Search form

Exodus 16

Manna Egtuuget-llu

1Tamarmeng Israel-aat ayagtut Elim-aamek. Erenret-llu akimiaratni, iralum tungliani Egypt-aamek ayallermeng kinguani, tekitut yuilqurranun Sin-am. Tauna akuliignetuq Elim-aankuk Sinai-aq-llu. 2Tamaani yuilqumi tamarmeng qanemyuugartut Moses-aamun Aaron-aamun-llu, 3qanerluteng, “Tuqutellrunrilkiikut-llam Atanrem Egypt-aami, neqkalirluta assirluta nerlallemten̄i; elpetek ayautarpecikut maavet yuilqumun paluluta tuqusqelluta.”

4Tua-llu Ataneq qanertuq Moses-aamun, “Ellallirceciiqaqa neqkanek qilagmek pikarpecen̄ek, yuut avuryartularniartut ernerpak pikanermeggnek unuaquaqan. Maaggun naspaamaciqut alerquutenka aturluki ilumun piarkauciat. 5Erenret arvinelgatni avularniartut erenregni malrugni pikanrulriamek.”

6Tua-i Moses-aankuk qanrutakek tamalkuita Israel-aam yui, “Ataku nallunrirciqerci Atanermun anutellrucirci Egypt-aamek. 7Unuakumi-llu tangerciqerci ucurnarqucia Atanrem. Elliin niitaa qanemyuugautsi ellminun. Ilumun elliinun tau͡gaam qanemyuugartuci, wangkuk elliinun pisteqainaugukuk.” 8Cali Moses-aaq qanertuq, “Atanrem cikiraaci kemegturkarpecen̄ek atakumi, kelipanek-llu piyugtacirpecetun unuakumi, tua-i-wa niitellruamici qanemyuugallerpecen̄i ellminun. Wangkuk qanemyuugautenritarpecikuk Ataneq tau͡gaam.”

9Moses-aam Aaron-aaq qanrutaa, “Tamalkuita yuut qanruski tailuki Atanrem ciuqerranun nangercesqelluki, tua-i-wa elliin niitellruaki qanemyuugautait.” 10Aaron-aam qalarusnginanrani yuut, takuyallermeggni yuilqum tungiinun, alqunaq Atanrem ucurnarqucia alairtuq amirlumi. 11Ataneq-llu qanertuq Moses-aamun, 12“Niitaqa qanemyuugallrat Israel-aat. Qanruski atakuarqan kemegnek nerciqniluki, unuakumi-llu kelipanek piyugtacimegcetun cali. Nutaan-llu nallunrirciqerci wiinga Atanruciqa elpeci Agayutsi.” 13Atakuan egtuugugaat tengaurluteng tekitut uitaviat patuyuumaluku unuakumi-llu yukutartuq avatiit tamarmi. 14Yukutaq-llu kinran, tamarmi yuilqum qainga pitanguq cayagarnek mamkunateng, kanertun ayuqluteng. 15Israel-aat tangrramegteggu cauciitaat, apqaurulluteng-llu, “Cauga?”

Moses-aaq-llu qanertuq, “Man'a neqkauguq Atanrem elpecen̄un cikiutekellra neresqelluku. 16Waten Atanrem alerquraaci: tamarpeci avuusqelluci tamakunek pikanerpecen̄ek, yuk atauciq saskat pingayunelgen imarkanritnek pikirturluku.”

17Tua-i Israel-aat tuaten piut, ilaita avuqengait amllenruluteng ilaita-llu ikgellruluteng. 18Cuqtellratni amllellriamek avullret pivallanritut ikgellrulriamek-llu avullret pimyaagpek'nateng, tamarmeng avuameng pikanemeggnek. 19Moses-aam qanrutai, “Ilakuiyaqunaci unuaqu pikarpecen̄ek.” 20Tau͡gaam ilaita niitenritaat Moses-aaq, ilakuiluteng unuakutarkameggnek. Aninqellrit-llu paralqallinii tep'ngarrluteng-llu. Taumek Moses-aam tuaten pillret qenruskai. 21Unuaquaqan tamarmeng avulartut piyugtacimegcetun, akerta puqlangaqan ilakuarit urugaqluki.

22Erenret arvinelgatni avurtut erenregni malrugni neqkanmeggnek, akimiaq ataucimek cipluku saskat imarkanritnek atauciq yuk pikirturluku. Tamarmeng yuut ciulirnerita ullagluku qanrucatni mat'umek Moses-aaq, 23elliin qanrutai, “Waten Ataneq alerquillruuq, ‘Unuaqu tanqilriaruuq erneq mernuinercillerkaq, tanqilria agayuneq allakaumalria Atanermun. Uucici unuamek camek uucullerpecen̄ek, qallauciluci-llu canek qallaucullerpecen̄ek. Ilakuat tamalkuita aninqen̄iaci unuaqu pikauluki.’” 24Moses-aam picirkillruciatun ilakuateng qelkait unuaqullranun. Assiirutevkenateng-llu paralurpek'naki-llu. 25Moses-aaq qanertuq, “Nericiki makut unuamek, tua-i-wa unuamek Sabbath-aaruan, uitayaraq Atanermun allakaumaluni mernuinercirvigkauluni. Unuamek nunam qainga tamakunek pitangqerrngaituq. 26Ernerni arvinlegni avularciquci neqkarpecen̄ek; tau͡gaam erenret malrunelgatni uitayaraungan pitangqerrngaituq.”

27Erenret malrunelgatni, yuut ilait anluteng neqkanek yuaryaaqut tau͡gaam nataqutevkenateng. 28Ataneq-llu qanertuq Moses-aamun, “Qaillun pitalriamek alerquutenka aturyuumiiteqatarceciki? 29Umyuaqiciu, wii Ataneq, cikillruamci ernermek mernuinercirvigkamek, taumek erenret arvinelgatni cikilarciqamci neqkanrulrianek erenregni malrugni. Tamarpeci uitaurqici uitavigpecen̄i erenret malrunelgatni.” 30Tua-i yuut mernuinercilartut erenret malrunelgatni.

31Israel-aam-llu yuin tamana neqkaq aciraat manna-mek. Naucetaarkatun qatellriatun ayuqluni nerellra-llu ayuqluni mamkilngurtun cake-aatun evegtaat neqkautiitnek avuluku uucimalriatun. 32Moses-aaq qanertuq, “Atanrem waten picirkillruakut: Aninqisqelluta manna-mek kinguvemta pikaatnek, ellaitnun tangrresqelluku neqkaq wangkutnun cikiutekellra neresqelluku yuilqumi, anutellermini wangkuta Egypt-aamek.” 33Moses-aam-llu qanrutaa Aaron-aaq, “Putiilekaamek piluten pingayunelgen saskat imarkanratnek manna-mek ek'iniartuten tuavet. Elliluku-llu Atanrem ciuqerranun. Tauna avaliquralarniaraat kinguverpeci.” 34Atanrem picirkillruciatun Moses-aaq, Aaron-aam ellia manuanun Akqutem Yaassiigan, uitaurallerkaanun. 35Israel-aat-llu nerlartut kelipayagarnek allrakut yuinaak malruk (40) aturlukek, Canaan-aamun nunalgartellerteng tekilluku. 36Kinertellrianek cuqciyaraq tuani atullrat pitauq yuinaat cuqneret (20 quarts).

Yupik Bible

Yupik Bible © 2012 American Bible Society

More Info | Version Index