Search form

Deuteronomy 12

Atauciq Agayularvigkaq

1“Makut maa-i picirkiutet niisngaarkaci unguvarpeci taktaciatun uitallerpecen̄i nunami Atanrem Agayutiita ciuliarpeci cikiutekaani. 2Nunami tamaani piksagutarkarpecen̄i piunriqiciki tamalkuita yuut agayutmeggnun agayuvikelallrit ingrini, qemini, napat-llu cungagcetellriit aciatni. 3Navguqiciki ekuaviit ciqumlluki-llu qigcikekait teggalqut napartat. Ekualuki-llu alailutai agayutnguam Asherah-m cali-llu piqertuarluki iqulluki agayutnguarit, agayunqiggviirluki tamakut nunaitni.

4“Agayuksaunaci Atanermun Agayutevcen̄un tamakut yuut agayulauciicetun agayutmeggnun. 5Nunautaita ilakutellriit akunlevcen̄i iliitnek Ataneq cucuklirciquq ataucimek ullalararkarpecen̄ek ciuqamini agayuvigkarpecen̄ek. 6Tuavet ekuagarkat elliiteci allat-llu taitelarciqaci: qulngurutet elliitet, cikiutet-llu akqutkelci Atanermun, piyuumirluci elliiteci, irniqarraarutait-llu kuluvautevci qusngiyagautevci-llu. 7Tuani ciuqerrani Atanrem Agayutevci, atawaqautnek cikirtevci, elpet ilaten-llu nerciquci assilrianek caliarpeciuggun unakellerpecen̄ek.

8“Tauna tuaten pillerkarci tekiskan, maa-i ayuqucirci ayuquciqsaqunaciu. Una-wa tekilluku assiryukelci umyuarpeciuggun aturluku piavci. 9Tua-i-wa tuaten pilriaci iteqsailavciu cali nuna Atanrem Agayutevci cikiutekaa elpecen̄un, uitanqegciluci uitavigkarci. 10Jordan-aaq Kuik qeraquvciu Atanrem nuna tamana elpecen̄un nunakevkarciqaa, tamakumiunguvkarluci. Elliin inglukestevcen̄un pivkarngaitaaci, uitanqegciluci-llu tamaanciiquci. 11Ataneq cucuklirciquq ataucimek agayuvigkamek ellminun, tuavet-llu taitelarciqaci elliinun tamalkuita wii alerquutekellrenka: ekuagarkat elliiteci allat-llu, tamalkuita qulngurutet elliitet-llu, cali cikiutet akqutkelci Atanermun. 12Nunaniryukici tuani ciuqerrani, ilakluki irniaci, kevgaci, Levite-at-llu uitalriit nunavcen̄i; tua-i-wa Levite-at nakmiin pimeggnek nunautengqerrngailata. 13Elliitnek-llu ekuagingaituci piciatun piyullerpecen̄i. 14Tau͡gaam ekuagiarkauguci ataucimi Atanrem cucukellrani ilakellriit ilavci nunautiitni. Tuani kiingan tau͡gaam ekuagarkanek ekuagilarciquci, cali-llu allat piarkat piluki alerquutekellrenka elpecen̄un.

15“Tau͡gaam tuquciyugngauci nerluci-llu ungungssiutevcen̄ek nunavcen̄i piyugtacirpecetun Atanrem Agayutevci cikiumataciatun. Tamarpeci menuliumang'e'rpeci menuileng'e'rpeci-llu neryugngauci, tuntut kemgitnek nerlaucirpecetun. 16Tau͡gaam elpeci ner'arkaunritarci augat; nunamun kuv'arkaugarci mertun. 17Ca-llu elliiteklerci nerumaarkaunrituq uitavigpecen̄i: mukaarkaunge'rmi, wall'u wine-aq, wall'u olive-aat uquat, wall'u ungungssiutevci irniqarraarutait, wall'u cikiutet akqutkelci Atanermun, wall'u piyuumirluci elliiteci, wall'u alla caungraan elliitekumalria. 18Tau͡gaam neryugngaaci ciuqerrani Atanrem Agayutevci pivigkami cucukellrani, elpet qetunraan paniin-llu, kevgaten angutet arnat-llu, Levite-aq-llu nunani uitalria. Angniutekiki-llu tamalkuita elpet calialten. 19Pinritevkenak-llu nallungualarngaitaten Levite-at unguvarpet taktaciatun nunavni.

20“Tua-llu Atanrem Agayutevci ilakaku nunautsi, akqellrucimitun, kemegmek nerlarciquci piyungaqavci. 21Tauna-llu cucukumalria agayuvigkaq yaaqsissiyaakan, tua-i piyugaqavci tuqucilarciquci piciatun kuluvagmek wall'u qusngiyagarmek Atanrem elpecen̄un cikiutekellrinek, nerluci-llu tamakunek nevcen̄i qanrutellrucimtun. 22Kina imna menuliumang'e'rmi menuileng'e'rmi-llu nerciquq kemegmek, nerlaucirmitun kemganek tuntum. 23Neryaqunaci tau͡gaam kemegmek augtuumaan, tua-i auk unguvakngaku, ner'arkaunritarci-llu tamana unguvaulria kemegmun tapqulluku. 24Auk ner'arkaunritarci; tau͡gaam kuv'arkaugarci nunamun mertun. 25Alerquun una atuquvciu Ataneq ilukegciciquq, assirluci-llu piurciquci kinguveci-llu. 26Taiciki tuavet cucukumalriamun agayulallerkarpecen̄un elliitet cikiutekaci-llu akqutkumalriit Atanermun. 27Ekuagiciki-llu tuani qamlluteng ekuamaarkaulriit Atanrem ekuaviani. Ekuagiciki-llu cali tamakut kemgit ner'arkaci kuvluku-llu augat ekuavigmun. 28Niisngaciki pinritevkenaki tamalkuita alerquutellrenka elpecen̄un, assirluci piurniartuci kinguveci-llu ukanirpak, tua-i-wa tuatnakuvci piciulria aturciqngavciu ilukegcitkekii-llu Atanrem Agayutevci.

Aarcirtuun Agayutnguanun Agayullerkamun

29Atanrem Agayutevci piunrirciqai angayuqauvilget nuniitnun itquvci, yirciqerci uitaviksagulluku-llu. 30Atanrem piunriumarikaki tamakut angayuqauvilget, mulngakekici maligtaqungyuaci agayuyarait, tuaten pillerkaq aarnaqngan. Paqnayugluci-llu kangiituqsaunaku qaillun agayulallrat agayutmeggnun, umyuarteqluci elpeci-llu agayulauciicetun pinaluci. 31Agayuyaqunaci Atanermun Agayutevcen̄un tamakut yuut agayulauciicetun agayutmeggnun, tua-i-wa agayuaqameng agayutmeggnun ca tamalkuan Atanrem eq'ukqapigeskii atulaatgu; paniteng tuaten wall'u qetunrateng ekuavimeggni ekuagaqluki.

32“Alerquutekellrenka tamalkuita atuqiciki; ilangaitaci-llu wall'u ilangarrluki.

Yupik Bible

Yupik Bible © 2012 American Bible Society

More Info | Version Index