Search form

Deuteronomy 7

Atanrem Nakmiin Yui

1Atanrem Agayutevci ayauciiqaaci nunamun piksagutarkarpecen̄un, ayagtelluki-llu amllellriit angayuqauvilget ciunerpecen̄ek, makut maa-i: Hittite-at, Girgashite-at, Amorite-at, Canaanite-at, Perizzite-at, Hivite-at, Jebusite-at-llu. 2Cali Atanrem Agayutevci tunkaki ukut yuut, elpeci-llu cirlakluki, tuqutarkaugaci tamalkuita; iliksugyaqunaciki takumcukevkenaki-llu. 3Kassuusngaituci-llu ellaitnun, panici-llu cali uingevkarngaitaci tamaaken nulirkaitnek-llu qetunrarpeci ellaitnek pingaunaci. 4Tua-i-wa iqlutmuruciiqngatki irniaci maligtaquillratnek wangnek, kevgiungevkarluki allanun agayutnun. Tuaten pikuvci, Atanrem qenqerrutarkaugaaci piunrirluci-llu egmian. 5Kitaki navguqiciki ekuaviit tamakut piit, ciqumlluki teggalqut napartait, iqulluki agayutnguarata Asherah-m nallunailkutai, ekualuki-llu agayutnguarit. 6Tua-i pikici waten Atanrem Agayutevci yukngaci. Yuut amllerrsaaqut nunam qaingani, tau͡gaam elliin cucukellruaci nakmiin yuknaluci.

7“Allani-llu yugyanrucirci pitekluku kenkenritaaci cucukluci-llu; elpeci ikgellrullruuci allani angayuqauvilegni. 8Tau͡gaam Atanrem kenkaaci akqutkellni-llu piciurcetnaluku ciuliarpecen̄un. Tamana pitekluku anirturaaci artuqailucimikun teguarullerpecen̄ek Egypt-aam angayuqranun. 9Neq'akiciu Atanrem Agayutevci kiingan agayutngucia piciulriaruluni. Akqutkellni aturciqaa nasvagluku-llu kenekni nangyuilnguq tiissitsaanun kinguveqellrianun kenkestem̄inun alerquutmi-llu aturtainun. 10Tau͡gaam pinritevkenani anucimirqecetaarciqai eq'ukesten̄i. 11Kitaki pinritevkenaci ayuqucirtuutet maligngaciki; niisngaluki-llu alerquutet cikiutekellrenka elpecen̄un unuamek.

Atawaqautai Niisngayaram

12“Alerquutet makut niicugnikuvciki niisngaluki-llu, nutaan Atanrem Agayutevci akqutni piugurceciiqaa elpecen̄un, kenekni-llu cali cimiyuilnguq ciuliarpecen̄un akqutkellrucimitun; 13kenkarkaugaaci atawaqertelluci-llu cali-llu yugyangevkarluci irnialingevkarluci-llu. Naucetaarvici-llu naugiluaqercetaqluki, mukaarkautengqelararkauluci, cali-llu wine-anek, olive-aat-llu uquitnek. Cali atawaqercetarkauluci cikirluci amllernek kuluvagnek qusnginek-llu. Atawaqautnek makunek cikirciqaaci tuani nunami akqutkellermini ciuliarpecen̄un cikiutekciqniluku. 14Yuut allat nunami elpecicetun pitalriamek atawaqercecimangaitut. Ilasi atauciunge'rmi, ungungssiuteci-llu irniyuilngurmek ilangqerrngaituq. 15Atanrem-llu naulluutmun pivkarngaitaaci. Egypt-aami-llu assiitellriit cirliqutet nallunritelci elpecen̄un tut'essngaitai, inglukestevcen̄un tau͡gaam. 16Piunriqiciki tamalkuita angayuqauvilget Atanrem cirlakarkaurcetellri. Takumcukngaitaci-llu. Cali kevgiuryaqunaciki agayutait picurlautekciqngavciki.

17“Umyuarpeciuggun-llu qaneryaqunaci, ‘Ukut yuut amllenruut wangkutni tavaqaa cirlaknauput.’ 18Alikenriciki tamakut, tau͡gaam neq'akiciu qaillun Atanrem Agayutevci pillra Egypt-aarmiunun angayuqratnun-llu Pharaoh-mun. 19Neq'akiciki-llu alingnarqellriit cangerliit iivciuggun tangelci, imkut-llu irr'inarqelrialiat irranarqelriit-llu, pinia-llu Atanrem Agayutevci artuqailnguq; nauwa tamaaggun pinimikun teguarunrircetellrukiici. Tuaten cali ayuqellriakun piunrillrucimitun Egypt-aarmiut elliin piunrirciqai makut yuut maa-i alikek'ngaci. 20Cali Ataneq Agayutsi ayagceciciquq tamakunun puukatulinek 'vegtarnek, piunrirarkauluki tamakut qimallret iirluteng-llu pillret elpecen̄ek. 21Taumek uluryakngaitaci tamakut yuut; tua-i-wa Atanrem Agayutevci nayuaci; ellii angtatailnguuluni Agayutnguuq uluryakumaarkauluni-llu. 22Atanrem Agayutevci ayagceciiqai tamakut angayuqauvilget carraugurluki. Ataucikun piunrirciigaciiqaci, tua-i-wa tuaten pikuvci yuilqum ungungssii amllericiqngata alingnariluteng elpecen̄un. 23Atanrem inglukesteci elpecen̄un tunciqai, umyugairuceciiqai-llu piunrirnatkaatnun. 24Cali-llu elliin angayuqat cikiutekciqai elpecen̄un. Tuquciiqaci, umyuaqumangairulluteng-llu. Yuum atauciunge'rmi ingluliurciigaciiqaaci, tamalkuita piunrirciqngavciki. 25Agayutnguarit ekuakiciki. Ayariyaqunaciki qaingitni uitalriit qerrircetellriit suulutaat-llu, teguyaqunaciki-llu piknaluki. Tuaten pillerkarci aarnarquq, tua-i-wa Atanrem eq'ukngaku agayutngualiyaraq. 26Agayutnguamek-llu itrusngaituci nevcen̄un, ayuqiinek aniqlaamallrata pimayuartuci. Eq'ukarkaugaci caunrillekluki-llu tamakut agayutnguat, tua-i-wa Atanrem aniqlaamiiki.

Yupik Bible

Yupik Bible © 2012 American Bible Society

More Info | Version Index