Search form

Deuteronomy 8

Nunakegtaar Piksunarqelria

1“Pinritevkenaki niisngakiciki tamalkuita alerquutet elpecen̄un cikiutekellrenka unuamek, unguvaniartuci yugyangluci-llu piksagulluku-llu nuna Atanrem akqutkellra ciuliarpecen̄un. 2Neq'akiciu qaillun Atanrem Agayutevci ciuliqagtellrukiici yuilqumi allrakut yuinaak malruk aturluki, naspaagaqluci caknernarqellriatgun, nallunriryuamiu qaillun pillerkarci wall'u niisngaarkaucirci alerquutminek. 3Kainiqevkallruaci, nutaan-llu cikirluci neqkarpecen̄ek manna-mek, elpeci ciuliarpeci-llu ciungani nereksailkevcen̄ek. Waten ellii pillruuq nallunriisqelluku elpecen̄un yuum kelipaqainarkun unguvangailucia, tau͡gaam tamalkuitgun Atanrem qanellrikun. 4Aturaci qaivcen̄i nangeksaitellruut, it'gaci-llu puvyuunateng tamakuni yuinaagni malrugni allrakuni. 5Nallunriciu kitaki Atanrem Agayutem kitugcilallra elpecen̄ek anucimirqecetaarutetgun aatam qetunraminek pilauciatun. 6Taumek tuaten pilaqici Atanrem alerquuciatun: yuuluci maligtaquluki alerquutai niisngaluku-llu. 7Atanrem Agyutevci iluvautaaci nunamun naungignarqellriamun. Kuigtalegmun mermek-llu ulvelriartalegmun, nunam-llu aciakun kuiggartalegmun, qurrlurluteng kuignayugni qemini-llu. 8Tamana nuna naugilartuq mukaarkanek, atsanek-llu ayuqenrilngurnek. Cali pitarluni olive-aanek neqnirqelriamek-llu paatakaamek. 9Tuani kailarngaituci camek-llu enuqisngaunaci. Teggalqurri cavigmek pitangqertut, qemiinek-llu elagyugngaluci tegglimek punernermek. 10Nerlarciquten camirrluten, quyavikciqan-llu Ataneq Agayuten nunamek naungignarqellriamek cikiutellranek.

Aarcirtuutet Atanermek Nalluyagucillerkam Tungiinun

11“Murilkekici nalluyagucuarci Ataneq Agayutsi, atunrirluki alerquutai picirkiutai-llu, wii alerquutekellrenka elpecen̄un unuamek. 12Camirrluten nerlaquvet, eneliluten-llu assilrianek uitavigkarpenek, 13cali-llu kuluvauteci qusngiyagauteci-llu wall'u akiuteci suulutaaruteci-llu amllerikata, (wall'u tukuureskuvci), 14murilkekici umyuarci quyigiyuartuq nalluyagulluku-llu Ataneq Agayutsi anutestellerci Egypt-aamek teguarullerpecen̄ek. 15Elliin ciuliqagtellrukiici angelriakun pillugnarqellriakun yuilqukun ciissirpalilriakun. Tamaani-llu kinreskiini mertailngurmi nunami elliin meq qurrlurcet'lallrua qiurmek. 16Nerevkaraqluci-llu tamaani yuilqumi manna-mek ciuliarpeci cauciilkiitnek, elpecen̄ek picalqukenriisqelluci naspaanaluci-llu, tau͡gaam iquani atawaqercetnaluci cikirluci assilrianek. 17Taumek elpeci umyuarteqerkaunrituci tukuurcukluci pingnatullerpeciuggun pinirpeciuggun-llu. 18Neq'akiciu elliin Atanrem Agayutevci pinimek cikilaraaci tukuurtelluci. Waten pillermikun, maa-i cali man'a engelkarrluku, ciumurutaa akqutkellni ciuliarpecen̄un. 19Nalluyaguteqaqsaunaciu Ataneq Agayutsi wall'u tuigcaqunaci allanun agayutnun, tamakunun agayularnaluci kevgiurnaluci-llu. Tuaten pikuvci waniwa aarcirturamci nallunailngurmek piunriumaciquci. 20Elpeci niisnganrilkuvciu Ataneq tua-i piunriumaciquci ayuqluki tamakut angayuqauvilget elliin piunrirarkai ciunerpecen̄i.

Yupik Bible

Yupik Bible © 2012 American Bible Society

More Info | Version Index