Search form

Deuteronomy 6

Arcaqalria Alerquun

1“Tua-llu waniwa alerquutet picirkiutet-llu Atanrem Agayutevci alerquutekellri wangnun elitnaurutkesqelluki elpecen̄un, atuusqelluki nunami ullagarkarpecen̄i piksagutarkauluku. 2Tuaten-llu elpecen̄un qigcigyagutesqelluku Ataneq Agayuten, elpet, qetunraan, tutgaraan-llu, aturluki tamalkuita picirkiutai alerquutai-llu, wii alerquutekellrenka elpenun, unguvarpet taktaciatun, unguvamaniartuten. 3Taumek niiten Israel-aami, mulngakluten-llu atuqiki elluarrluten yuuniartuten, yugyangluten-llu, Atanrem, ciuliarpeci Agayutiita akqutkellruciatun elpecen̄un, nunami enuqitnailngurmi.

4“Elpet Israel-aami: Ataneq Agayutvut atauciuguq. 5Kenkarkaugan-llu Ataneq Agayuten ircaqurpegun tamalkirrluten, cali yuucirpegun pitacirarpegun-llu tamalkirrluten. 6Cali makut qaneryarat alerquutekellrenka unuamek umyuarpecen̄i uitaciqut. 7Cali-llu ilungluci elitnaurutkeciqaci irniarpecen̄un, qalarutkelarciqaci-llu nevcen̄i aqumgallerpecen̄i, tumyarani-llu piyuagaqavci wall'u mernuinercillerpecen̄i calillerpecen̄i-llu. 8Qillruciki unatevcen̄un, aturluki-llu qaurarpecen̄i nallunailkutauvkarluki. 9Igauciiqaten-llu maavet ikirtuqam avategkenun iteryaranun-llu.

Aarcirtuun Narurcilriamun

10“Tuaten cali Atanrem Agayutvet akqellrucimitun ciuliaci, Abraham, Isaac, Jacob-aaq-llu, cikirciqaaci nunamek, nunarpagtalegmek angelrianek caucilrianek elpeci nunaliaqenrilkevcen̄ek. 11Enet-llu tamakut imartuciqut assilrianek elpeci tamaavet ellilqenrilkevcen̄ek, mermek-llu elakarluteng elalqenrilkevcen̄ek, naucetaarvigluteng-llu nauceciilqenrilkevcen̄ek. Atanrem taiskaci maavet nunamun neqkarpecen̄ek-llu enuryugcivkenaci, 12murilkekici nalluyagucuarci Ataneq anutestellerci Egypt-aamek teguarullerpecen̄ek. 13Qigcikiciu Ataneq Agayutsi, agayuaqluci elliinun kiingan, ukvernarcariaqluci-llu elliin atrakun kiingan. 14Allanun agayutnun cauyaqunaci, yuut avaqlirpeci agayutaitnun. 15Tua-i allanun agayulaquvci eq'uqertii kenertun elpecen̄un tuciiquq piunrirluci-llu, tua-i-wa Ataneq Agayutsi nayurtessi ciknatalriaruami.

16Ataneq Agayutsi naspaayaqunaciu, Massah-mi pillerpecetun. 17Pinritevkenaci niisngakiciki alerquutet elliin cikiutekellri. 18Caliurluci Atanrem qanllermikun elluakekiinek assikekiinek-llu, elluarrluci piniartuci. Piksagucugngariciqerci naungignarqellria nuna Atanrem akqutkellra ciuliarpecen̄un, 19anevkarluki inglukesteci tamaaken Atanrem akqellratun.

20“Ukani-llu tekitarkami irniarpeci apqaurciqaiceci, ‘Ciin Atanrem Agayutemta alerqurtakut niisngasqelluki tamalkuita makut alerquutet?’ 21Waten qanruskiciki, ‘Wangkuta teguaqellruakut Egypt-aam Angayuqran. Atanrem-llu anulluta pinimikun. 22Wangkuta-llu iimteggun tangellruarput calillrani irr'inarqelrianek, cali irranarqelriit tuc'etellrani Egypt-aarmiunun, angayuqratnun, atanerruarinun-llu. 23Anutaakut-llu Egypt-aamek maavet taitnaluta cikirnaluta-llu mat'umek nunamek ciuliaput akqellrucimitun tuaten piciqniluni. 24Nutaan-llu Atanrem Agayutemta alerquraakut niisngasqelluki tamalkuita makut alerquutet, cali-llu qigcikesqelluni. Tuaten pikumta elliin qaunqerkauluku kesianek nunavut enuqitnairulluku-llu. 25Piciuluta niisngakumteki tamalkuita Agayutem alerquutekellri wangkutnun, ilukegcitkeciqaakut.’

Yupik Bible

Yupik Bible © 2012 American Bible Society

More Info | Version Index