Search form

Exodus 21

Aulukumallerkaat Teguat

1“Maa-i makut picirkiurutet qanrutkarkaten Israel-aam yuinun: 2Hebrew-mek teguamek kipuskuvci, taum allrakuni arvinlegni kevgiurarkaugaaci. Allrakut malrunelgatni pegtelarciqaci akimek qanerpek'naci. 3Nulirritellrukuni teguaqliutellerpeni nulirkaminek pingaituq ayakuni, tau͡gken nulirtuumallrukuni teguaqliutellerpeni nuliani malikluku piarkauluni. 4Angayuqran nulirturcetellrukani irniangluni-llu tan'gaurlurnek wall'u nasaurlurnek, arnaq irniari-llu angayuqallran pikciqai, teguarulleq kiimi ayagarkauluni. 5Tau͡gaam teguaq taringevkarluni qanqan kenekniluku angayuqani, nuliani irniani-llu, pegcesqumanritniluni-llu, 6tuani atanran ayauciiqaa agayuvigmun nangertelluku-llu amigmun wall'u amiigem naparyaanun. Nutaan ciutii tuani ukiciiqaa teguaqliutarkaurrluku unguvallran taktaciatun.

7“Angutem panini tunkuniu teguarurtelluku, tauna pegcimangaituq angutetun teguatun. 8Tunumakan umyuartequtestiinun nuliqnaluku, tau͡gaam taum kiputestiin assikevkenaku, tunumaarkauguq utetmun atiinun; angayuqran tunesciiganaku allanrulriamun, elluarrluku aulukellrunrilamiu. 9Yuk kipuskuni teguamek arnamek cikiutekaminek qetunraminun, panimitun pitarrluku aulukarkaugaa. 10Angun nuliami aiparkaanek nulirtunqigeskuni, ciuqlia aulukarkaugaa cakanirpek'naku neqkatgun, aturatgun, aipaqellriit-llu atutukaitgun. 11Aulukenrilkani ukut pingayun aturluki, arnam camek nagutaunani uniciiqaa uini akiliutmek-llu akurturcetevkenaku.

Picirkat Tuqucilrianun

12“Kaugtuq'ngelria yugmek tauna-llu tuquluni, kaugtuq'ngelleq tuqucimaarkauguq. 13Tau͡gaam pitsaqevkenani pikan, tuqutnaluku umyuarteqevkenani, apertuuciiqamci natmun qimagvigkaanek. 14Tau͡gaam yuk qenqerrluni pitsaqluni tuqucikan, tauna tuquskiciu qimangraan ekuavimnun anagnayukluni.

15“Kaugtuq'ngelria ataminek wall'u aanaminek tuqucimaarkauguq.

16“Kina imna ayakaucilria kitumek tunenaluku, wall'u avaliqnaluku teguaqluku, tuqucimaarkauguq tauna.

17“Kina-llu aniqlaagilria ataminek wall'u aanaminek tuqucimaarkauguk.

18“Yuuk callukunek aipani-llu kaugturluku teggalqumek wall'u tenglukaku, tau͡gken tauna tuquvkenani tau͡gaam ingleminun taklarrluni, 19tauna-llu ataam makcugngariluni tarralluni-llu ayarurluni, pistellra qaillun pimangaituq; tau͡gaam tauna akngirtellni akilirciqaa calillerkaanek cagmarivkaamiu, aulukluku-llu assirinatkaanun.

20“Angun-llu muragmek piluni teguani kaugtuaqaku angun wall'u arnaq, elliin tuqulluku, anucimirqecetaarnarquq. 21Tau͡gaam teguaq tuqunrilkan ernerpak, wall'u erenregni malrugni, angayuqra anucimirqecetaarnarqenrituq. Cagmarillra elliin piminek pitalqeggluni elliinun anucimirqecetaarutnguuq.

22“Angutnek callulriartangqerquni, akngirrluku-llu qingalria arnaq irnicuartelluku, allakun tau͡gken akngiringavkenani, akiliriarkauguq arnam uingan cuq'liuciatun cuqcistem cangakenrilkaku. 23Tau͡gaam allakun cali arnaq akngiringakan, akngirtestii anucimirqecetaarciqerci: tuqucikan tuqulluku; 24iingirkengkan iingirrluku; keggutairkengkan keggutairluku; unatairkengkan unatairluku; it'gairkengkan it'gairluku; 25uuskengkan uutelluku; kiliqengkan kilirluku; qiucikan-llu qiulluku.

26“Angutem tenglukuniu teguani angun wall'u arnaq iingakun cikmirrluku, pegtarkaugaa pegtellra akiliutekluku iinganun. 27Keggutaireskaku-llu teguani angun wall'u arnaq, pegtarkaugaa pegtellra akiliutekluku keggutiinun.

Ungungssiutengqellrianun Alerquutet

28“Kuluviit angucalurtaata ciruneminek kapkaku iliit tuqulluku, teggalqunek miluquluku tuqucimaarkauguq kemga-llu nerumaarkauvkenani; pikestii-llu qaillun pimangaunani. 29Tau͡gaam cirunermiaqenglallrukan ciungani, pikestiin-llu elpengcaumang'e'rmi petunrilkaku, tuquciluni-llu yugmek, tamarmek kuluvak angucaluq pikestii-llu teggalqunek miluqulukek tuqucimaarkauguk. 30Tau͡gaam pikestii akilirivkaqatni unguvayugluni akiliriarkauguq cuq'liumacimitun. 31Kuluviim-llu angucalua cirunermiaqengkan tan'gaurlurmek wall'u nasaurlurmek, au͡g'um ayuqiinek pimaarkauguq. 32Cirunermiaqengkan-llu cali angutmek wall'u arnamek teguamek tuqulluku, taum pikestiin akilirarkaugaa teguam angayuqra yuinaq qulnek cipluku (30) akinek, kuluviim-llu angucalua teggalqunek miluquluku tuqulluku.

33“Angun patuirikan petmigmek, wall'u elakan petmililuni patuvkenaku-llu, angucaluq wall'u ciulvak igeskan iluanun, 34petmiim pikestiin ungungssim pikestii akilirciqaa, piksugngaluku-llu tuqumalria ungungssiq. 35Angutem angucaluan tuquskaku allam angucalua, angutek unguvalria angucaluq tun'arkaugaak, akia-llu avegluku, tuqumalria-llu cali ungungssiq avgarkauluku. 36Tau͡gaam ciungani tuaten pilallrukan cirunermiarayugluni, pikestiin-llu petullrunrilkaku, ungungssiullgutiinek cimirciqaa tuqumalria-llu elliin piksugngaluku.

Yupik Bible

Yupik Bible © 2012 American Bible Society

More Info | Version Index