɛɛ k'i tanu tuma bɛɛ!

6- Ele le ye Adama dan,

e le ye dɛmɛbaga ni bolo layɔrɔ labɛn a ye,

min ye a muso Awa ye.

Adamadenw bɛɛ bɔra u mɔgɔ fila nunu na.

Ele le y'a fɔ ko:

‹Cɛɛ ka to a kelen na, o ma ɲi,

an ka dɛmɛbaga labɛn a ye,

min y'a bɔɲɔgɔnko ye.›

7«O la sisan, musoko nigɛ te ne bilara muso nin furu la, nga ne b'a fɛ k'i ka kuma bato le, min ye tiɲɛkuma ye. Makari ne ni n muso la, a to an ka sijan sɔrɔ ɲɔgɔn fɛ.»

8O kɔ, u y'a fɔ ɲɔgɔn fɛ ko: «Amiina, amiina!», 9ka sɔrɔ ka la.

10Waati dɔɔni tɛmɛnin kɔ, Araguwɛli wilila k'a ka baaradenw wele ko u ka taga kaburu sogi, u tagara. A tun b'a miiri ko: «Ni kanbelen nin sara, o tuma na, mɔgɔw bena yɛlɛ an ma k'an nɛni.» 11U ye kaburu sogi ka ban tuma min na, Araguwɛli segira soo k'a muso wele 12k'a fɔ a ye ko: «I ka baaraden musomanw dɔ ci ka taga boon kɔnɔ k'a filɛ ni Tobiya be nii na. N'a sara, an bena se k'a suu don ni mɔgɔ ma bɔ an kala ma.» 13U ye baara denmusomanw dɔ wele ka fitinɛ don a bolo ka daa yɛlɛ. A donna k'a sɔrɔ u be sinɔgɔra kosɔbɛ ɲɔgɔn fɛ. 14A bɔra k'a fɔ u ye ko: «A be nii na, hɛrɛ be yen!» 15O la, Araguwɛli ye Sankolotigi Ala tanu k'a fɔ ko:

«Ala, mɔgɔ o mɔgɔ kɔnɔ gwɛnin lo,

i ka kan ni olu ka tanuli ye!

U k'i tanu waati bɛɛ la!

16Ne b'i fo, bari, i ye ne nisɔndiya kosɔbɛ!

Bari ne tun be miiri ko a bena kɛ cogo min na,

a ma kɛ ten,

i makarila an na k'an dɛmɛ.

17Ne b'i fo bari i hinɛna deen fila nunu na,

deen wɛrɛ te minw wolobagaw fɛ!

Matigi, makari u la k'u mara

k'a to u be sigi hɛrɛ la i barika la!»

18O kɔ, Araguwɛli y'a fɔ a ka baaradenw ye ko u ka kaburu nin tugu sanni dugu ka gwɛ.

Kɔɲɔya ɲanagwɛ

19Araguwɛli y'a fɔ a muso ye ko a ka buru caaman labɛn. O kɔ, a tagara ka misi fila ni sagajigi naani minɛ a ka begɛnkuluw la ka na n'u ye, k'a fɔ ko u k'o labɛn. U y'a daminɛ ka labɛnni kɛ. 20A ye Tobiya wele k'a fɔ a ye ko: «I bena to yan fɔɔ tile tan ni naani. I ka to yan ka dumuni kɛ, ka minni kɛ ne fɛ. I ben'a kɛ ne denmuso be nisɔndiya tugu, ale min ye tɔɔrɔ caaman sɔrɔ. 21O kɔ, i be se ka ne ka nafolo tilan kelen minɛ ka segi i facɛ fɛ hɛrɛ la. Tilan tɔ kelen bena kɛ i ta ye, ne ni n muso sanin kɔ. N deen, la ne la. Ne ye i facɛ ye, Ɛdina ye i bamuso ye. An b'i fɛ, i n'a fɔ an b'i muso fɛ cogo min na, kabini sisan ni tuma bɛɛ. La o la, n deen!»

ALA KA KUMA

© 2008 Alliance Biblique du Burkina Faso

More Info | Version Index