Search form

Lɔn 5

1O tuma na, mɔgɔtilennin bena lɔ,

a hakilisigininba k'a ɲaa sin a tɔɔrɔbagaw ma,

minw tun b'a lɔgɔbɔ a cɛsiriwaati la.

2U ɲaa mana la a kan,

u bena yɛrɛyɛrɛ siranyakojugu fɛ.

U bena kabakoya ka dama tɛmɛ a kisiko la.

3U kamana gwannin bena to ka ŋunan.

U bena nimisa ka to k'a fɔ ɲɔgɔn ye ko:

4«Haan! An tun be yɛlɛko min na, ale lo!

An tun be min dɔgɔya, ale lo!

An tun ye nalomanya kɛ k'a jati fatɔ ye.

An y'a ka saya jati maloyako ye.

5A kɛra di a be jati Ala deenw dɔ ye?

A kɛra di a niin be Ala ka mɔgɔw cɛma?

6O la, an y'an yɛrɛ bɔ tiɲɛsira la,

tilenninya ma se ka yeelen bɔ an ye,

tile ma bɔ anw ye fɔlɔ!

7An ye tilenbaliya sira ta, bɔnɛsira,

fɔɔ k'an wasa.

An ye kongokolon cɛtigɛ,

sira tun te yen.

O bɛɛ n'a ta, an ma Matigi ka sira lɔn fewu!

8An ka yɛrɛboɲa ye mun ɲa an ye sa?

An ye nafolo min kɛ k'an yɛrɛ wanso,

o ye mun ɲa an ye sa?

9O bɛɛ tununa i ko suma,

i ko kibaru min wangolabaga be bolila.

10A kɛra i ko kurun be jii ɲɔti ka tɛmɛ cogo min na,

a nɔɔ te to.

A kɔfɛla t'a nɔɔ to.

11A kɛra i ko kɔnɔ tɛmɛtɔ sanfɛ.

A tɛmɛnɔ te ye a taanin kɔ.

A be fɔɲɔ gosi n'a gaman ye,

k'a cɛtigɛ ni fanga ye,

a nɔɔ te ye a tɛmɛnin kɔ.

12A kɛra i ko biɲɛ min bonna,

a be fɔɲɔ cɛtigɛ!

O be tila ka tugu ɲɔgɔn na

fɔɔ biɲɛ tɛmɛnɔ te se ka ye fewu.

13A kɛra ten, anw wolotɔ,

an tunutɔ.

An ma se ka kɛwaliɲuman si nɔɔ to an kɔfɛ.

An ka juguya y'an ta cɛn.»

14Tiɲɛ na, Alaɲasiranbali jigi be i ko sumanɲaga,

fɔɲɔ ye min ta.

A be i ko jii kankan,

fɔɲɔba be taga ni min ye.

A be tunu i ko sisi, fɔɲɔ kɔnɔ.

A koo be bɔ mɔgɔw hakili la

i ko tile kelen lonan tɛmɛko.

Mɔgɔtilenninw ka boɲa nata

15Mɔgɔtilenninw kɔni be to yen kudayi.

U ka sara be Matigi bolo,

Fɛɛn bɛɛ kuntigi bena janto u la.

16A bena masafugulan halala d'u ma.

A ben'a ɲanaman d'u ma.

Bari, a bolo barikaman b'u tanga,

a b'a bolo kɛ k'u sutara.

17A ka jijali le bena kɛ a ka kɛlɛkɛminan ye.

A bena o di a ka danfɛnw ma,

waasa k'a juguw kɛlɛ.

18A ka nigɛduloki,

o ye tilenninya ye.

A ka nigɛfugulan,

o y'a ka kiti tilennin ye.

19A ka sesɔrɔ nigɛkunbɛnnan,

o y'a ka ɲumanya ye.

20A ka murujan dadiman,

o y'a ka dimikojugu nin ye.

Diɲɛkɔnɔfɛnw bena far'a kan ka nalomanw kɛlɛ.

21Kala labɛnninkoɲuman be biɲɛ bon

ka ɲa cogo min na,

sanmanamana bena bɔ sankaba la ten

ka tilen a taayɔrɔ la.

22Sanbɛrɛ bena jigi u kan ni barika ye

i ko bɛrɛbonnan ka bɛrɛ.

Kɔgɔji bena wiliwili u kama ni fanga ye,

baji bena u tunu, a tena hinɛ yɛrɛ.

23Fɔɲɔba dɔ bena wili u kama.

A bena u yɛrɛkɛ i ko sanfɔɲɔ.

Juguya le bena dugukolo bɛɛ kɛ lakolon ye.

Kojugukɛ bena masaw bɔ u ka fanga la.

ALA KA KUMA

© 2008 Alliance Biblique du Burkina Faso

More Info | Version Index