Search form

Deuteronomy 2

Allrakut Uitallrit Yuilqumi Kinertellriami

1“Tua-llu tuiggluta ayagyaqlirtukut yuilqumun tungiinun Red Sea-m, Ataneq wangnun qanrutellruciatun; ernerni-llu amllerni ayagaukut Mount Seir-am nuniini.

2Ataneq-llu wangnun qanertuq, 3‘Maani ayagalci ingrililriami amllerriuq; negetmun ayagci. 4Alerqurluki-llu yuut, waniwa ayakatartuci anelgutevci nuniitgun Esau-m qetunrain, Seir-ami uitalriit; ellaita-llu alikeciqaiceci. Taumek murilkekici cakneq. 5Ingluliryaqunaciki; tua-i-wa cikirngailamci nuniita iliinek, qang'a, it'garpeci aluatun angtangraan piyuavigkarpecen̄ek, cikiutekellruamku Mount Seir-aaq Esau-mun pikesqelluku. 6Kiputarkauguci neqnek ellaitnek akilirluci, neqkangqerrniartuci; mermek-llu cali akilirluku kiputarkauguci merkangqerrniartuci.’

7“Tua-i Atanrem Agayutevci atawaqercetellruaki tamalkuita unatevci caliarit; nallunritaa ayagallerci maaggun angelriakun yuilqukun; makuni allrakuni yuinaagni malrugni Atanrem Agayutevci nayullruaci; camek-llu enuqitellruvkenaci.

8“Tua-i cali ayagtukut, anelgutemten̄ek qetunrainek Esau-m Seir-ami uitalrianek, unilluku Arabah-m tumyaraa Elath-amek Eziongeber-aamek-llu. Caqirrluta-llu ayagluta tungiinun Moab-am yuilqurtaan. 9Ataneq-llu qanertuq wangnun, ‘Arenqiallugcecaqunaciki Moab-armiut, wall'u ingluliryaqunaciki anguyagkun, tua-i Wiinga cikirngailamci nunautiita iliinek, pikarpecen̄ek, cikiutekellruamku Ar-aq qetunrainun Lot-aam pikesqelluku.’” 10(Ukut Emim-aat tamaani uitallruut, yuut pinilriit yugyagluteng-llu Anakim-aatun-llu sugtutaluteng; 11qanrutkumalalliniut-llu Anakim-aatun Rephaim-aaruluki, tau͡gaam Moabite-at aterpagtelalliniit Emim-aanek. 12Horite-at-llu uitalallruyaaqut Seir-ami, tau͡gaam Esau-m kinguvrin tamaaken ayagcetellrulliniit. Piunrirluki-llu, nunaliluteng-llu uitavillratni; Israel-aat pillruciicetun nunaseng piksagutellermeggni, Atanrem ellaitnun cikiutekellra.)

13“Kitaki nangerrluci qerarciu kuiggaq Zered-aaq. Tua-i-llu wangkuta qerararput. 14Ayaggaanemten̄ek-llu Kadesh Barnea-mek, qerallemten̄un kuiggaq Zered-aaq allrakut yuinaq akimiaq pingayunlegnek cipluku (38) amllertaut, tamaq'apiarmeng yuulgutkellriit-llu, imkut-wa anguyiurtet piunrillruut, Atanrem akqutkellratun ellaitnun. 15Tua-i ilumun Atanrem inglulirturallruateng tamalkurmeng piunrirnatkaatnun.

16“Tua-i-llu anguyiurtet piunriumariata tuquluteng yugnun ilautellermeggnek, 17Ataneq qanertuq wangnun, 18‘Unuamek ayagarkauguci nuniitgun Moab-armiut Ar-aq tumekluku. 19Tekiteqataquvciki-llu nuniit Ammon-aam qetunrain, arenqiallugcecaqunaciki inglulirpek'naki-llu, tua-i Wiinga cikirngailamci iliinek nunautiita Ammon-aam qetunrain pikarpecen̄ek, tua-i-wa Lot-aam qetunrainun tunellruamku pikesqelluku.’”

20(Tamana cali nallunritaat nunakucia Rephaim-anun; Rephaim-aat tamaani uitallruyaaqut, tau͡gken Ammonite-at aterpagtelarait Zamzummim-aanek, 21yuut pinilriit yugyagluteng-llu, sugtutaluteng-llu Anakim-aatun; tau͡gaam Atanrem piunrillrui, tua-i Ammonite-at-llu ayagcelluki, nunaliluteng uitavillratni. 22Tuaten-llu Atanrem pillrui Edomite-at Esau-m kinguvri, Seir-ami uitalriit, piunrillerminiki Horite-at tua-i Edomite-at, ayagcetellruit, nunaliluteng-llu uitavillratni, cali tuanlluteng man'a erneq engelkarrluku. 23Tua-llu ukut Avvim-aat, uitalriit nunarrarni Gaza tekilluku, Caphtorim-aat taillret Caphtor-aamek, piunrillruit nunaliluteng-llu uitavillratni.)

24“Moab-aq pelluamteggu, Atanrem qanrutaakut, ‘Nangerrluci, ayagci, qerarluku kuignayua Arnon-aam; tangerrluku cikiutekaqa elpecen̄un Sihon-aq Amorite-aq atanra Heshbon-aam, nunautii-llu; piksagucarturciu, inglulirluku-llu anguyagmi. 25Mat'umi ernermi ayagnirlua qiliim acianelnguut yuut uluryayungevkarciqanka alingengevkarluki-llu elpecen̄ek, niiciiqait qanemcikumallerci uulegciiqut-llu alingluteng elpecen̄ek pitekluci.’

Israel-aam Cirlakaat Angayuqaq Sihon-aq

26“Tua-i wiinga ayagceciunga qanrarkanek yuilquanek Kedemoth-aam Sihon-aamun Heshbon-aam angayuqranun, unayaqluku uitanqegcitmek anguyagyuumiinii, qanerlua, 27‘Nunautevkun ayagcessnga; ayagciqua tumyaraq kiingan aturluku, tuiggngaitua tallirpitmun wall'u iqsulirnetmun. 28Tun'ivikeciqerpenga neqnek akinek akilirlua, neqkangqerrniartua, cikirlua-llu mermek akinek akilirlua, merkangqerrniartua; kiingan tua-i nunauten tumekluku ciutmurcugyaaqukut, 29Esau-m qetunraitun Seir-ami uitalriim Moabite-at-llu Ar-ami uitalriit pivkallruciacetun, qerarnatkamnun Jordan-aaq iterluku nuna Atanrem Agayutemta cikiutii wangkutnun.’

30“Tau͡gaam Sihon-aaq Heshbon-aam angayuqra kituusqumanrituq wangkutnun; tua-i-wa Atanrem Agayutevci asvairutevkallruani, cacetuvkarluku-llu ircaqrua, tunenaluku elpecen̄un.

31Ataneq-llu qanertuq wangnun, ‘Tangerrluku, ak'a tun'arkaurtaqa Sihon-aaq nunautii-llu elpecen̄un; teguciu, uitaviksagutniarci elliin nunii.’ 32Tua-llu Sihon-aaq malikluki tamalkuita yun'i an'uq anguyagnaluta nunam Joahaz-aam yaaqsinrilkiini. 33Atanrem-llu Agayutemta taitaa wangkutnun; cirlakellruaput-llu, qetunrai-llu tamalkuita-llu yui. 34Taum-llu nalliini tegullruaput tamalkuita nunarpautai piunriqapiggluki-llu tamalkuita nunarpiit, angutet, arnat mikelnguut-llu; iliit pinritevkenaku. 35Kuluvautait kiingita tegullruaput, tapqulluki nunarpagnek aklunek tegutellemten̄un. 36Aroer-aamek, mengliini Kuignayuan Arnon-aam uitalriim, nunarpagmek-llu uitalriamek kuignayugmi, Gilead-aaq tekilluku, nunarpagtaitellruuq artuq'ngamten̄ek; Atanrem Agayutemta taitellrui tamalkuita wangkutnun. 37Ammonite-at tau͡gaam nuniit mallellrunritarci, Kuigem Jabbok-aam cen̄ek, nunarpiit-llu qemililriami uitalriit, allat-llu Atanrem Agayutemta inerquutellri.

Yupik Bible

Yupik Bible © 2012 American Bible Society

More Info | Version Index