Search form

Lɔn 14

Lɔgɔ batoko

1Mɔgɔ dɔ wɛrɛ ka koo filɛ fana.

A be wili k'a yɛrɛ labɛn baji fariman kan taama na.

A b'a darakan fɔ yiri lɛsɛnin ye,

min barika ka dɔgɔ ni kurun ye,

a b'a ka taama kɛ min kɔnɔ.

2Bari, kurun dilankun ye ka se ka nafolo sɔrɔ.

Hakilitigi le y'a baara.

3Nga ele, an Faa ka kanuya barika la,

kurun be taga ɲa.

I ye sira bɔ kɔgɔji kan,

i ye hɛrɛ sira bɔ bajiw kan.

4I b'a yira ten ko

i be se ka mɔgɔ kisi ka bɔ kojugu sifa bɛɛ la,

hali n'a be jii kan taama daminɛ

n'a te foyi lɔn a la.

5E ye fɛɛn minw dan i ka lɔnniya barika la,

e t'a fɛ o ka kɛ nafatanw ye.

O kama, adamadenw be sɔn ka taga u yɛrɛ kalifa

yiri kunkurunin ma.

U be jikuruw cɛtigɛ kurundennin kɔnɔ,

ka se u taayɔrɔ la hɛrɛ la.

6Koow daminɛ na, mɔgɔjanjan yɛrɛboɲalaw satuma na,

diɲɛ ɲasigi tagar'a yɛrɛ sutara kurundennin le kɔnɔ.

Ele yɛrɛ le y'a mara o ka kɛ diɲɛ sii ye

waati nata mɔgɔw fɛ.a

7Tilenninya ma tunu lɔgɔ min barika la,

duba b'o kan.

8Nga adamaden bolo be min kɛ joo ye,

ale n'a dilanbaga bɛɛ danganin lo.

A dilanbaga danganin lo sabu ale lo y'a baara.

Lɔgɔ min ye tolifɛn ye,

ale yɛrɛ danganin lo fana,

bari u y'a wele ko batofɛn.

9Tiɲɛ na, Alaɲasiranbali n'a ka juguya koo ka go Ala ye.

10Baara nɔɔ, ani baara kɛbaga bɛɛ bena ɲagwan sɔrɔ.

11O kama, Ala ka kiti bena se siyaw ka joow ma fana.

Bari, hali n'u y'a ka danfɛn dɔ ye,

u nana kɛ fɛnjuguw ye.

Balawufɛn lo adamadenw fɛ,

jaan lo nalomanw seen kɔrɔ.

Josɔn bɔyɔrɔ

12Joo dilanko le nana ni kakalaya ye.

O miiriya sɔrɔko ye ɲagamini don mɔgɔ balocogo la.

13Joow tun te yen koow daminɛ na,

u tena to yen fana kudayi!

14Adamadenw ka yɛrɛboɲa le nana n'u ye diɲɛ kɔnɔ.

O la fana, a latigɛra ko u ka koo bena bari ka ban.

15Denfa dɔ deen kɛnɛkɛnɛ ka saya sababu la,

a dusu kasinin y'a fɔ ko

u k'ale ka deen jaa dilan,

min barila ka sa.

U ye boɲa l'a kan i ko batofɛn,

k'a sɔrɔ suu lo.

A y'a kɛcogo gundo n'a landaw yir'a ka mɔgɔw la.

16A koo nana barika sɔrɔ tuma dɔ,

o landajugu nin nana kɛ sariya ye

ni mɔgɔw b'a bato.

O la, masa dɔw ye mɔgɔw wajibiya ka jaaw bato.

17Minw yɔrɔ jaɲa b'u bato bali,

u be olu jaa dilan k'u to yɔrɔjan.

U be boɲa la u ka masa min kan,

u b'ale jaa dilan min be ye ɲaa na.

O la, u be se ka boɲa la u ka masa ye

ni timinadiya ye

ko a b'u ɲakɔrɔ, k'a sɔrɔ a te yen.

18Hali mɔgɔ minw t'a lɔn yɛrɛ,

olu y'u niin don kosɔbɛ o batoli nin na,

a dilanbaga ka timinadiya kosɔn.

19K'a sɔrɔ a dilanbaga tun b'a fɛ ka kuntigiba dusu diya.

A ye cekuya don a ka baara la,

a b'a jaa dilan k'a cɛɲa

fɔɔ ka tɛmɛ a yɛrɛ kan.

20O la, baara nin ka cɛɲa b'a nigɛ don mɔgɔ la,

fɔɔ u tun be mɔgɔ min boɲa adamadenya la,

ale nana kɛ batofɛn ye u fɛ.

21O nana kɛ jaan ye adamadenw fɛ.

O la, ni bɔnɛ sera mɔgɔ dɔ ma, walima fanga,

u b'a fɔ ko kabakuru nin nɔɔ lo, walima lɔgɔ nin lo.

U b'o tɔgɔ nin di ale ma

k'a sɔrɔ, o ye Ala kelenpe dama le ta ye.

Josɔn n'a bɔnɛ

22Ka fili Ala lɔnniya la, u ma dan o ma dɛ.

U tora kɛlɛjugu la lɔnbaliya kosɔn

ka kojugu nin wele ko hɛrɛ,

23ka to ka denmisɛnw kɛ ka joow sɔn,

ka kodogoninw kɛ,

ka landajuguw kɛ u ka ɲanagwɛjuguw la.

24U te adamadenya jati tugu,

u te tilenninya kɛ furu kɔnɔ.

Dɔ be janfa kɛ k'a tɔɲɔgɔn sii tunu,

dɔ be ɲamɔgɔya kɛ n'a muso ye k'a dusu cɛn.

25Fɛɛn bɛɛ ɲagamina:

jolibɔn, ɲɔgɔnfaga, soɲali, namaran,

tilenbaliya, janfa, ɲagamini,

ani ka kali gwansan,

26mɔgɔɲumanw tɔɔrɔko,

ɲumanlɔnbaliya, nɔgɔtɔya,

cɛɛw te musoko kɛ ni musow dama ye,

furu ɲagamikow, ɲamɔgɔya ni mɔgɔkolonya.

27Bari, joow tɔgɔ welebaliw sɔnko le ye kojugu bɛɛ bɔyɔrɔ n'a laban yɔrɔ ye.

28Kelen ye, u sɔnbagaw be to nisɔndiya dama tɛmɛnin na,

walima ka kirayakuma fɔ k'a sɔrɔ galon lo.

U be juguya kɛ,

walima u te siga k'u ka kali cɛn.

29U y'u yɛrɛ kalifa joow ma minkɛ minw te nii na,

u ma l'a la ko ɲagwan bena u sɔrɔ

u ka kali fu nunu kosɔn do!

30Nga, ɲagwan bena se u ma koo fila kama:

a fɔlɔ, u nɔrɔla joow la,

u ɲagamina Ala koo la.

A filanan, u kalila ka galon tigɛ

ka Ala ka koow dɔgɔya.

31U be kali ni joo min tɔgɔ ye,

a ma kɛ i ko ale ka sebagaya le bena u ɲaa gwan dɛ.

Nga ɲagwan min ka kan ni kojugukɛlaw ye,

o le bena la u kan.

ALA KA KUMA

© 2008 Alliance Biblique du Burkina Faso

More Info | Version Index