Search form

Deuteronomy 14

Tuquiyarami Yagyaraq Inerquutngulria

1“Elpeci yukaaci Atanrem Agayutevci. Taumek tuquigaqavci elpecen̄ek kilirturyaqunaci wall'u qauraci asmeggluki allat yuut pilauciicetun. 2Atanrem Agayutevci pikaaci; elliin cucukellruaci nakmiin yuknaluci akuliitnek yuut amlleqapigtellriit nunami.

Menuulriit Menuilnguut-llu Ungungssit

3“Neryaqunaci camek Atanrem qanrutkellranek menuulriaruniluku. 4Makut maa-i nerlarciqaci ungungssiaraat: kuluviit, qusngit, qusngirngalnguut, 5tuntut, yuilqurmiutaat qusngit qusngirngalnguut-llu, tunturngalnguut antelope-at, 6allat-llu ungungssiaraat avgumalrianek cetumqulget cali neqmeggnek tamuanqigtetulit. 7Ca ungungssiar nerumangaituq tau͡gaam tamakut avgumalrianek cetumqulget cali-llu igglermeggnek tamuanqigtetulit. Makut maa-i ner'arkaunrilkeci: ungungssit qulugtellriit, qayuqegglit, uiret-llu. Menuurrnarqelriaruluteng pimaut tamuanqigtelange'rmegteki nerelteng, cetumqurrit avgumanrilata. 8Cali-llu sitiinkaat, cetumqungqeng'e'rmeng avvingalrianek tamuanqigcuilatki nerelteng. Makut ungungssit neryaqunaciki agtuqsaunaki-llu temait nalaaqata.

9“Nerlaqici neqnek qeltelegnek nakrut'legnek-llu, 10tau͡gaam mermi uitalria nakrutailnguq qeltailnguq-llu nerngaitarci; menuulriaruuq elpecen̄un.

11“Neryugngauci-llu piciatun menuilngurnek yaqulegnek. 12-18Tau͡gaam makut maa-i yaqulget ner'arkaqenrilkeci: miterviit, kenriiret, qakurtat, eskaviat, tulukaruut, naruyat, unuirat-llu. Cali allat makut yugtun atrilnguut: buzzard-aat, vulture-aat, ostriches-aat, stork-aat, heron-aat, pelican-aat, hoopoes-aat, bat-at.

19“Tamarmeng yaqungqellriit ciissit menuulriaruut; neryaqunaciki. 20Tau͡gaam menuilngurnek ciissinek neryugngauci.

21“Neryaqunaciu ungungssiar ca piciinaku tuqulleq. Allanret tau͡gaam nunavcen̄i uitalriit neryugngaat tauna, elpeci-llu allanernun tunyugngaluku. Tau͡gaam elpeci Atanrem Agayutevci pikaaci.

“Keniryaqunaciu piyagaq qusngiyagaq qusngirngalnguq-llu aaniin milganek mirluku.

Picirkiutii Elliiyaram Qulngurutnek

22“Allakarilaqici qulngurutaitnek naucetaarpeci allrakut tamalkuita. 23Nutaan-llu ayagluci tuavet Atanrem Agayutevci cucukellranun ellminun agayulaasqelluci. Tuani-llu ciuqerrani nerluci qulngurutaitnek mukaarkat, wine-at, olive-aat uquit, irniqarraarutait-llu kuluviit qusngiyagaat-llu. Waten pilaqici elitniarci qigciklerkaa kesianek Atanrem Agayutevci. 24Tauna-llu cucukumalria agayularvigkarci nunavnek yaaqsissiyaakan ayaucikuvet tuavet naunrarnek Atanrem atawaqautainek elpenun, waten pikina: 25Tunkiki naunrauteten akiit-llu ayaulluki tuavet cucukumalriamun agayuvigmun. 26Taukut akit aturluki kipuskina camek piyullerpenek — kemegmek, wall'u wine-amek wall'u allamek taangiqnarqelriamek — nutaan-llu tuani ciuqerrani Atanrem Agayutevci ilaten-llu nerkiciki nunaniryugluci.

27“Levite-at tau͡gaam nalluyagusngaitaci uitalriit nunavcen̄i, nunamek avgucimallrunrilata. 28Allrakut pingayuurtaqata qulngurutait naucetaarpeci iluvautelarciqaci qemaggluki-llu nunavcen̄i. 29Makut neqkat Levite-at pikaqait nunautailameng, allanret-llu cali-llu elliraat aipainret-llu nunavcen̄i uitalriit. Aqvat'larniartut enuqairulluteng. Waten pikici Atanrem atawaqercetniaraa callerci tamiin.

Yupik Bible

Yupik Bible © 2012 American Bible Society

More Info | Version Index