Search form

Zak 13

1«O waati la, jii bɔyɔrɔ dɔ bena dayɛlɛ Dawuda ka somɔgɔw ni Zeruzalɛmukaw ye, min bena kɛ u ka hakɛ n'u ka konɔgɔninw fura ye.»

Kira galontigɛlaw fagako

2Masaba, Setigi ko: «O waati la, ne ben'a kɛ joow tɔgɔw be tunu ka bɔ jamana kɔnɔ. U tɔgɔ tena wele tugu. Ne bena kira galontigɛlaw gwɛn, ka joko nigɛ bɔ mɔgɔw la. 3O tuma na, ni mɔgɔ dɔ ye kirayakuma fɔ, a yɛrɛ facɛ n'a bamuso le ben'a fɔ a ye ko: ‹I ka kan ka faga, bari i be galon le tigɛra Masaba tɔgɔ la.› O la, n'a ye kiraya kɛ, a yɛrɛ wolofa n'a yɛrɛ woloba le ben'a sɔgɔ ni muru ye. 4O waati la, kira kelen kelen bɛɛ bena maloya a ka kirayako la, u tena kiraya fani don tugu ka mɔgɔw namaran. 5U bena to k'a fɔ ko: ‹Ne te kira ye dɛ! Ne ye sɛnɛkɛla le ye, kabini n kanbelenman, foro be n fɛ.› 6N'u y'a ɲininga ko: ‹Nɔɔ minw be i disi la do?› A bena u jaabi ko: ‹Ne koo ka di minw ye, ne y'u sɔrɔ olu lo fɛ.› »

Masaba lɔnko

7- Masaba, Setigi ko:

«Wili ne ka sagadɛndɛbaga kama, murujan!

Wili ne baarakɛɲɔgɔn kama!

Sagadɛndɛbaga bugɔ,

sagaw be jɛnsɛn.

N bolo yɛrɛ bena se hali deenw ma.»

8Masaba ko:

«Jamana bɛɛ kɔnɔ,

mɔgɔw bena tilan saba,

tilan fila bena sa,

tilan kelen le bena to yen.

9O tilan kelen nin,

n bena o don tasuma kɔnɔ.

U be warigwɛ yelen k'a nɔgɔ bɔ cogo min na,

ne bena u kɛ ten.

Sanu be sɛgɛsɛgɛ cogo min na,

ne bena u ka koo sɛgɛsɛgɛ ten.

U bena ne wele,

ne bena u jaabi.

Ne bena u wele ko:

‹Ne ka mɔgɔw.›

Olu ben'a fɔ ko:

‹Masaba le ye an ka Ala ye.› »

ALA KA KUMA

© 2008 Alliance Biblique du Burkina Faso

More Info | Version Index