Search form

Exodus 17

Meq Teggalqumek

1Israel-aat tamarmeng unitaat Sin-am yuilqurtaa nugtartaarluteng-llu Atanrem picirkiuciatun. Arulairtut-llu Rephidim-aamun, tau͡gaam tauna mertaunani. 2Tuani yuut qanemyuugarluteng Moses-aamun qanertut, “Merr'iskut.” Moses-aam-llu qanrutai, “Ciin qanemyuugarceci wangnun? Ciin Ataneq naspaaceciu?” 3Tau͡gaam yuut meqsuameng qanemyuugartu'rtut Moses-aamun qanerluteng, “Ciin anucikut Egypt-aamek quligtelluta tuquvkaryarturluta irniaput-llu ungungssiput-llu?”

4Moses-aaq-llu cumiggluni piicagtuq Atanermun, “Qaillun piciqsia ukut yuut, teggalqunek miluquniararaatnga?”

5Atanrem qanrutaa Moses-aaq, “Ciuliqagtaita ilait malikluki ciunratgun ayagci, ayarun kaugturcuutekellren Nile-amun ang'aqluku. 6Nangengqaciqua ciunerpecen̄i Ingrimi Sinai-ami; teggalquq kaugtuquvni mermek maqciquq yuut merkaatnek.” Moses-aaq-llu tuaten pillruuq takuatni Israel-aam yuin ciuliqagtaita.

7Tauna-llu aciraat Massah-mek Meribah-mek-llu,+ tua-i-wa Israel-aat qanemyuugarluteng Ataneq naspaallruatgu qanerluteng, “Atanrem-qaa nayuraakut wall'u-qaa nayunritaakut?”

Anguyautut Amalekite-at-llu

8Tua-llu Amalekite-at tekilluteng anguyagait Israel-aat Rephidim-aami. 9Moses-aam-llu Joshua qanrutaa, “Angutet ilaitnek cucuklirluten anguyagyartuqiciki unuaqu. Nangengqaciqua kangrani ingrim tegumiaqluku ayaruq Agayutem tegumiaqesqellra.” 10Joshua-llu Moses-aam pisquciatun piuq callugluki Amalekite-at, Moses-aaq, Aaron-aaq, Hur-aq-llu mayullratni pengum kangranun. 11Moses-aam tallini naluumaaqaku Israel-aat piningqelartut, tallini tau͡gken atrartaqaku Amalekite-at piniraqluteng. 12Moses-aam-llu tallik mernungagnek Aaron-aankuk Hur-aq-llu teggalqumek taituk aqumvigkaanek, avategkenun-llu pilutek Moses-aam tallik naluumaakek pektairlukek akertem tevirnatkaanun. 13Waten piluteng Joshua-m cirlakai Amalekite-at.

14Tua-llu Ataneq Moses-aamun qanertuq, “Igausgu man'a cirlakillerci umyuaqumaniartuq. Qanrutekluku-llu Joshua-mun Amalekite-at wangnun nangluki piunrirciqniluki umyuaqumanqiggngairutelluki.” 15Moses-aaq-llu ekuaviliuq acirluku-llu “Ataneq nallunailkutaqaqa.” 16Qanerluni-llu, “Nalugluku qulvanun Atanrem nallunailkutaa! Atanrem callugturciqai Amalekite-at akwarpak.”

Yupik Bible

Yupik Bible © 2012 American Bible Society

More Info | Version Index