Search form

Lɔn 13

Diɲɛ fɛɛnw batoko

1Mɔgɔ minw ma Ala lɔn,

olu bɛɛ ye nalomanw yɛrɛ yɛrɛ ye.

Min be yen,

u ma se k'ale lɔn fɛnɲumanw sababu la.

U ye fɛɛn nunu sɛgɛsɛgɛ,

u ma se k'u Danbaga lɔn.

2Nga, olu ye tasuma le jati batofɛn ye

min be diɲɛ koow ɲanabɔ,

walima fɔɲɔ, walima sanfɔɲɔ,

walima lolow yɛlɛmacogo,

walima jii min be woyora ni fanga ye,

walima tile ni kalo.

3N'u filɛko diya le y'a to u y'u jati batofɛnw ye,

u k'a lɔn ko fɛɛn nunu kuntigi ka fisa n'u ye kosɔbɛ.

Bari, u danbaga le ye cɛɲɛ bɔyɔrɔ ye.

4N'o y'a sɔrɔ n'o fɛɛn nunu ka fangatigiya

n'u ka seko le b'u dabari banna,

u k'a lɔn o fɛ

k'u danbaga fanga ka bon n'u ta ye haali.

5Bari, danfɛnw ka boɲa n'u ka cɛɲa jati minɛ b'a kɛ

mɔgɔ be se k'u Danbaga cogo lɔn.

6O bɛɛ n'a ta, o mɔgɔ nunu ka kan ni jalaki dɔɔni dama ye.

Bari n'a sɔrɔ u filila u ka Alaɲini cogo la sɔbɛ la.

7K'u to a ka danfɛn nunu koo sɛgɛsɛgɛ la u lamini na,

fɛɛn nunu yeko b'u nigɛ.

Bari, u ɲaa be minw yera,

olu cɛɛ ka ɲi haali.

8O bɛɛ n'a ta, halibi u ka kan ka jalaki.

9Bari, n'u kɛra hakilitigiw ye

fɔɔ ka se ka diɲɛ gundow jati minɛ,

mun na u ma se k'o fɛɛn nunu Tigi lɔn?

Lɛsɛnikɛla ka koo

10Mɔgɔ minw be adamaden bolofɛn dilannin jati batofɛnw ye,

k'u jigi la o fɛɛn nunu kan minw te magamaga,

olu ye makaritɔw ye.

Fɛɛn minw dɔw ye sanu ye,

dɔ ye warigwɛ ye n'u dilancogo ɲana.

Dɔw ye sogo jaa ye,

dɔw ye kabakuru nafatan ye

fɔlɔfɔlɔmɔgɔ dɔ ye min dilan.

11A filɛ, lɛsɛlikɛla dɔ be yiri dɔ tigɛ min tako ka nɔgɔ.

A b'a fara bɛɛ bɔ cogoɲuman na,

k'a lɛsɛ a cogo la,

k'a dilan ka kɛ baarakɛminan ɲanaman ye.

12A b'a murumuruw kɛ ka gwaa kɛ,

ka dumuni kɛ ka fa.

13A tɔɔ gɔngɔrɔnin kurukurunin min tora,

min te foyi ɲa tugu,

a b'a ta ka to k'a yɛrɛ ɲanagwɛ n'a ye.

A b'a lɛsɛ ka ɲa a lafoniwaatiw la.

A b'a lɛsɛ k'a kɛ mɔgɔ jaa ye,

14walima sogo kuntan dɔ jaa ye.

A b'a wulen, k'a fiɲɛyɔrɔw bɛɛ datugu.

15A be bilayɔrɔ ɲanaman ɲini a la,

a b'a gwengwen kogo la ni nigɛ ye.

16A be jija janko a kana ben,

bari a lanin b'a la ko a te se ka foyi kɛ a yɛrɛ ma.

Sabu jaa dama lo,

a mako be dɛmɛ na.

17O bɛɛ n'a ta,

mɔgɔ b'a yɛrɛ makoyafɛn ɲini a fɛ,

i ko nafolo, ni furuko, ni denko.

A te maloya ka kuma o fɛɛn nin fɛ,

min te magamaga.

Fanga te fɛɛn min na,

ale be kɛnɛya dali o le fɛ.

18Fɛɛn min te magamaga,

a be sii dali o le fɛ.

Fɛɛn min te se ka foyi ɲa,

a be dɛmɛ ɲini o le fɛ.

Fɛɛn min te se ka taama fewu,

a b'a ka taamako kalifa o le ma.

19A ka baloko, ni bololafɛn sɔrɔko,

n'a ka baara ɲako la,

a be dɛmɛ ɲini barikatan fɛ.

ALA KA KUMA

© 2008 Alliance Biblique du Burkina Faso

More Info | Version Index