Search form

Lɔn 3

Mɔgɔtilenninw ka sini sara

1Mɔgɔtilenninw nii be Ala bolo,

tɔɔrɔ si tena u sɔrɔ tugu.

2Hakilitanw ka miiri la,

u sara sɔbɛ la,

u taako kɛra bɔnɛ ye,

3u yɔrɔ jaɲako kɛra balawu ye.

K'a sɔrɔ u be hɛrɛ la.

4Mɔgɔw be miiri k'u tɔɔrɔra u ka kɛtaw le kosɔn,

u jigi tun be sini sɔrɔ kan.

5U ka tɔɔrɔ dɔɔni tɛmɛnin kɔ u ka kɛta kosɔn,

u bena hɛrɛ sɔrɔ kosɔbɛ.

Ala y'u kɔrɔbɔ, k'a ye ko a ka ɲi

u ka to n'ale ye.

6A y'u nɔgɔ bɔ i ko sanu,

faan kɔnɔ,

a sɔnna u ma i ko saraka dafanin.

7Ala ye waati min latigɛ kiti kama,

o waati la, u bena manamana.

U bena kɛ i ko tasuma

min be biin janin jɛni.

8U bena jamanaw mara,

u bena kɛ siyaw kuntigiw ye,

Matigi bena kɛ u ka Masa ye kudayi.

9Mɔgɔ minw jigi be Ala kan,

olu ben'a lɔn ko a ka sira ye tiɲɛ ye.

Minw mana to kantigiya la,

olu bena to n'a ye kanuya la.

Bari a be ɲumanya kɛ a ka mɔgɔwolomaninw ye,

a be makari u la.

Alaɲasiranbaliw ka sini sara

10Nga Alaɲasiranbaliw ka kan ni ɲagwan min ye

u ka miirijuguw kosɔn,

u ben'o sɔrɔ.

Bari u ma mɔgɔtilenninw jati,

u y'u kɔɔ di Matigi ma.

11Mɔgɔ min mako te lɔnniya ni ladili la,

o tigi ye sigɛnbagatɔ ye.

A jigi be fu kan.

A ka baara ye gwansan le ye,

a te se ka foyi ɲa.

12A muso ye hakilitan ye,

a deenw ye denjuguw le ye,

a kɔmɔgɔw bena kɛ dangadenw ye.

Tilenninya ka fisa ni deen sɔrɔ ye

13Muso wolobali fiɲɛtan min ma sɔn ka kakalaya kɛ,

ale lo bena dagamu!

Ala ben'a sara diɲɛ kitilon na.

14Cɛɛ kɔbɔnin min ma kojugu kɛ,

n'a ma miirijugu mara a kɔnɔ Matigi kosɔn,

ale fana bena dagamu!

A bena saraɲuman sɔrɔ a ka tilenninya kosɔn,

a bena yɔrɔɲuman sɔrɔ Matigi ka soo kɔnɔ.

15Mɔgɔtilennin ka baara tɔnɔ ka ɲi kosɔbɛ.

Lɔnniya be i ko yiri, lili ɲanaman be min na.

16Nga ɲamɔgɔdenw ka koo tena yiriwa,

deen minw sɔrɔla ɲamɔgɔya la,

olu bena tunu.

17Hali n'u ye sijan sɔrɔ, u tena jati,

u ka kɔrɔya waati la, u bena dɔgɔya le sɔrɔ.

18N'u sara joona fana, jigi te u fɛ,

u dusu tena saalon kitilon na.

19Kojugukɛla laban ma ɲi dɛ!

ALA KA KUMA

© 2008 Alliance Biblique du Burkina Faso

More Info | Version Index