Search form

Deuteronomy 5

Qulen Alerquutet

1Moses-aam-llu taisqai Israel-aat tamalkuita, qanrulluki-llu, “Yuini Israel-aam, niiciki picirkiutet alerquutet-llu qanrutkarkanka elpecen̄un unuamek. Elitarkaugaci pinritevkenaki-llu maligtaquluki. 2Ataneq Agayutvut akquyutelillruuq Sinai-am ingriani, 3ciuliamten̄un kiingan pivkenani tau͡gaam wangkutnun tamamta maa-i unguvalrianun. 4Atanrem qalarutellruaci tungaunani tuani ingrimi kenrem akuliinek. 5Wii nangerngallrulua akulevcen̄i Ataneq-llu taum nalliini qanrutnaluci qanellranek elliin; tua-i-wa alingellruavci kenermek mayuryugpek'naci-llu ingrimun.

“Ellii waten qanertuq: 6‘Wii Atanruunga Agayutsi, anutestellerci Egypt-aamek, teguarullerpecen̄ek.

7“‘Allanek Agayutengqerrngaituci ciuqamni.

8“‘Pilingaituci pikarpecen̄ek agayutnguamek wall'u ayuqiinek piciatun pakmani qilagmi uitalriim wall'u nunam qaingani uitalriim ayuqiinek wall'u camek camani mermi nunam aciani uitalriim ayuqiinek. 9Cikngaituci tamakunun kevgiurngaitaci-llu, tua-i-wa wii Ataneq Agayun Agayutnguunga ilunglua, ataita assiilngillrit tuc'etaqluki irniaritnun, kinguvrita-llu pingasuingitnun cetamaingitnun-llu eq'ukestemnun. 10Tau͡gaam kenkutka manilaraqa amlleqapigtellrianun kenkestemnun alerquutma-llu aturtainun.

11“‘Atanrem Agayutvet atra elliinginaq apaayaqunaku. Tua-i-wa Atanrem pinarqenrilnguuvkarngailaku at'mi elliinginaq apaastii.

12“‘Aturru Sabbath-aaq kenciknarqevkarluku-llu Atanrem Agayutvet alerqullruciatun. 13Ernerni arvinlegni caliarkaten caliaqeciqaten, 14tau͡gaam erenret malrunelgat Sabbath-aaq uitayarauguq allakaumalria Atanermun; tuani ernermi camek calingaituci — elpet, qetunraan, paniin, wall'u kevgaten arnat angutet-llu, wall'u ungungssiuteten wall'u allanrulria nunavni. Tua-i-wa kevgaten-llu mernuinercirarkaungata elpetun. 15Umyuaqiciu kevgaullerci Egypt-aami, cali-llu Atanrem Agayutevci nauwa anuskiici pinini aturluku. Taumek Atanrem Agayutevci alerqullrukiici atuusqelluku erneq uitayaraq Sabbath-aaq.

16“‘Takaqikek aatan aanan-llu, Atanrem Agayutvet alerqullruciatun, unguvamaniartuten piluaqeraluten-llu nunami Atanrem Agayutvet cikiutekellrani.

17“‘Tuquciyaqunak.

18“‘Akusrarutekiyaqunak.

19“‘Teglegyaqunak.

20“‘Piciliqengyaqunak ilavnek.

21“‘Aglumayaqunak nunalgutvet nulirranek, piksuumirpek'naki-llu nunalgutvet enii wall'u nunautii, wall'u kevgai angutet arnat-llu, wall'u ungungssiutai, wall'u caungraan nunalgutvet pia.’

22“Makut maa-i qaneryarat Atanrem qanrutkellri elpecen̄un quyungqallerpecen̄i ingrimi, qalarrluni qastuluni kenrem, amirlum, tan'gercetqapigtellriim-llu akuliinek. Makut alerquutet qanrutkellrui ilavkenaki allanek. Igautellrui-llu teggalqugnun malrugnun tunluki-llu elpecen̄un.

Yuut Alingellrat

23“Cali elpeci niicavciu erina tailuni tungiinek tan'gerem, ingriq ekurpagluni kenermek, yuut piuranrit ciulirneci-llu wangnun taigut, 24elpeci-llu qanertuci, ‘Atanrem Agayutemta nasvitaakut ucurnarquciminek angtaciminek-llu, niitellruarput-llu erinii tailuni tungiinek kenrem. Wangkuta unuamek tangrrarput Agayun qalartelluku yugmun, yuk-llu tuquvkenani. 25Ciin waniwa tuqullerkamten̄un ataam piqatarceta? Tua-i nallunailngurmek uum kenerpiim piunrirciqaakut. Ilumun nutaan tuquciqukut niitenqigeskumta Atanrem Agayutem eriniinek. 26Tua-i kitumek yugtangqerta niitellermek eriniinek unguvalriim Agayutem, qanelriamek tungiinek kenrem, wangkuta pillrucimcetun, unguvaluni-llu? 27Canianun ayagluten niicarturki tamalkuita Atanrem Agayutemta qanerkai. Nutaan qanrutniarpekut tamalkuitnek Atanrem Agayutemta elpenun qanellrinek. Wangkuta niilluki aturniaput.’

28Atanrem-llu tamakunek niicami qanrutaanga, ‘Ukut qanellrat yuut niitaqa, ilumuuguq-llu qanellrat. 29Waten-tuq kesianek umyuangqelarlit, qigciklua aturluki-llu tamalkuita alerquutenka, elluarrluteng yuunaurtut irniartuumarmeng akwarpak. 30Ullagluki qanruski utertesqelluki pelatekaitnun. 31Tau͡gaam elpet nangengqa canimni, qanrutniamken tamalkuitnek alerquutnek picirkiutnek-llu elitnaurutkarpenek ellaitnun, aturniarait nunami cikiuteklemni pikesqelluku.’

32“Kitaki mulngakluci atuqiciki Atanrem Agayutevci alerquutekellri elpecen̄un, cakaaqsaunaki. 33Piyuaciquci tumiikun Atanrem Agayutevci alerquutekellrakun, unguvaniartuci umyuarniurutaunaci, unguvamanaurtuci-llu nunami piksagutarkarpecen̄i.

Yupik Bible

Yupik Bible © 2012 American Bible Society

More Info | Version Index