Search form

Lɔn 8

1A ka fanga be bɔ diɲɛ daan dɔ nin na

ka ta'a bila kelen na.

A be fɛɛn bɛɛ mara cogoɲuman na.

Lɔnniya koo diya i yɛrɛ ye

2Lɔnniya le koo diyara ne ye,

ne y'a ɲini kabini n kanbelentuma.

Ne jijar'a sɔrɔko la k'a kɛ i ko n ka muso.

Ne jarabir'a ka cɛɲa la.

3A ni Ala le be ɲɔgɔn fɛ,

o le y'a ka kunkɔrɔta ye.

Fɛɛn bɛɛ kuntigi b'a kanu.

4A be Ala ka gundow kala ma.

A b'a ka kokɛtaw latigɛ.

5Nafolo kɔni ka ɲi diɲɛ kɔnɔ,

nga foyi man fisa ni lɔnniya ye.

Ale lo ye fɛɛn bɛɛ sababu ye.

6N'an ko hakilitigiya be fɛɛn ɲa,

lɔnniya ma tɛmɛ a kan wa?

Min sababu la fɛɛn bɛɛ be yen.

7Tilenninya ka d'i ye wa?

Sɔnɲuman le y'a ka baara ye.

Bari, a be mɔgɔ dɛmɛ yɛrɛminɛ,

ni hakilitigiya la,

ani tilenninya ni jagwɛlɛya la,

Foyi te yen min be mɔgɔ nafa ka tɛmɛ o kan.

8I b'a fɛ ka koo caaman ye ka nafa sɔrɔ u la wa?

Lɔnniya be kunu lɔn,

ka siniko yira.

A be kuma kɔrɔ lɔn,

ka kuma kɔnɔmanw kɔrɔ fɔ.

A be kɔn ka taamasiɲɛw ni kabakow ye.

A be waati nata koo lɔn.

Masacɛ ka ɲi ka lɔnniya sɔrɔ

9O la, ne y'a latigɛ ko

lɔnniya bena kɛ ne taamaɲɔgɔn ye n sii bɛɛ la.

Bari ne y'a lɔn ko a bena ladiliɲuman di ne ma,

a bena ne dusu saalon dusukasilon ni tɔɔrɔlon na.

10Ne tun b'a fɔra n yɛrɛ kɔnɔ ko ale barika la,

ne bena tɔgɔ sɔrɔ jamayɔrɔw la.

Hali ne ni n ka denmisɛnya,

mɔgɔkɔrɔbaw bena ne jati.

11Kiti tigɛyɔrɔ la,

u ben'a ye ko ne be koo lɔn.

N ka koo bena jamanakuntigiw kabakoya.

12Ni ne jera, u bena to ka kɔnɔni kɛ,

ni n ye kuma daminɛ, u b'u tulo malɔ kosɔbɛ.

Ni ne ka kuma be jaɲana,

u b'u bolo la u daa la ka kaba.

13Ne ka koo tena ban,

ne kɔfɛmɔgɔw tena ɲinɛ ne kɔ abada ale sababu la.

14Ne bena siyaw kuntigiya kɛ.

Jamana mɔgɔw bena kolo ne ye.

15Masa farimanw mana ne koo mɛn,

u jaa be tigɛ le.

N bena n ka ɲumanya yira jama na,

n jaa bena gwɛlɛya kɛlɛyɔrɔ la.

16N mana don soo,

n be lafiɲɛ ale lɔnniya le kɔrɔ.

Bari, ale ka jɛnɲɔgɔnya te baasi se mɔgɔ ma.

Tɔɔrɔ te a ka teriya la,

diya ni diya dɔrɔn lo.

Lɔnniya daliko

17Ne y'a jati minɛ n yɛrɛ ma,

k'a lɔn n dusu la ko

lɔnniya be mɔgɔ jigi tugu sini sɔrɔko la.

18A ka teriya be na ni nisɔndiya dafanin ye.

A ka baara be na ni nafolo banbali ye.

K'a yɔrɔ filɛ tuma bɛɛ,

o be na ni hakilitigiya ye.

K'a kɛ i barokɛɲɔgɔn ye,

o be tɔgɔ di.

Ne tora k'a ɲini yɔrɔ bɛɛ

k'a kɛ n taamaɲɔgɔn ye.

19Ne wolocogo tun ɲana.

Ne kɛra sɔnɲumantigi ye.

20Walima, ne ka ɲumanya kosɔn,

ne ye farisogoɲuman sɔrɔ.

21K'a sɔrɔ ne y'a lɔn ko

ne tena lɔnniya sɔrɔ ni Ala ka dɛmɛ tɛ.

Min ye fɛnɲuman dibaga ye,

ne b'o lɔn,

o fana ye hakilitigiya taamasiɲɛ ye.

O la, ne ye n ɲaa sin Matigi ma k'a dali.

Ne y'a fɔ ni n dusu bɛɛ ye ko:

ALA KA KUMA

© 2008 Alliance Biblique du Burkina Faso

More Info | Version Index