Search form

Lɔn 16

Isirayɛlidenw n'u juguw

1O la, sogobatolaw ɲaa gwanna ni sogo wɛrɛw ye,

o fana kɛɲɛna kosɔbɛ.

U ɲaa gwanna ni sogo caaman ye.

2- Matigi, sanni o tɔɔrɔ ɲɔgɔn nin

ka se i ka mɔgɔw ma, ayi!

I ye hɛrɛ kɛ i ka jama ye.

E tun b'a fɛ k'u ka kɔngɔ nɔgɔya.

I ye dumuni diman labɛn u ye.

I ye tukɔnɔwɔlɔnw d'u ma.

3Kɔngɔ tun be e juguw la.

Sogo minw tun cira u ma,

olu koo goyara u ye

fɔɔ dumuni nigɛ bɔra u la.

K'a sɔrɔ,

dumuni dɛsɛra i ka mɔgɔw fɛ waati dɔɔni kɔnɔ.

O kɔ, u ye dumuni diman sɔrɔ.

4A ka ɲi kɔngɔba ka mɔgɔtɔɔrɔbagaw minɛ.

A ka fisa k'i juguw ɲagwantɔ yira e ka jama na.

Ala le be mɔgɔ kisi

5Sogojuguw tun y'i ka mɔgɔw kɛlɛ,

dɔw sara saaw ka cinnɔ fɛ.

Hali wo, e ka dimi tun ma to

fɔɔ ka se a daan na do.

6E y'u bagabaga waati dɔɔni k'u lasɔmi le.

E ye kisili taamasiɲɛ yira u la

janko u hakili ka jigi e ka sariya la.

7Tiɲɛ na, ni min tun ye taamasiɲɛ nin filɛ,

ale tun be kisi.

A ma kɛ ko fɛɛn nin filɛko le y'a kisi dɛ,

nga ele lo, mɔgɔ bɛɛ kisibaga.

8E y'a yira an juguw la ten ko

ele lo be mɔgɔ kisi kojugu bɛɛ ma.

9Olu kɔni, tɔɔnw ni limɔgɔw le y'olu cin ka faga,

fura ma sɔrɔ a la.

Bari, o tɔɔrɔ le ka kan n'u ye,

o sogow sifaw bolo.

10Saa farimanw ka cinnɔ yɛrɛ ma se i deenw kɔrɔ

bari, e ka makari kosɔn,

e y'u kɛnɛya.

11A kɛra ten, e tun b'u hakili jigi

e ka fɔtaw la ni saaw cinnɔ ye.

Nga i y'u dɛmɛ joona

janko u kana ɲinɛ i kɔ kudayi,

o ka kɛ sababu ye u niin be bɔ e ka ɲumanya la.

12Furaburu ma u furakɛ,

tulu fana tɛ.

Nga ele Matigi ka kuma lo,

min be fɛɛn bɛɛ kɛnɛya.

13Bari, ɲanamaya,

ani saya be bɔ ele lo fɛ.

Ele lo be mɔgɔ kɛ a be jigi lahara,

ele lo be segi ka bɔ n'a ye.

14Adamaden kɔni,

ale be se ka mɔgɔ faga juguya la,

nga o tigi nii min bɔra,

a te se k'o segi a ma.

Min sera lahara,

a te se k'ale bɔ yen.

Sanbɛrɛ ni maanɛ

15Mɔgɔ te se k'a yɛrɛ bɔsi ele bolo.

16Alaɲasiranbali minw tun be banna k'u t'i lɔn,

i ye olu bugɔ n'i bolo barikaman ye.

Sanjugu ni sanbɛrɛ farimanw,

ani sanbabaw y'u tɔɔrɔ,

tasuma y'u bɛɛ halaki.

17Kabako yɛrɛ filɛ nin ye:

Tasuma bɛɛ be faga jii kɔnɔ,

nga nin na, tasuma ye barika sɔrɔ jii kɔnɔ.

Bari, diɲɛ kɔnɔ sebagayaw bɛɛ be kɛlɛ kɛ

ka mɔgɔtilennin dɛmɛ.

18Tuma dɔ, tasuma fanga be dɔgɔya,

janko, sogo minw cira i juguw kama,

olu kana halaki.

A kɛra ten, nunu k'a lɔn ani ka sɔn

ko ele b'u kitira.

19Tuma dɔ, tasuma nin be mana jii kɔnɔ fɔɔ ka tɛmɛ

waasa ka to k'o yɔrɔjugu sumanw jɛni.

20Nga i ye mɛlɛkɛw ka dumuni di e ka jama ma.

E ye dumuni labɛn k'a ci u ma ka bɔ sankolo la,

u ma sigɛn ka min sɔrɔ.

Diya sifa bɛɛ b'a la,

a ka di bɛɛ daa la.

21E tun be dumuni min dira u ma,

o tun b'i ka ɲumanya yira e ka deenw faan fɛ.

A diya tun be bɛn a dumubagaw bɛɛ ma,

a tun be diya ka kɛɲɛ u kelen kelen bɛɛ sago ma.

22- Dumuni min tun be i ko *sanji siminin ni sanbɛrɛ,

a tun te yelenna tasuma bolo.

A tun be lɔn o le fɛ ko

tasuma min tun be manana sanbɛrɛ kɔnɔ ani sanji kɔrɔ,

k'o y'an juguw ka sumanw le halaki.

23K'a sɔrɔ, o tasuma kelen nin le barika be dɛsɛ

tuma min mɔgɔtilenninw ka kan k'u ka dumuni sɔrɔ.

24Danfɛnw b'i ka bila la,

ele min y'u danbaga ye.

U be fariya ka mɔgɔjugu ɲaa gwan.

Minw b'u yɛrɛ kalifa ele ma,

u be magaya ka hɛrɛ kɛ olu ye.

25O le kosɔn,

o dumuni nin be sɔn yɛlɛmani sifa bɛɛ ma.

A tun b'i sago le kɛra ten,

i y'a di mɔgɔw bɛɛ ma minw mako tun b'a la

k'i ka ɲumanya yira.

26Matigi, o la,

i ka deen kanuninw tun ka ɲi k'a lɔn ko

sɛnɛfɛnw te mɔgɔ balo,

nga minw b'u jigi la i kan

i ka kuma le be olu nii kanda.

27Tasuma tun te foyi kɛra fɛɛn min na,

tile fitini y'o yelen,

28waasa an k'a lɔn ko an ka kan

ka wili tile ɲa, ka se k'i waleɲuman lɔn,

ka se k'i kunbɛn dugugwɛdafɛ.

29Ɲumanlɔnbali jigi bena tigɛ

i ko tile be sanbɛrɛ yelen cogo min na,

a be woyo ka taga jii nafatan cogo la.

ALA KA KUMA

© 2008 Alliance Biblique du Burkina Faso

More Info | Version Index