Search form

Lɔn 2

1Alaɲasiranbaliw te miiri ka ɲa.

U b'a fɔ u yɛrɛ kɔnɔ ko:

«An sii man jan, a dusukasi ka ca.

A laban mana se, fura t'a la.

An te mɔgɔ si lɔn min segira ka bɔ lahara.

2An wolola ten,

an mana sa, a be kɛ i ko an tun ma wolo ka ye.

An ninakili ye sisi dɔrɔn le ye,

an ka miiriya be i ko mɔgɔ dusukun panpancogo.

3N'o banna dɔrɔn,

an farisogo be kɛ buguri ye,

an nii be bɔ i ko fɔɲɔ gwansan.

4Yanni waati dɔ, an tɔgɔ be tunu,

mɔgɔ si hakili tena to an ka kɛwaliw la.

An ka koo bena kɛ i ko sankaba ta

min tɛmɛna a nɔɔ ma to.

A bena tunu i ko bugun,

tile fariyatuma na.

5An sii be i ko suma tɛmɛtɔ.

An ka saya ye wajibi le ye.

A latigɛnin lo, tagakasegi t'a la.

6Ayiwa, an ka bii fɛnɲumanw diya bɔ!

An ka nafa bɔ diɲɛ na kosɔbɛ ni diyana ye

i ko an kanbelenwaati!

7An ka duvɛnɲuman min

ka tulu kasadiman mɔ!

An kan'a to an kanbelenwaati ka tɛmɛ gwansan ten.

8Sanni feerenw ka ja, an k'o tigɛ,

an ka diɲɛ diya bɔ sanni a ka ban.

9An si kana fɔn an ka ɲanagwɛba nin na,

an k'an ka nisɔndiyaba taamasiɲɛw to yɔrɔ bɛɛ!

Bari, o le ye anw niyɔrɔ ye!

10An ka fantanw tɔɔrɔ, hali n'u tilennin lo.

An kana makari firiyamusow la,

an kana mɔgɔkɔrɔbaw boɲa, kunsigigwɛtigi nunu!

11An fɛ, fangatigi ta le ye tiɲɛ ye.

Barikatanya kɔni te foyi ɲa mɔgɔ ye!

12An ka jaan la mɔgɔtilenninw ɲa.

U b'an sɛgɛn, u te sɔn an ka kɛwaliw la.

U b'an jalaki ko an be Musa ka sariya cɛn,

u ko an te an faaw ka ladiliw bato.

13U ko u be Ala lɔn,

u b'u yɛrɛ wele Matigi deenw.

14U ka koo n'an ka miiriya bɛnnin tɛ fewu,

u yeko ka gwɛlɛ an ma.

15U cogo te i ko tɔw ta,

u taamacogo be danna.

16U b'an jati fɛnjuguw ye,

u b'an yɔrɔ jaɲa u yɛrɛ la i ko ɲamaɲama.

U b'a fɔ ko mɔgɔtilennin ta laban ye hɛrɛ ye,

u b'u yɛrɛ boɲa ko Ala ye u Faa ye.

17An ben'a ye n'u ka kuma ye tiɲɛ ye!

An ben'a ye u laban bena kɛ min ye.

18Ni mɔgɔtilenninw ye Ala deenw ye sɔbɛ la,

Ala bena u bɔsi u juguw bolo.

19O kosɔn, an k'u kɔrɔbɔ,

an k'u tɔɔrɔ kosɔbɛ.

O la, an ben'a lɔn u ka hakilisigi be cogo min,

an bena u ka muɲu danyɔrɔ lɔn.

20An k'u jalaki k'u bila maloya saya la,

sabu u b'a fɔ ko Ala bena u dɛmɛ.»

21Mɔgɔjuguw be miiri ten, nga u filila.

U ka juguya b'u kɛ fiɲɛntɔw ye.

22U te Ala ka koo dogoninw lɔn.

K'a fɔ ko Alaɲasiranbaga bena o sara sɔrɔ,

u ma la o la.

Boɲa min bena la jalakibaliw kan,

u ma la o la fana.

23Ala ye mɔgɔ dan tuma min na,

a tun m'a latigɛ ko a be sa,

a y'a dan a yɛrɛ jaa la.

24Saya donna diɲɛ na Sutana ka keliya sababu la,

a be se Sutana kɔmɔgɔw le ma.

ALA KA KUMA

© 2008 Alliance Biblique du Burkina Faso

More Info | Version Index