Search form

Exodus 25

Elliitet Kenciknarqellriamun Pelatekamun

1Ataneq qanertuq Moses-aamun, 2“Israel-aat qanruski elliisqelluki wangnun. Ciuniurucetniarpenga tengruluteng elliiyulriit elliitaitnek. 3Makut maa-i elliitait ciuniurarkaten: suulutaaq, qerrirliq, punerneq-llu; 4'lumarraqegtaar qiugliq, qesurliq, kavirliq, qusngit melqurrit; 'lumarraq qusngirngalnguut melqurritnek piliaqumalria; 5qusngim angucaluan amia iqucimalria kepcimaluni kavirlimek; qusngirngalnguut amiit iqutat; murak acacia; 6uqut kenurrat uqurkait; narnirqelriit ayuqenrilnguut, uqum minguketukiita narnirqelriit-llu aruvagkat piliaqessuutekait; 7teggalquqegtaaraat ayuqenrilnguut aturarkat as'arcen̄a'armun+ qat'gailitamun-llu qaraliqluki Agayulirten͞gunrem atutukainun. 8Agayuvigkameggnek wangnun pilikilit uitaniartua akuliitni. 9Taqniarci aklui-llu pisqumalqa nasvagarkaqa maliggluku.

Akqutem Yaassiiga

10“Yaassiililuci-llu murakegtaarmek acacia-mek, yuinaak malruk tallimanek cipluku (45) cetyaarnek taktaluku, yuinaq malrunlegnek (27) cetyaarnek iqtutalukek, yuinaq-llu malrunlegnek (27) cetyaarnek qertutalukek. 11Patulukek-llu suulutaamek iluagnegun elatiignegun-llu tamarkenka, menglelirlukek-llu suulutaamek avatiik qaqilluku. 12Teguyarirlukek-llu suulutaanek kulutnek cetamanek, elliluki-llu cetamanun kanagainun, malrutaarlukek atunem avatekek. 13Tegumiaqessuutekiurlukek-llu murakegtaaraagnek acacia-gnek suulutaamek-llu qallirrlukek, 14nuvullukek-llu kulutnun avategkeni yaassiigek uitalrianun. 15Tegumiaqessuutek nuvusngalararkauguk kesianek kulutegni au͡gaumangaunatek-llu. 16Imirlukek-llu malrugnek teggalqugnek tun'arkagemnek elpenun, tuani igausngaluteng qulen alerquutet.

17“Patulilukek-llu suulutaarrlainarmek yuinaak malruk tallimanek cipluku (45) cetyaarnek taktaluku, yuinaq-llu malrunlegnek cipluku (27) iqtutaluku. 18Malrugnek-llu cherubim-aagnek taqumalriignek mulut'uugumalriamek suulutaamek 19patum iquuk tamarkenka pikiurlukek. Piliaqekuvcikek patumun ilakliiyullukek piniagci. 20Cherubim-aak caumatarkaulutek patum qaingani, yaqukenka-llu nengingalriik patumaarkauluku. 21Teggalquk igarviik eklukek Yaassiigegnun patuluku-llu. 22Tuani tangerciqamken. Patuan-llu quliinek cherubim-aak-llu yaqukenka akuliignek qalaruciiqamken cikiutekluki elpenun tamalkuita alerquutenka Israel-aam yuinun.

Estuuluq Kelipanun Elliitngulrianun Agayutmun

23“Estuululiluci murakegtaarnek acacia-nek it'ganernek pingayunek taktarrluku, akimiaq pingayunek cipluku cetyaarnek iqtutaluku, cali yuinaq malrunlegnek cipluku (27) cetyaarnek qertutaluku. 24Qainga-llu patuluku suulutaarrlainarmek avacirluku-llu cali suulutaamek. 25Mengleliluku-llu suulutaamek pingayunek cetyaarnek iqtutarrluku kassutmun, nutaan-llu tamana menglii avacirluku suulutaamek. 26Cetamanek kulutnek kangiraikun elliivikluku kanagain nunaitnun. 27Kulutet muriik uitavigkakek ayagatsuutekak estuulum mengliin nuniinun elliniaci. 28Muriik piliaqumaarkauguk acacia-mek murakegtaarmek suulutaamek qallircimalutek. Estuuluq ayagat'larciqaat tamakuk aturlukek. 29Qanciluci, saskiluci, mercuuciluci, qantanek-llu wine-at elliitet assigtarkaitnek. Makut tamarmeng suulutaarrlainarmek piliaqumaarkaugut. 30Estuuluq ellimaarkauguq manuanun Akqutem Yaassiigtaan, qainga-llu estuulum kesianek pitangqelararkauguq kenciknarqellriamek kelipamek wangnun elliitekumalriamek.

Kenurrarvik

31“Kenurrarvililuci-llu suulutaarrlainarmek, tusngallra napalriara-llu taqlukek mulut'uugumalriamek suulutaamek; naunrai tangnircautai naugaaralriit kenurrait-llu ilakliiyulluki kenurrarvigmun. 32Arvinelgen avayat nengumavkarluki avataini, pingayuuqaqluki. 33Tamarmeng avayat pingayutaarluteng naunrangqerrarkaugut qerrunqegturalrianek atsanek naugaariluteng qikmirualegnek. 34Napalriara kenurrarviim cetamanek tangnircautengqerrarkauguq naunrarnek avayat piicetun ayuqellrianek. 35Tamarmeng avayat aciat naugaaralriartangqerrarkauguq. 36Naugaaraat, avayat, kenurrarvik-llu tamarmeng atauciurneruluteng taqumaarkaugut mulut'uugumalriamek suulutaarrlainarmek. 37Kenurraliluci-llu malrunlegnek kenurrarvigmetarkanek, elliluki-llu manutmun ciqinqerarkaurrluki. 38Kenurriurcuutet uitaviit-llu suulutaarrlainauluki. 39Aturluci yuinaat pingayun akimiarmek cipluku (75) uspernek suulutaarrlainarmek piliaqniarci kenurrarvik aklui-llu. 40Mulngakluku maligqurluku ayuqucirtuuteka ingrimi piniarci.

Yupik Bible

Yupik Bible © 2012 American Bible Society

More Info | Version Index