Search form

Lɔn 11

Kongokolon kɔnɔ koo

1Lɔnniya y'u ka kokɛtaw ɲa

Ala ka kira dɔ sababu la.

2U ye kongokolon lakolon cɛtigɛ,

U y'u ka fanibuguw gwengwen yɔrɔ la,

mɔgɔ tun ma deli ka se yɔrɔ min na.

3U lɔra kelen kan u juguw ɲa,

u y'u kɛlɛbagaw gwɛn.

Isirayɛlidenw ka minnɔgɔ

4Isirayɛlidenw tɔɔrɔla minnɔgɔ bolo,

u kulera i nɔfɛ.

Jii bɔra fara la, u y'a min,

jii bɔra kabakurugwɛlɛn na k'u ka minnɔgɔ ban.

5- Fɛɛn min kɛra u juguw halakifɛn ye,

o kɛra olu kisifɛn ye u tɔɔrɔtuma na.

6Sanni u juguw ka minji ka kɛ baji woyota banbali ye,

i ye joli kɛ a la k'a duru, -

7k'u ɲaa gwan ten,

bari u ko Isirayɛlidenw ka denɲɛninw ka kan ka faga,

i ye jii caaman d'i ka mɔgɔw ma,

u jigi tun te min kan.

8E y'a to minnɔgɔ y'u minɛ

janko k'u juguw ɲaa gwancogo i fɛ yira u la.

9I y'u kɔrɔbɔ,

nga i y'u tɔɔrɔ ni makaridusu ye tiɲɛ na.

O y'u dɛmɛ ka Alaɲasiranbaliw ka sɛgɛn faamu

n'i dimina u kɔrɔ k'u tɔɔrɔ ni fariya ye tuma min na.

10E y'i ka mɔgɔw kɔrɔbɔ

i ko faa min b'a deen ladi.

Nga mɔgɔ tɔw kɔni,

e kɛra olu fɛ i ko masa fariman

min be mɔgɔw jalaki.

11K'u to yɔrɔjan,

walima i ka mɔgɔw masurun na,

u tɔɔrɔla.

12O la, u dusu cɛnna koo fila la.

U tun be ŋunanna k'u hakili to kotɛmɛninw na.

13Bari, u y'a mɛn tuma min na ko

u tɔɔrɔfɛn kɛra dɔw ka hɛrɛ sɔrɔfɛn ye.

U y'a faamu ko e Matigi bulonɔ lo.

14- Ezipitikaw banna mɔgɔ min na k'a labila saya ye fɔlɔ la,

ani ka tila k'a gwɛn ni dɔgɔya ye,

ale ka koo nan'u kabakoya haali.

Bari, olu tɔɔrɔla minnɔgɔ bolo ka tɛmɛ mɔgɔtilenninw kan.

Ezipiti josɔnlaw

15U ka juguya y'a to u ye nalomanya miiri sɔrɔ,

fɔɔ o nana kɛ sababu ye,

u ye fɛnmisɛn kuntanw sɔn joow ye,

ani fɛɛn hakilitan minw be fofo.

O la, i ye sogo hakilitan sifa caaman ci k'u ɲaa gwan,

16- waasa u k'a lɔn ko mɔgɔ ye hakɛ kɛ ni fɛɛn min ye,

a ɲaa be gwan ni o le ye.

17E min ye diɲɛ dan n'i ka sebagaya ye

k'a sɔrɔ fɛɛn labɛnnin t'i bolo,

e ka warajuguw ni jarajuguw ci u kama,

o te foyi ye i fɛ,

18walima i ka sogojugu fariman dɔ wɛrɛw dan u kama,

ni olu be se ka tasumaba seri n'u daa ye,

walima sisiba,

walima yeelen kabakoman i ko saan manamanatɔ,

ka bɔ u ɲadenw na.

19O fɛɛn nunu yɛrɛ tun tena foyi kɛ u la fɔlɔ.

Nga u yeko dama yɛrɛ fɛ,

siranya bena u faga.

20Hali n'o yɛrɛ tɛ,

dafɔɲɔ tun be se k'u labɔ,

i tun bena u sara ni fariya ye,

e ka sebagaya fɔɲɔ tun bena u ta ka yɛrɛkɛ.

Nga, i ye fɛɛn bɛɛ kɛ k'a dama kɛɲɛ a cogo la.

Ala ka setigiya n'a ka kanuya

21Ele ka fangatigiya b'i bolo tuma bɛɛ.

Jɔn be se ka lɔ e ɲa e ka setigiya kosɔn?

22Ele ɲakɔrɔ,

diɲɛ bɛɛ be i ko fɛnfitini

min be kilo jigi faan kelen.

A be i ko sɔgɔma komiji

min be tɔnina fitini fitini duguma.

23I be makari bɛɛ la, bari,

i be se koo bɛɛ la.

E t'u ka hakɛ filɛ,

waasa u ka se k'u sɔɔn yɛlɛma.

24Danfɛn bɛɛ koo ka d'i ye,

ele yɛrɛ ye fɛɛn o fɛɛn dan,

u si koo man go i ye.

N'u dɔ koo tun ka go i ye,

e tun ten'a dan.

25A fɛɛn te yen, min be yen n'i sago tɛ.

U si tun tena kɛ yen n'i ma fɔ k'u ka kɛ.

26E b'a nɔgɔya u bɛɛ ye,

bari u bɛɛ y'i ta ye.

I ye kuntigi ye nii koo ka di min ye.

ALA KA KUMA

© 2008 Alliance Biblique du Burkina Faso

More Info | Version Index