Search form

Lɔn 4

1Mɔgɔ ka to dentanya la ka kɛ mɔgɔtilennin ye,

o ka fisa.

Mɔgɔw hakili be to o tigi tɔgɔɲuman na,

bari Ala ni mɔgɔw sɔnnin be o la.

2K'a to sii la, mɔgɔw b'a ladege,

n'a tununa, nimisa b'u minɛ.

Sini, sesɔrɔfugulan y'a ta ye

bari a ye see sɔrɔ a ka bondori la

a ye min kɛ ka fɛɛn ɲanaman sɔrɔ.

3Alaɲasiranbaliw deenw n'u caya bɛɛ,

olu tena foyi ɲa.

U be i ko yiri min liliw ma ɲi,

u liliw tena don ka ɲa,

u juu tena barika sɔrɔ.

4Hali n'u ye furaburu bɔ waati dɔ kɔnɔ,

fɔɲɔ bena u yuguyugu ka bɔ

bari u lili ma don ka ɲa.

Fɔɲɔba mana fiyɛ, u suun be bɔn.

5U bolow be kari n'o ma kɔgɔ,

u deenw te mɔ, fɛnkuntan lo,

u te se ka dumu, u te foyi ɲa.

6Kitilon na, deen minw sɔrɔla kakalaya la,

olu bena kɛ seereyafɛn ye

u wolobagaw ka juguya kosɔn.

Mɔgɔtilennin sakun joona

7Mɔgɔtilennin kɔni bena lafiɲɛ sɔrɔ,

hali n'a sara a denmisɛnya waati la.

8Kɔrɔbaya be na ni boɲa ye,

sijan sɔrɔ dama t'a di mɔgɔ ma.

9Lɔnniya ye kunsigigwɛ ye.

Jogoɲuman ye kɔrɔbaya ye.

Enɔki ka koo

10Fɔlɔfɔlɔ, mɔgɔ dɔ tun be yen,

a koo diyara Ala ye, a y'a kanu.

A tun siginin be kojugukɛlaw cɛma,

Ala y'a ta ka bɔ yen ka taga n'a ye yɔrɔ wɛrɛ.

11A y'a ta janko kojugu kana se k'a kunnacɛn.

A y'a ta waasa namaranko kana don a kɔnɔ.

12Bari, kojugu be kɛ sababu ye koɲuman te ye.

Nigɛjugu be mɔgɔɲuman ka koo nagasi.

13O tigi ka koo dafara waati dɔɔni dama

i ko a tun ye sijan sɔrɔ.

14A taamacogo diyara Matigi ye,

o la, a y'a bɔsi ka bɔ diɲɛjugu nin na joona.

Mɔgɔw y'o ye, u ma o faamu.

U ma miiri a la,

15ko Ala be ɲumanya kɛ a ka mɔgɔwolomaninw ye,

ko a be makari u la,

ko a b'a ka mɔgɔw tanga.

16Mɔgɔtilennin ka saya be jalaki ben

Alaɲasiranbali ka sijan kan.

Denɲuman mana ban joona,

o be mɔgɔkɔrɔbajugu maloya.

17Mɔgɔjuguw be lɔnnikɛla ka saya filɛ,

nga Matigi ye min latigɛ a ye,

u t'o faamu.

Matigi y'a bila yɔrɔ sutaranin na kuun min na,

u t'o faamu.

18U mana o koo ye,

o be kɛ lɔgɔbɔri ye u fɛ,

nga Matigi bena yɛlɛ u ma.

19U mana sa, mɔgɔw tena u suuw jati.

Maloya bena kɛ u ta ye lahara kudayi.

Ala bena u fili duguma,

u kuun le bena kɔn fɔlɔ,

fɔta tena sɔrɔ u fɛ.

A bena u yuguyugu haali fɔɔ k'u bɔ u nɔɔ na.

U bena halaki kosɔbɛ ka to yen fɔɔ laban na.

U bena to tɔɔrɔ la,

u tɔgɔ bena tunu.

Alaɲasiranbaliw ka nimisa

20Alaɲasiranbaliw ka hakɛ jatituma mana se,

u hakili ɲagamininba le be gwɛrɛ.

U ka kɛwaliw yɛrɛ ben'a yira

k'u ka kan ni jalakili ye.

ALA KA KUMA

© 2008 Alliance Biblique du Burkina Faso

More Info | Version Index