Search form

Deuteronomy 15

Allrakut Malrunelgurutiit

1“Nangellrani allrakut malrunelgurutiita perrilarciqaci yuut elpecen̄i akiilnguit. 2Waten pimalarciquq: Kina navriskengellrukuni Israel-aarullgutminun perrirciqai tamakut akiilnguut. Akiilnguit tamakut tegungnaqngaitai, tua-i-wa Atanrem-llu elliin qanrutekngaku au͡gaumaluku. 3Allaneq akiilnguinek elpeni akilicivkarciqan, tau͡gaam nunavni yuullguten akiilngungqerqan elpeni akilicivkarngaitan.

4Atanrem atawaqerceciiqaaci tuani nunami cikiutekamini, arrsaulriamek-llu ilangqerrngaunaci 5niisngakuvciu aturluki-llu tamalkuita alerquutekellrenka elpecen̄un unuamek. 6Atanrem atawaqerceciiqaaci akqellrucimitun. Amlleret angayuqauvilget navrit'larciqaci akinek, tau͡gaam elpeci navralarngaunaci ellaitnek; cali amlleret angayuqauvilget ataniumaciqaci, tau͡gken elpeci iliita ataniumangaunaci.

7“Nunarraat iliitni nunami Atanrem cikiutekaani elpecen̄un ilavcen̄ek Israelite-artangqerqan enuqitellriamek, elpenek arcaqakluten ikayuryuumiicaqunaku. 8Tau͡gaam qunuvkenak navriskiu nurutellra cuqluku. 9Navricuumiicaqunaku-llu camek piyullranek akiilnguut perriryaraat canimellirniluku. Tuaten umyuarrliqlerkan murilkekiu. Navricuumiilkuvni qayagaurutkeciqaaten Atanermun, elpet-llu pinarqelriaruciquten. 10Cikiqiu nagutaunak qunuvkenak-llu, Atanrem atawaqercetnauraa callren tamalkuan. 11Israel-aat ilaitnek arrsaulriartangqerrlainalarciquq, enuqilluteng, taumek alerquramci qunuunaci pilaasqelluci tamakunun.

Teguat Auluklerkaat

12“Ilasi-llu Israelite-aq, angun wall'u arnaq, kiputeskan elpenun kevgaqesqelluni, pegciiqan kevgauvkarraarluku elpeni allrakuni arvinlegni. Allrakut malrunelgat tekiskan peggluku ayagceciiqan. 13Pegeskuvgu-llu ayagcecaqunaku nangrraan. 14Cikiqiu qunuvkenak tamakunek Atanrem atawaqautainek elpenun: qusnginek, mukaarkanek wine-anek-llu. 15Neq'akluku teguaruluci kevgaullerci Egypt-aami, Atanrem-llu teguarunrirtelluci; taumek waniwa mat'umek alerquqemci.

16“Tau͡gaam kevgan ayagyuumiilkan kenekngamiten ilaten-llu, elpeni-llu uitayugcaliluni, 17nutaan elpet cingikellriamek tegulluten ciutiikun kapciqan ikirtuqamun assipiulluku; nutaan elpet kevgaqerkaurciiqan kesianek. Arnaq-llu kevgan tuaten cali piarkauluku. 18Kevgarpenek-llu pegcikuvet camek umyuarpegun cangayuutengqerrsaqunak, tua-i-wa allrakuni arvinlegni kevgiullruaten, akikillruluni akilirluku calistengqellerkami. Waten pikina Atanrem atawaqercetniaraa callren tamalkuan.

Irniqarraarutii Kuluviim Qusngim-llu

19“Allakarikici Atanermun Agayutevcen̄un pikevkarluki angucalut irniqarraarutait kuluviit qusngit-llu; calillerpecen̄i ukut kuluviit atularngaitaci, asmeggngaunaki-llu qusngit. 20Allamiaquaqan makut nerlarciqaci ilaci ilakluki Atanrem ciuqerrani tuani cucukumalriami agayuvigkami. 21Tau͡gaam tamakut ungungssiaraat natlugnengqerqata, ipiggliqluteng wall'u cikmiumaluteng wall'u allamek assinrilngurmek natlugnerluteng, elliiteksaqunaciki ekuagarkauluki Atanermun Agayutevcen̄un. 22Kingunerpecen̄i tau͡gaam neryugngaaci tamakut. Tamarpeci menuliumang'e'rpeci menuileng'e'rpeci-llu nerciquci tuntumek nerlaucirpecetun. 23Tau͡gaam augit nerngaitaci; tau͡gaam kuvciqerci nunamun mertun.

Yupik Bible

Yupik Bible © 2012 American Bible Society

More Info | Version Index