Search form

Exodus 28

Agayulirtet Aturait

1“Taisqiu anelguten Aaron-aaq qetunrai-llu Nadab, Abihu, Eleazar, Ithamar-aq-llu allakarluki Israel-aam yuinek, kevgiurniaraatnga agayulirten͞guluteng. 2Agayulirtetarnek aturaliniaran anelguten Aaron-aaq, takarnarqutkainek tangnirqutkainek-llu. 3Quyurrluki tamalkuita elisngalriit calistet cikillrenka piyugngacimek, qanrulluki-llu Aaron-aaq aturalisqelluku. Naaqicimaniartuq agayulirten͞gurrluku kevgiullerkaanun wangnun. 4Maa-i makut aturat piliarkait: qat'gailitaq, as'arcen̄a'ar, qalliq qaraliliumalria, nacaq nemrucaraq, iqtulria-wa naqugun. Makut taq'erkaugait aturat Aaron-aamun qetunrainun-llu agayulirten͞guluteng kevgiurniaraatnga. 5Caliaqestait makunek aturluteng piniartut: qiuglinek, qesurlinek, kavirlinek-llu qusngit melqurritnek 'lumarrarnek; suulutaanek yualukanek 'lumarraqegtaarnek-llu.

6“As'arcen̄a'ar piliaqniaraat qiuglinek, qesurlinek, kavirlinek-llu qusngit melqurritnek 'lumarrarnek, suulutaamek yualukamek, 'lumarraqegtaarnek-llu, mingeqluku tangnircaumaluku. 7Tusailitangqerciquq malrugnek mingqusngalriignek menglegkenun, taukugnegun itutelararkaulukek. 8Naqugutmek-llu pililuci 'lumarrarmek taqumalriamek, as'arcen̄a'armun piliaqellerpeci ayuqiinek, mingqulluku-llu as'arcen̄a'armun atauciurrlukek. 9Malrugnek-llu ayuqenrilngurnek qaralilgegnek teggalquqegtaaraagnek piluci, qaingagnun-llu igaulluki atrit qula malrugnek cipluku Jacob-aam qetunrai, 10igaulluki tungliqutaciicetun yuurtellrita, arvinlegnek aternek atauciq aipaa-llu cali arvinlegnek. 11Teggalquliurtem̄un caliaqevkarlukek igautelluki Jacob-aam qetunrain atrit ellilukek-llu suulutaamek tusngallirlukek. 12Taukuk-llu teggalquk ellilukek as'arcen̄araam tusailitagkenun umyuaqutnguvkarlukek Israel-aam qetunrainun; Aaron-aam ang'aquralarciqai atrit tusgegmini. Tuaggun wiinga Ataneq umyuaqerrlainalarnianka yuunka. 13Pililuci malrugnek suulutaagnek tusngallerkagnek 14malruinek-llu kalivnernek suulutaarrlainaagnek qipumalriignek ilavkuyagartun ayuqlirilukek, tusngallerkiuragnun-llu ellilukek.

Qat'gailitaq

15“Qat'gailiciluku-llu agayulirten͞guneq atulararkaanek taringnaurqami Agayutem piyullranek. Taqniarci 'lumarrarnek as'arcen̄a'armun atullerpeci ayuqaitnek aturluci tangnircautai-llu ayuqluki. 16Yaassiigenqeggarkauguq tapluku-llu malruurrluni, qulngunrita'arnek-llu cetyaarnek iqtutaluni qulngunrita'arnek-llu taktaluni. 17Ellivikluku cetamainek nalkuralrianek teggalquyagarnek. Ciuqlirmun elliiluci ruby-mek, topaz-aamek, garnet-aamek-llu; 18tunglianun-llu emerald-aaq, sapphire-aq, diamond-aaq-wa; 19pingasuingatnun-llu turquoise-aq, agate-aq, amethyst-aaq-wa; 20cetamaingatnun-llu beryl-aamek, carnelian-aamek, jasper-aamek-llu. Makut tusnganengqerrarkauluteng suulutaamek. 21Makut tamarmeng qula malrugnek cipluku teggalqut igangqerrarkaugut atritnek Jacob-aam qetunrain, nallunairluki ilakellriartai Israel-aam yuin. 22Qat'gailitaq-llu qipumalrianek kalivnernek suulutaanek pikiurluku. 23Malrugnek-llu kulutegnek ellivikluku qulirnerkun kangiragkenkun, 24qillrullukek-llu malruk qipumalriik kalivnerek kulutegnun. 25Iqukek-llu kalivnerek qillrullukek tusngallerkiuragnun, tuaten pikunek ellimaarkauguk manulirneragnun tusailitagken as'arcen̄araam. 26Pililuci cali malrugnek kulutegnek suulutaagnek, ellilukek-llu atlirneran kangiraagkenun qat'gailitam ilulirnermun as'arcen̄araam tunglirneranun. 27Allagnek cali kulutegnek pililuci, ellilukek-llu atlirmun iqukegnun as'arcen̄araam tusailitagken naqugutiin quliinun. 28Qillrulluki kulutet kulutngullgutaitnun qiuglimek pelacinagmek, qat'gailitaq as'arcen̄a'armek au͡g'arrngairulluku.

29“Aaron-aaq itquni Tanqilriamun una qat'gailitaq aturarkaugaa, igaumalria ilakelriartainek Israel-aam, tua-i-wa Wiinga Ataneq, umyuaqerrlainararkauluki yuunka. 30Ellilukek Urim-aaq Thummim-llu+ qat'gailitamun, Aaron-aam ang'aqlukek it'larniartuq tanqilriamun ciuqamnun. Cayarani kesianek atularniaraa una qat'gailitaq. Tuaten taringelarniaraa piyulqa Israel-aam yuinun.

Allat Agayulirtet Aturait

31“Qalliq as'arcen̄a'armun iluqliuluku aturarkaq taqumaarkauguq qiuglirrlainarmek qusngim melqurranek 'lumarrarmek. 32Una ukinengqerrarkauguq qamiqum pugyararkaanek, ukineq-llu mingqulluku menglelirluku allegyailkucirluku. 33-34Kinguqerra kassutmun atsaruanek qiuglinek, qesurlinek, kavirlinek-llu qusngim melqurrinek 'lumarrarnek, akuleliluki suulutaanek kuluk'uunarnek. 35Aaron-aam una atularciqaa agayulirten͞guluni kevgiuraqami. Itraqan ciuqamnun Tanqilriamun wall'u tuaken an'aqan, kuluk'uunaat nepiit niitnarqelaasqelluki, niitnailkata tuqunayukluku.

36“Tangnircautmek pililuci suulutaamek igarluku-llu qaingakun, ‘Allakaumalria Atanermun.’ 37Tauna-llu qillrulluku manulirneranun qamiqurran nemran qiuglimek pelacinagmek. 38Aaron-aam una atulararkaugaa qauramini. Tua-i wiinga Ataneq ciuniulararkauluki elliitait Israel-aat wangnun umyuaqulluki pimalriit, yuut iliini alartelangraata elliigaqameng tamakunek.

39“'Lumarraqegtaarmek pililuci keggaqlirkiuqiciu Aaron-aaq nacaliluku-llu cali. Cali-llu qamiqurra nemliluku, naqugutkiurluku-llu tangnircarluku yualukayaarnek mingqusngalrianek.

40“Keggaqlililuki, naquguciluki, nacaliluki-llu Aaron-aam qetunrai, takarnarqutkaitnek tangssunarqutkaitnek-llu. 41At'elluki makut aturat anelgutevnun Aaron-aamun qetunrainun-llu, naaqilluki-llu wangnun allakarluki. Mingugluki-llu olive-aam uquanek kevgiurniaraatnga agayulirten͞guluteng. 42Qerrullililuki-llu nanilngurnek qukaatnek ciisqurritnun tekisngalrianek, uatait alaiteksaunateng piniartut. 43Aaron-aam qetunrani-llu kesianek atularniarait Pelatekamun Agayuvigmun itraqameng. Wall'u ekuavik ullagaqamegteggu agayulirten͞guluteng kevgiuqata'arqameng Tanqilriami, tuqucimanritniartut matangqacirteng pitekluku. Man'a caqtaarpek'nani picirkauguq Aaron-aamun kinguvrinun-llu.

Yupik Bible

Yupik Bible © 2012 American Bible Society

More Info | Version Index