Search form

Deuteronomy 13

1“Prophet-aam wall'u qavangunek nalqigcitulim aipaagni akqeciqaaten irr'inarqelriamek, 2tuaten pillermikun eguaqurnaluten agayulangellerkarpenun agayutnun ciungani ciktaarvikeksailkevnun. Akqutkellra tamana piciurtengraan 3niicugniyaqunaku tauna. Atanrem Agayutvet tauna aturluku naspagaaten, nallunrirnaluku kenkucini elpenun ircaqurpegun tamalkirrluten. 4Maligtaquu Ataneq qigcikluku-llu; niisngau alerquutai-llu aturluki; agayuaqluten piciulriaruluten-llu elliinun. 5Tau͡gaam tuquski qavangunek nalqigcitulit prophet-aat-llu qanrutesteten Ataneq ingluliuresqelluku, imna Egypt-aamek anutestellerci tuani teguarullerpecen̄i. Tuaten ayuqellria yuk umyuarrluuguq, iqlutmurutengnaqaaci yuullerkarpecen̄ek Atanrem alerquuciatun. Tauna tuqutnarquq assiitellria au͡g'arluku akunlevcen̄ek.

6“Tua-i-llu-wa anelgutkeng'e'rpeni, qetunraq'nge'rpeni, panikeng'e'rpeni wall'u nuliarpet kenkek'ngarpet yugnikek'ngarpet-llu, aassaqluni eguaqurciqaaten agayusqelluten allanun agayutnun, elpeci wall'u ciuliarpeci agayuvikeksailkevcen̄un. 7Iliita-llu unayaqciqaaten agayusqelluten agayutaitnun canivni uitalriit, wall'u agayutaitnun yaaqvani uitalriit. 8Tau͡gaam unakevkaryaqunak; niicugniyaqunaku-llu. Takumcuksaqunaku wall'u yurnakluku wall'u iirluku tuatnallra. 9Tau͡gaam tuqutarkaugan! Ciumek elpet teggalqumek milqaqiu, allanun-llu cali miluquvkarluku. 10Teggalqunek miluquluku tuquciu! Iqlutmurutengnaqngaci maligtaqullerpecen̄ek Ataneq Agayun, anutestellerci Egypt-aamek teguarullerpecen̄ek. 11Tamana-llu tuaten pillerci niiciiqaat Israel-aam yuin, alingluteng-llu tuaten ayuqellriamek assiilngurmek pinqiggngaitut.

12“Tua-llu uitainanerpecen̄i nunani Atanrem Agayutevci cikiutekellrini niiciiquci, 13yuut ilait yurrluulriit angayuqauvigpeci iluani nunalgutmeggnek iqlutmuruciniluki, agayulangevkarluki agayutnun ciungani piksailkevcen̄un. 14Ilungluten apqaurciquten kangingengnaqluku tamana; piciullinikan tamana, tuaten ilumun pilriartangqellinikan, 15tuquciiqaci yuut tamalkuita tuani nunani ungungssiutait-llu tamalkuita. Piunriqiciu tauna nuna tamalkuan. 16Quyurrluki-llu tamakut yuut akluit nunat qukaatnun. Nutaan ekuavkarniarci nuna tauna iluanelnguut-llu tamalkuita elliitekluki Atanermun Agayutevcen̄un. Imumaarkauguq akwarpak, naparcimanqiggngaunani-llu. 17Tegucaqunaci-llu pikarpecen̄ek tamaaken piunriumaarkanek, nutaan Atanrem eq'uqertellni tunuciiqaa takumcukluci-llu. Takumcukciqaaci yugyangevkarluci-llu ciuliaci akqellrucimitun, 18niisngakuvciki tamalkuita alerquutai cikiutekellrenka elpecen̄un unuamek, pisqutii-llu maligtaquluku.

Yupik Bible

Yupik Bible © 2012 American Bible Society

More Info | Version Index