Search form

Lɔn 1

Adamaden ka kan ka tilenninya kɛ

1Aw minw be dugukolo mara,

aw k'a to tilenninya koo ka diya aw ye!

Aw k'aw ka miiriya la Matigi kan sɔbɛ la,

aw k'a yɔrɔ ɲini ni kɔnɔgwɛ ye.

2Bari ni mɔgɔ min t'a kɔrɔbɔ, o tigi le ben'a ye,

a b'a yɛrɛ yira mɔgɔ la min jigi b'a kan.

3Namaranko miiriya be Ala ni mɔgɔ faran ɲɔgɔn na.

Ni hakilitan be Setigi kɔrɔbɔ,

a ka setigiya bena maloya bila a la.

4Kojugukɛla te lɔnniya sɔrɔ.

Lɔnniya te don kojugukɛla la.

5Hakiliɲuman b'a yɛrɛ yɔrɔ jaɲa namaramɔgɔw la.

A te gwɛrɛ nalomanyakuma fɔbaga la.

Tilenbaliyako ka go a ye haali.

6Lɔnniya ka fisa adamadenw ma kosɔbɛ,

nga mɔgɔ min be kumajugu fɔ Ala ye,

a t'o tigi to ɲasuma na.

Ala be mɔgɔ kɔnɔnakow lɔn,

a b'a dusulakow kala ma,

a b'a ka fɔtaw bɛɛ mɛn.

7Matigi ka Nii be yɔrɔ bɛɛ dugukolo kan,

a b'a kɛ diɲɛ kɔnɔ fɛɛnw be ɲɔgɔn minɛ kosɔbɛ,

o la, kuma o kuma mana fɔ,

a b'o bɛɛ lɔn.

8Ni mɔgɔ min ye kumajugu fɔ,

o be lɔn,

a ka kan ni tɔɔrɔ min ye,

a ben'o sɔrɔ.

9Alaɲasiranbaliw ka kolatigɛninw bena sɛgɛsɛgɛ,

u ka kuma bena fɔ Matigi ye,

u ka kojuguw sara bena di u ma.

10Ala tulo be kuma bɛɛ la,

hali ŋunuŋunukan si te se ka dogo a la.

11O la, aw k'aw yɛrɛ kɔlɔsi ŋunuŋunu gwansan ma.

Aw ka se aw daa minɛko la,

aw kana kumajugu fɔ.

Bari hali kuma min fɔra dogo la,

o bena na ni koo dɔ ye.

Mɔgɔ min be galon la a tɔɲɔgɔnw kan,

o tigi b'a yɛrɛ nagasi.

12Aw kana siraɲuman bila

ka kɛ aw yɛrɛ ka saya sababu ye.

Aw kana halakili lase aw yɛrɛ ma

aw ka kɛwaliw fɛ.

13Ala ma saya dan,

nimanfɛnw ka saya man d'a ye.

14A ye fɛɛn bɛɛ dan janko u ka to nii na,

a ka danfɛnw bɛɛ kɛkun ye sii sɔrɔ ye.

Mɔgɔ fagafɛn te u la.

Dugukolo kan kuntigiya te saya bolo.

15Bari tilenninya te koo banta ye.

Alaɲasiranbaliw ka miiriya

16Alaɲasiranbaliw be saya le ɲini

u ka kɛwaliw n'u ka kumaw fɛ.

U be saya fɛ yɛrɛ yɛrɛ le,

u b'a miiri ko u teri lo.

U bɛnna n'a ye,

o la, u ka kan n'a ye!

ALA KA KUMA

© 2008 Alliance Biblique du Burkina Faso

More Info | Version Index