Search form

Exodus 10

Petgertayulit

1Tua-llu Ataneq qanertuq Moses-aamun, “Ullaggu Pharaoh. Wiinga asvairutellruaqa atanerruari-llu makunek irr'inarqellrianek pinalua ellaitni. 2Cali-llu elpecen̄un qanrucugngarisqelluki irniaci tutgaraci-llu qaillun Egypt-aarmiunek cirlakillemnek cali-llu irr'inarqelrianek caliaqellemnek ellaitni. Tamarpeci elpeci nallunrirciqerci wiinga Atanruciqa.”

3Moses-aankuk tua-i ullagaak Pharaoh qanrulluku-llu, “Ataneq, Agayutiit Hebrews-aat qanertuq, ‘Qaku elpenek pivakenriqatarcit ciuqamni? Yuunka ayagteski agayuniartut wangnun. 4Cali ayagcecuumiilkuvki yuunka unuaqu Petgertayulinek nunavnun taiciciqua. 5Nuna patuciqaat tangrruunrirtelluku; nerciqait-llu kavtiit piunrinritellrit napauteci-llu naumalriit tamaani. 6Ena uitaviin imirciqaat enait-llu cali pistevvet Egypt-aarmiut-llu. Arcaqalriaruciquq, ciuliaci-llu waten pilriamek tangeqsaitut yuurqaanermeggnek.’” Tua-i-llu Moses-aam tuiggluni Pharaoh unilluku.

7Tua-llu Pharaoh-m atanerruarin qanrutaat, “Qaillun taktalriamek uum yuum pinerrlugcetaarturqatartakut? Ataki Israel-aat ayagteski piicagviknauraat Ataneq Agayutseng. Ayuqucingeksaitan-qaa cali Egypt-aam navguumallra?”

8Tua-i Moses-aankuk Aaron-aaq-llu ataam taitagket Pharaoh-mun elliin-llu qanrutak, “Ayagluci tua-i piicagyarturci Atanermun Agayutevcen̄un, tau͡gaam naliit yuut ayagciqat?”

9Moses-aam kiugaa, “Tamamta ayagciqukut mikelnguput ak'allaat-llu malikluki. Malikeciqaput qetunraput, paniput, qusngiput, qusngirngalnguput, kuluvaput-llu, nerevkarin aturciqngamteggu tuani Atanermun.”

10Egypt-aam angayuqra cali qanertuq, “Ukvernarcariunga elpecen̄un malikarkauvkarpek'naki arnaci irniaci-llu. Nallunaituq pillerkiurucirci ingluliurutnaluci. 11Qang'a! Anguterrlainarni tau͡gaam ayagci piicagyarturluci Atanermun tuatnallerkarci piyuutekekuvciu.” Moses-aankuk-llu ayagcetagket Pharaoh-m ciuqerranek.

12Tua-llu Ataneq qanertuq Moses-aamun, “Unateten nalugki quliinun Egypt-aam petgertayulit piniartut. Tailuteng nerniarait cat tamalkuita naumalriit kavcillrani uitaqallret.” 13Moses-aam tua-i nalugaa ayaruni, Atanrem-llu anuqengevkaraa calaramek nunamun ernerpak unugpak-llu, unuakuqerluku-llu nutaan anuqem tekiulluki petgertayulit. 14Petgertayulit-llu tuc'ameng misvikaat Egypt-aaq tamalkuan, anagulluteng amllerrameng ciungani tuaten pitaksaunateng tuaten-llu pitanqiggngaunateng. 15Patuani nuna tamalkurmi tunguriuq, nerait-llu naunraat tamalkuita kavtiim uitatellri napat-llu atsait. Cungagcetellriartairulluku napani naunrarni-llu Egypt-aam nuniini tamalkuan.

16Tua-llu Pharaoh-m cukangnaqluni Moses-aankuk taisqak qanerluni-llu, “Wiinga assiilngirtua Atanermun Agayutevtegnun elpetegnun-llu. 17Assiilngurmek au͡g'aritegnga ataucirqumek, piicaglutek-llu Atanermun Agayutmun au͡gaasqelluku man'a piunririlria anucimirqecetaarun wangnek.” 18Tua-i Moses-aam unilluku Pharaoh piicagtuq Atanermun. 19Atanrem-llu anuqa calaramek cimiraa tuknilriamek anuqmek kanavamek. Petgertayulit-llu tenglluki Suez-aam+ kangiqutaanun, atauciunge'rmi uitaqerpek'nani Egypt-aami. 20Tau͡gaam Atanrem Pharaoh umyugaakun asvairucetaa, Israel-aat-llu ayagcetevkenaki.

Tan'geq

21Atanrem qanrutaa Moses-aaq, “Nalugki unateten qilatmun tan'gerem tan'gercetqapiggluni elpegnarqellriim Egypt-aam nunii patuniaraa.” 22Moses-aam-llu unatni yagtai qilatmun, tan'geriluni-llu caknerpak tamalkuan Egypt-aami erenret pingayun aturluki. 23Egypt-aarmiut-llu atunem tangrrutesciigaliut. Uitaluteng-llu eneni tarratesciiganateng ernerni pingayuni. Israel-aat tau͡gaam kiimi uitaviat tanqigcen̄ani.

24Pharaoh-m Moses-aaq taisqelluku qanrutaa, “Ayagluci piicagyarturci Atanermun arnat irniaci-llu malikluki. Tau͡gaam qusngit, qusngirngalnguut, kuluviit-llu maavet unilluki.”

25Moses-aam-llu kiugaa, “Tuaten pikumta elpet cikirarkaugarpekut ungungssiarnek tuqulluki ekuagiluta elliitekamten̄ek Atanermun Agayutemten̄un. 26Qang'a, ungungssiuteput malikeciqaput, atauciungraan unicingaitukut. Wangkutnek cucuklirarkaungamta ungungssinek agayussuutekamten̄ek Atanermun Agayutemten̄un. Tuavet tekipailemta nalluamteggu ungungssit naliitnek ekuagicirkarput elliinun.”

27Atanrem Pharaoh umyugaakun asvairucetaa ayagcecuumiinaki-llu. 28Qanertuq-llu Pharaoh Moses-aamun, “Wangnek ayii! Wak'nirnek tangenqigcecaqunak wangnun! Taumi ernermi tangenqigeskumken tuquciquten!”

29Moses-aam kiugaa, “Qanrucirpetun piarkauguq! Wiinga tangenqiggngaitamken!”

Yupik Bible

Yupik Bible © 2012 American Bible Society

More Info | Version Index