Search form

Exodus 26

Pelatekaq Agayuvik+

1“Taqniarci ilua Pelatekam Agayuviim qulnek aturluci 'lumarraqegtaarnek qilaumaluteng tapeqluku qiugliq, qesurliq, kavirliq-llu qusngim melqurra. Menglii qaralilirluku Cherubim-aanek. 2Tamalkuita angtatekluki akimiarunrita'arnek yaaltanek taktarrluki malrugnek-llu yaaltagnek iqtutarrluki. 3Mingqulluki talliman atauciurrluki, allat-llu talliman tuaten cali piluki. 4Putulirlukek-llu qiuglimek 'lumarrarmek elalirnerkakegnegun tamarkenka taqumalriik. 5Yuinaak malruk qulmek cipluku (50) putunek ellivikluku ciuqliq ayagnerakun 'lumarrakun aipaa-llu nangneqliakun. 6Pililuci-llu yuinaak malruk qulnek cipluku (50) negciyagarnek suulutaanek, tamakutgun taukuk itusngaarkaulutek atauciurrlutek.

7“Pelatekaq-llu patukiurluku qula ataucimek cipluku 'lumarrarnek qusngirngalnguut melqurritnek piliaqumalrianek. 8Angtatekluki taqniaci, taktaluki yaaltanek akimiarnek iqtutaluki-llu yaaltagnek malrugnek. 9Mingqulluki talliman atauciurrluki, aipaani-llu arvinelguluki mingqulluki, atauciq arvinelgat tapluku taplegtekluku manuani Pelatekam. 10Putulirluku aipaa nangneqliata itucimalriit mengliikun yuinaak malruk qulnek cipluku (50) aipaan-llu cali menglii tuacetun. 11Yuinaak-llu malruk qulmek cipluku (50) punernernek negcililuci itullukek-llu tamakutgun malruk atauciurrlukek patukaurrlukek. 12Agarrluku aipaan cipnera tunulirneranun Pelatekam. 13Iqukegni-llu yaaltam avga atunem avategkeni Pelatekam aqevlavkarlukek, patukutaqlukek.

14“Malrugnek cali patuliluci, atauciq ingrirmiutaat amiitnek kavircimalrianek aipaa-llu qecigkilngurnek qecignek qalliuluni patuugarkamek.

15“Naparyai Pelatekam murakegtaarmek acacia-mek pililuki. 16Atauciq akimiarnek it'ganernek taktaluku, yuinaq-llu malrunlegnek cipluku (27) cetyaarnek iqtutaluteng. 17Naparyat malruuqaqluki ayuqellrianek pairutlerkiraqluki, tamalkurmeng allat tuaten pingqerturararkauluteng. 18Ungalalirnera yuinarnek enerkiurluku, 19yuinaagnek-llu malrugnek (40) tusngallerkiurluki qerrirlimek malruugurluki ataucimun enerkiuramun, nayumiqastekevkarluki malrugnun aningalriignun. 20Neglirnera-llu yuinarnek (20) enerkiurluku, 21yuinaagnek-llu malrugnek (40) qerrirlimek enerkiurat acikaitnek, malrutaarluki naparyat acilirluki. 22Tunua-llu Pelatekam kanavalirnera arvinlegnek naparyirluku, 23kangirai-llu malrutaarluki. 24Kangirami enerkak itullukek aciagnegun, itusngaarkaulutek quletmun. Malruk naparyak acikek avvingaarkauguk kangkek tau͡gaam kulutmun ataucimun quyurcimalutek, malrugnek kangiralegtun ayuqerkaulutek. 25Pingayunlegnek naparyangqerrarkauluni akimiaq ataucimek cipluku qerrirlimek acikarluteng, malrutaarluteng atauciq enerkiuraq.

26“Akimiarnek-llu qer'aqrucirluku murakegtaarmek acacia-mek, tallimanek cali Pelatekam ingluan enran pikainek, 27talliman-llu enrinun akiani, talliman-llu kanavalirnermi tunuani. 28Qer'aqrun ellimaarkauluni qukaanun qulmun enran Pelatekam iquanek ayagluni amavet iquanun. 29Enerkiurat suulutaamek qallirrluki suulutaanek-llu kulutnek itucirluki. 30Naparrluku Pelatekaq picirkiurumaciatun nasvitellrucimtun ingrim qaingani.

31“Capkucirluku-llu 'lumarraqegtaarmek qilaumaluteng ilakluteng qiugliq, qesurliq, kavirliq-llu. Menglait-llu qaralilirluki cherubim-aanek. 32Agarrluku-llu cetamanun murakegtaarnun acacia-nun naparyanun suulutaamek qallircimalrianun, aciit qevlercetellrianun tusngaluteng negcignek-llu agaruterluteng. 33Uitavkarluku negcigni nalqigluteng pimalrianun qiliini Pelatekam, elliluku-llu Akqutem Yaassiiga imalek igarviignek teggalqugnek tunuanun capem. Capem avgumaarkaugaa Tanqilria Tanqipialriamek. 34Patuluku-llu Akqutem Yaassiiga. 35Tanqikapiaralriim elatiinun elliiniartuci estuulumek mengelmun neglirnermun kenurrarvik-llu ungalalirnermun.

36“Iteryaraa-llu Pelatekam capkutarkiurluku 'lumarraqegtaarmek, ilakluteng qilaumalrianek qiugliq, qesurliq, kavirliq-llu. Menglii-llu mingeqluku canguanek tangnircarluku. 37Piliniartuci-llu tallimanek naparyanek murakegtaarnek acacia-nek capkutam pikainek qallilirluki suulutaanek; negciit-llu cali suulutaamek piliaqumaarkauluteng tusnganerkiurluki-llu tallimanek punernernek.

Yupik Bible

Yupik Bible © 2012 American Bible Society

More Info | Version Index