Search form

Deuteronomy 3

Israel-aam Cirlakaa Angayuqaq Og-aq

1“Tua-llu tuiggluta ayagtukut negetmun Bashan-aam tungiinun; Og-am-llu Bashan-aam angayuqran pairrsaagaakut, anguyagten̄i tamalkuita malikluki anguyagnaluta Edrei-ami. 2Tau͡gaam Atanrem qanrutaanga, ‘Aliksaqunaku; ak'a tunellruaqa yui-llu tamalkuita nunii-llu elpenun; ellii-llu piarkaugarci pillrucirpecetun Sihon-aaq angayuqrat Amorite-at, Heshbon-aami uitalriit.’

3“Tua-i Og-aq-llu, angayuqra Bashan-aam, tamalkuita-llu yui; Atanrem Agayutemta cikiutekaa wangkutnun; piunrirtaput-llu iliit anagcetevkenaku. 4Taum-llu nalliini tegullruaput tamalkuita nunarpautai, nunarpagmek-llu pitangqellruvkenani tegunritlemten̄ek ellaitnek— yuinaat pingayun nunarpiit, tamalkuan Argob-am nunii, angayuqauvia Og-am Bashan-aami. 5Tamarmeng-llu makut nunarpiit asvairqumallruut qertulrianek qacarnernek, ikirtuqanek, canirutnek-llu, amiiget kelucarcuutaitnek, cali tamakut ilangqerrluteng nunarrarnek amllernek asvairqutailngurnek. 6Piunrirteqapigtaput-llu, Sihon-aaq Heshbon-aam angayuqra pillrucimcetun, piunrirluki tamalkuita nunarpiit, angutet, arnat mikelnguut-llu. 7Tau͡gaam tamalkuita kuluviit nunarpiit-llu akluit tegullruaput uayaaqengaqluki.

8“Tua-i taum nalliini malrugnek Amorite-at atanregketnek, Jordan-aam yaatiini uitalriignek, tegullruarput nuna kuignayuanek Arnon-aam Mount Hermon-aaq tekilluku. 9(Sidonian-aat aterpagtelaraat Hermon-aaq Sirion-aamek, tau͡gken Amorite-at Senir-aamek piaqluku.) 10Tegullruaput tamalkuita nunat manigcelngurmi uitalriit, tamalkuan-llu Gilead-aaq, Bashan-aaq-llu cali tamalkuan, Salecah-q Edrei-aq-llu tekillukek, nunarpiit angayuqauviani Og-am Bashan-aami.”

11(Og-aq kiimi angayuqra Bashan-aam uitaqallruuq Rephaim-aat kingunritni; yuunrillermini-llu caquk teggliullruuk. Cali maa-i tangerrnarquk Rabbah-mi Ammonite-at nunarpiitni. Taktalutek it'ganret akimiarunritaraat tekicarpiarluki, iqtutalutek-llu it'ganernek arvinlegnek. Cali maa-i uitalutek Rabbah-mi Ammonite-at nuniitni.)

Yuullgutkelriit Nunalillret Jordan-aam Calaralirnerani

12“Taum nalliini nuna man'a piksagucamteggu, tunellruaqa Reubenite-anun Gadite-anun-llu nuna Aroer-aamek, mengliini Arnon-aam kuignayuan uitalriim, avga-llu qemililriim nunii Gilead-aam nunarpagtuumaan; 13ilii-llu Gilead-aam, tamalkuan-llu Bashan-aaq, Og-am atanruvia, tamalkuan nunii Argob-am, cikiutekellruaqa Manasseh-m yuin avgitnun.” (Tamalkurmi tamana Bashan-aaq aterpagcimauq nuniinek Rephaim-am. 14Jair-am-llu Manasseh-m yuin iliita tamalkuan piksagutellrua nunii Argob-am, tauna Bashan-aaruuq, tekilluku Geshurite-at Maacathite-at-llu nuniita engelii, aterpaggluki-llu nunarraat at'minek, Havvoth Jair-amek, man'a erneq tekilluku cali ateqluku.)

15-17“Machir-aamun-llu tun'aqa Gilead-aaq, Reubenite-anun-llu Gadite-anun-llu tun'aqa nuna Gilead-aamek Arnon-aam kuignayua tekilluku, kuignayuum qukaa engelekluku, Kuik Jabbok-aaq tekilluku, Ammonite-at nunautiita engelii; Arabah ilakluku, Jordan-aaq engelekluku, Chinnereth-aamek imarpia Arabah-m tekilluku, Salt Sea-q, acianun-llu Mount Pisgah-m calaralirnermi uitalriim.

18“Taum nalliini alerqullruamci, qanerlua, ‘Atanrem Agayutevci cikillruaci mat'umek nunamek pikesqelluku; tamarmeng angutet alinguraranrilnguut qerararkaugut anguyagcuutnek pingqerrluteng ciunratgun anelgutevci Israel-aam yuin. 19Tau͡gaam nuliaci, mikelnguci kuluvauceci-llu (nallunritaqa amllernek kuluvautengqerrucirci) uitaciqut nunarpagni cikiuteklemni. 20Ikayurniaci ilaci Israelite-at piksagutnatkaatnun nuna Atanrem cikiutekellra ellaitnun kanaknelirnerani Jordan-aam; cali-llu tamaani elluiluteng uitangellrata engeliinun elpeci tuaten pivkallruciatun maani. Nutaan uterrniartuci maavet nunamun elpecen̄un pikesqellemnun.’

21“Cali wiinga alerqullruaqa Joshua, ‘Iigpegun tangellruaten qaillun Atanrem Agayutvet pillra ukugnun malrugnun angayuqagnun; tua-i tuaten Atanrem piarkaugai angayuqauviit tamaani ullagarkaci. 22Aliksaqunaki, tua-i-wa Atanrem Agayutvet calluuciciiqngaten.’

Moses-aam Itercecimanritellra Canaan-aamun

23“Taum nalliini takumcucarallruunga Atanermun qanerlua, 24Ataneq Agayun, nasvitellruarpenga ayagneratnek angelriit irr'inarqelriit-llu caliarkarpet. Allamek agayucetaituq qilagmi nunami-llu elpetun caperrnarqellrianek caliyugngalriamek! 25Kitaki piicagtua, wiinga-llu qerarcessnga tangerrnaurqa assilria nuna qemililria Lebanon-aaq-llu Jordan-aam yaatiini.’

26“Tau͡gaam Atanrem qenrutaanga elpeci pitekluci, niicuumiinii-llu; waten-llu qanrullua, ‘Tua-i amlleriuq, qanenqigcaqunak mat'umek tungemnun! 27Mayurluten kangranun Pisgah-m, kiarten kanaknetmun, negetmun ungalatmun calaratmun-llu. Pinqegcaarluku kiaresgu, tua-i-wa elpet watqapik qerarngailavgu Jordan-aaq. 28Tau͡gaam alerquagiu Joshua. Tengrucararru cayailcarluku-llu; tua-i-wa elliin tau͡gaam qerarciqngaku ciuliqaggluki ukut yuut piksagutellratni nuna tangrrarkan.’

29“Wangkuta-llu uitaukut kuignayugmi akilirnerani Bethpeor-am.

Yupik Bible

Yupik Bible © 2012 American Bible Society

More Info | Version Index