Search form

Lɔn 19

Buruku kɔgɔji tigɛko

1E y'i ka dimi kɔni yira i juguw la

fɔɔ ka se a daan na hali e te makari.

Bari, u tun bena min kɛ,

e tun b'o lɔn ka kɔrɔ,

2ko n'u ye sira d'i ka jama ma ka ban,

k'u bila ka taga teliya la yɛrɛ,

k'u bena miiriya wɛrɛ ta k'u kɔgwɛn.

3K'a sɔrɔ, u tun b'u ka sangakow la dɛ,

ka to ka kasi kaburuda la,

u ka mɔgɔw sako la,

u ye ŋaniya wɛrɛ ta nalomanya la

k'u bena mɔgɔ nunu kɔgwɛn,

k'a sɔrɔ u tun y'u dali yɛrɛ,

k'u ka taga.

U wilila ka tugu u nɔɔ kɔ i ko bolibagaw.

4U tun ka kan ni dankan min ye,

o le tun b'u bilara o koba nin na,

fɔɔ u ɲinɛna kokɔrɔ kɔ,

janko u ka tɔɔrɔ tɔɔ min tora,

o ka la u kan ka ban.

5E ka mɔgɔw bena kabakotaama kɛ,

nga olu kɔni bena saya kabakoman sɔrɔ.

6Danfɛnw bɛɛ labɛnna kura ye i ka kuma barika la

waasa u k'i deenw tanga kojugu sifa bɛɛ ma.

7U ye sankaba ye,

a suma kɛra u ka sigiyɔrɔ kan.

Yɔrɔ min tun ye jii ye,

dugukolo janin yera yen.

Tɛmɛyɔrɔ bɔra Kɔgɔjiwulen cɛma,

baasi ma sɔrɔ min na.

Kɛnɛba bɔra, a bɛɛ binkɛnɛ,

jii fariman wuruwuruyɔrɔ la.

8Jama bɛɛ tɛmɛna yen,

e yɛrɛ le tun b'u kɔlɔsira,

u ye kabako nunu seere ye.

9U tun be i ko soow, kongo kɔnɔ.

U tora ka panpan i ko sagadenw.

U tora k'i tanu, Matigi,

e min y'u kisi.

10Bari, koo minw kɛra u ka jɔnya waati la,

u hakili tun b'o la halibi.

Yanni sogo ka bɔ dugukolo la, soso le bɔra.

Yanni baji be jigɛ di,

a ye tɔrisenjanw bɔ caaman.

11O kɔfɛ tugu,

u ye kɔnɔ sifa wɛrɛw ye minw bɔra kura ye,

bari, nigɛjugu kosɔn,

u k'olu be dumuniɲuman fɛ.

12O kama, tukɔnɔwɔlɔnw bɔra kɔgɔji faan fɛ

janko k'u wasa.

Ezipitikaw ɲagwanko

13Ɲagwan nin ma bali kojugukɛlaw la,

a kɔnna k'u lasɔmi ni sanpɛrɛn farimanw ye.

U ka juguya kosɔn,

u ka ɲagwan tun kɛɲɛna u la kosɔbɛ.

Bari, u ye lonanw minɛcogo juguya haali.b

14Dɔw banna lonan ladonko la,

sabu o t'u lɔn.

Nga olu ye lonanw bila jɔnya la yɛrɛ

k'a sɔrɔ u tun ye koɲuman kɛ u ye.c

15A tena dan o dama ma.

Tɔɔrɔ be kojugukɛla nunu kɔnɔna,

bari, u tun ye lonanw minɛ ni juguya ye.

16Nga olu tun ye mɔgɔ setɔkura nunu kunbɛn

ni nisɔndiya ye ɲanagwɛ la.

U y'u minɛ cogo kelen na ni olu.

U segira ka baaragwɛlɛn la u kan k'u tɔɔrɔ.

17O la, olu fana kɛra fiɲɛntɔw ye

i ko Sodɔmukaw,

Lɔti mɔgɔtilennin ka soda la.

U bɛɛ tora dibijugu dɔ la

ka to k'u ka sosira ɲini ka dɛsɛ.

Dinyɛkɔnɔfɛnw yɛlɛmako

18Dinyɛkɔnɔfɛnw cogo tora ka yɛlɛmayɛlɛma u ni ɲɔgɔn cɛ

i ko gɔnijuruw kaan be don ɲɔgɔn na cogo min na ka gɔni kaan diya,

k'a sɔrɔ juru bɛɛ n'a kaan.

N'i ye jatiminɛ kɛ, koo min kɛra,

o gwɛnin lo.

19Kɛnɛmafɛnw kɛra jikɔnɔfɛnw ye.

Minw tun be yaala jii kɔnɔ,

olu tora ka taama dugukolo kan.

20Tasuma tun be mana ni barika ye jii kɔnɔ.

Jii yɛrɛ ɲinɛna ko ale ye tasuma fagafɛn ye.

21Sogo barikatan minw tun be yaalala tasuma kɔnɔ,

tasuma tun te olu jɛnina.

A tun te Ala ka dumuni dinin fana yelen,

min yelenko man gwɛlɛ i ko sanbɛrɛ.

Folikan laban

22Matigi, i ye boɲa ni kunkɔrɔta d'i ka jama ma cogo bɛɛ la.

I ma cekun bɔ u la tuma si,

e y'u dɛmɛ tuma bɛɛ ni yɔrɔ bɛɛ.

ALA KA KUMA

© 2008 Alliance Biblique du Burkina Faso

More Info | Version Index