Search form

Deuteronomy 10

Moses-aam Akurtunqigtai Alerquutet

1“Tua-llu taum nalliini Ataneq qanertuq wangnun, ‘Pilinariaten malrugnek teggalqugnek manigcetellriignek, ciuqliigtun ayuqlukek, yaassiililuten-llu muragmek caqukakegnek. Nutaan mayurniartuten ingrimun ullaglua. 2Nutaan wii igarciqua taukugnun manigcimalriignun teggalqugnun igautellemnek ciuqliignun navvlerpet. Nutaan taukuk yaassiigmun ekniagken.’

3“Tua-i wii yaassiilillruunga muragagnek acacia-gnek teggalqugnek-llu mamcartellriignek ciuqliigtun ayuqellriignek, nutaan-llu mayurlua ingrimun taukuk teggalquk tegumiaqlukek. 4Taukugnun-llu teggalqugnun igartuq, ciuqlirmek igallerminek, qulnek alerquutnek, elliin Atanrem qanrutkellerminek elpecen̄un tuani ingrimi kenrem tungiinek quyungqallerpecen̄i; Nutaan-llu taillukek wangnun, 5tuigglua-llu ingrimek atrartua. Taukuk-llu igarviik ellillruagka yaassiigegnun piliallemnun; tua-i tuantaurtuk Atanrem alerquutekellratun.”

6(Israel-aam-llu yui ayagtut tuaken Jaakan-aam elakain nuniitnek Moserah-mun. Tuani Aaron-aaq tuquuq tuani-llu tungmagcimaluni, qetunraan-llu Eleazer-aam enii teguluku agayulirten͞gurrluni. 7Tuaken-llu ayagtut Gudgodah-mun, tuaken-llu Jotbathah-mun, nunamun mel'ilriamun. 8Taum nalliini Atanrem allakallrui Levi ilai-llu ayagacisten͞gusqelluki Akqutem Yaassiigtaanek, kevgiureskelluki ellminun agayulirten͞guluki, at'mikun-llu atawaqercecilaasqelluki. Makut-llu mat'um nalliini cali caliaqait. 9Taumek Levi ilani-llu akurtullrunrilnguut nunamek allat ilakellriit pillruciicetun; akurtullruameng piunarqucimek Atanrem agayulirtekarkauluki, Atanrem Agayutevci akqellruciatun.)

10“Uitallruunga-llu ingrimi ernerni unugni-llu yuinaagni malrugni ciuqlirmi pillrucimtun. Atanrem-llu niitellruanga cali tuani, puinriryuumiirulluci. 11Atanrem-llu qanrutaanga, ‘Upluten ayii ciunratgun yuut, ayagnaurtut piksagucarturluku nuna akqutkelqa ciuliaritnun cikiutekciqniluku.’

Agayutem Pisqutii

12“Watua Israel-aami, qaillun Atanrem Agayutem pisqaten? Qigcikesquq Ataneq Agayutsi, pisqutni atuusqai, kenkesqelluni kevgiuresqelluni-llu ircaqurpeciuggun yuucirpeciuggun-llu tamalkirrluci, 13niisngaluki tamalkuita alerquutai. Wiinga cikiutekanka elpecen̄un unuamek piluaqautekesqelluki. 14Atanrem pikngaki quyinkacagaungraata qiliit; nuna-llu cali elliin pikaa ca-llu tamalkuan nunam qaingani uitalria. 15Tau͡gken Atanrem kenkellruamiki cakneq ciuliaci cucukaaci allat pivkenaki, cali maa-i cucukek'ngaqluci yukaaci. 16Kitaki wak'nirnek niisngakiciu Ataneq, pamaitenrirluci. 17Tua-i Ataneq Agayutsi piunruuq tamaitni agayutni pinilegni-llu, angtataituq artuqaunani niisnganarqellriaruluni-llu. Ingluarvikek'ngaituq akilirtelluni-llu camek pingaunani. 18Elluarrluteng aulukumanritlerkaat murilkelaraa elliraat aipainret-llu; kenkelarai allanrulriit nunamten̄i, cikiraqluki neqkaitnek atu'urkaitnek-llu. 19Taumek kenkiciki allanrulriit, tua-i-wa elpeci-llu allanrullruavci Egypt-aami. 20Takaqiciu Ataneq Agayutsi agayuaqluci elliinun kiingan. Piciuluci elliinun, ukvernarcarikuvci-llu elliin atrakun tau͡gaam piaqluci. 21Nanrarciu ellii, Agayutkarci. Elpeci tungaunaci tangellruaci angelriit irr'inarqelriit caliallri elpeci pitekluci. 22Ciuliaci ayallermeggni Egypt-aamun yuinaat pingayun qulnek cipluku (70) tau͡gaam amllertallruut. Tau͡gaam maa-i Atanrem Agayutevci amllerivkaraaci agyatun qilagmi pitariluci.

Yupik Bible

Yupik Bible © 2012 American Bible Society

More Info | Version Index