Search form

Exodus 29

Ayuqucirtuutet Naaqicimallerkaatnun Aaron-aaq Qetunrai-llu

1“Waten piarkauguten naaqiskuvki Aaron-aaq qetunrai-llu agayulirten͞gurrluki caliamnun: upluci ataucimek piyagarmek nulirtem̄ek malrugnek-llu angucalugnek qusngignek natlugnerilnguugnek. 2Mukaarkat-llu assinritnek tau͡gaam quuleciraunaku, kelipiluci olive-aat uquitnek ilaluku ilait tau͡gaam ilaunaki. Ilait-llu mamkunaki assaliayaartun elucilirluki olive-aat uquitnek mingugluki. 3Caqumun ekluki elliitekluki-llu wangnun ekuagikuvet nulirtem̄ek angucalugnek-llu qusngignek.

4“Tailluku Aaron-aaq qetunrai-llu iteryaraanun Pelatekam Agayuuviim upyutmek-llu ervuqertelluki. 5Nutaan Aaron-aaq agayulirtet aturaitnek ac'etniarci, keggatmek, 'lumarrarmek-llu as'arcen̄araam iluqlianek, as'arcen̄a'armek, qat'gailitamek, naqugutmek-llu. 6Nacaq-llu nemrucaraq at'elluku, tuavet-llu elliluku kencignarqelria naaqicimallran nallunailkutaa igaumaluni, ‘Atanermun Allakaumalria.’ 7Uquq-llu tua-i teguluku qamiqurranun kuvluku mingugluku-llu.

8“Qetunrai-llu tailluki keggatnek at'elluki. 9Naqugucirluki nacarluki-llu nemrucaranek. Tuaten naaqitarkaugan Aaron-aaq qetunrai-llu. Ellaita kinguvrita-llu kevgiurciqaatnga agayulirten͞guluteng akwarpak.

10“Nulirtem̄ek tailluci Pelatekam Agayuviim ciuqerranun, Aaron-aaq-llu qetunrai-llu qanrulluki unatait ellisqelluki taum qamiqurranun. 11Tuqulluku-llu nulirta tuani tanqilriami ciuqamni iteryaraani Pelatekam Agayuviim. 12Nulirtem augan iliinek piluten, yuararpegun-llu ekuaviim kangran kangiraini anngalriit mingugluki; ilii-llu augem kuvluku acianun ekuaviim. 13Nulirtem qiluin uquat tenguan-llu picalqurra, tartuk-llu uqurtuumakenka, ekuaniaci ekuavigmi elliitekluki wangnun. 14Tau͡gaam nulirtem kemga amirtuumaan qilui-llu ekuaniaci nunavci elatiini. Man'a elliitnguuq agayulirtet assiilnguita au͡gautekaatnun.

15“Cali teguluku angucalum qusngim aipaa, Aaron-aam-llu qetunrain-llu unatait qamiqurranun ellivkarluki. 16Tuquqaarluku auga ciqertautniarci qacarnerinun ekuaviim. 17Kepurluku-llu temii erurluki-llu ilurrlui iruk-llu kingulirnerek. Elliluki-llu allat natain qamiqurran-llu qaingatnun. 18Nutaan-llu ekualuku tamalkuan ekuaviim qaingani, neqkauluku elliitekluku. Tepii mat'um elliitem ilukegcinarquq wangnun.

19“Cali teguluku aipaa angucaluq qusngiq naaqicissuutekaq, Aaron-aam-llu qetunrain-llu unatait qamiqurranun ellisqelluki. 20Tuquqaarluku augan ilii minguutniarci Aaron-aam qetunrain-llu tallirpilirneret ciutaita atlirneritnun, cali-llu tallirpilirneritnun ayautaitnun, tallirpilirneritnun-llu putukuitnun. Ilakuaq-llu auk ciqrulluku ekuaviim caniqerrinun. 21Augem-llu iliinek ekuaviim qainganelngurmek uqumek-llu qevcallerrluki Aaron-aaq, qetunrai, aturait-llu, allakaumaarkaurtelluki wangnun.

22“Angucalum qusngim uqua pamyua-llu au͡g'arluku uqurtuumaan, ilurrluin-llu uqua, tenguan-llu picalqurra, tartuk-llu uqurtuumakenka, tallirpilirneq-llu qugtuqaa, 23issratmek-llu tegulluci kelipanek ayuqenrilngurnek ataucitaarluki: cake-aamek uqulegmek aipirluku uquilngurmek assaliayaartun ayuqelriamek elliitekumallernek wangnun. 24Makut-llu tamalkuita unataitnun Aaron-aam qetunrain-llu elliluki allakaraurrluki elliitnguvkarluki wangnun. 25Nutaan-llu unataitnek teguluki ekualuki ekuavigmi, qainganun elliluki ekuagarkam elliitem, neqkauluki elliitnguluki wangnun. Makut tepiit ilukegcinarquq wangnun.

26“Qat'gai-llu qusngim angucalum Aaron-aam naaqicimallranun atuullrem, yagulluku elliiyarakun elliitekciqerci Atanermun; tauna-llu elpeci pikarkauluku.

27“Agayulirta naaqicimaaqan angucalum qusngim qat'gai qugtuqaa-llu naaqiciyarami elliitngulriit wangnun elliitnguarkaugut, allakaumaluteng-llu agayulirtet pikarkauluki. 28Wiinga cimirngaunaku picirkiuraqaqa waten yuut piyarami elliigaqata ilakuyucimun, tamakut qat'gai qugtuqaa-llu angucalum qusngim agayulirtet pikarkauluki. Una elliin cikiutnguuq wangnun Atanermun.

29“Kencignarqelriit Aaron-aam aturai kinguvarcimaarkaugut qetunrainun tuqullran kinguani, ellaitnun atulararkauvkarluki agayulirten͞gurrluki naaqicimaaqata. 30Aaron-aam qetunraan agayulirten͞gurtellriim atani tuqukan, it'lararkam-llu Tanqilriamun kevgiurluni, atulararkaugai makut aturat malrunlegni ernerni.

31“Kemga qusngim naaqicissuutngullrem Aaron-aamek qetunrainek-llu keniqiciu qallaulluku tanqilriami. 32Aaron-aankut qetunrani-llu nerniaraat qusngim kemga issratmelngurnek kelipanek ilaluku Pelatekam Agayuviim amiigani. 33Ner'arkaugait assiilngurmun au͡g'aritnguluteng atullret naaqicimallermeggni. Kiimeng agayulirtet makut ner'arkaugait, tua-i-wa kenciknaqngata. 34Kemget wall'u kelipat ilakuarukata unuakullranun ekuavkaqiciki; nerumaarkaunritut, tua-i-wa kenciknaqngata.

35“Ernerni malrunlegni naaqiciyaraq aturniarci Aaron-aamun qetunrainun-llu, alerquutekellrenka tamalkuita aturluki. 36Erenret tamalkuita elliilarniartuci nulirtem̄ek ekuagiluci assiilnguum au͡gautekaanek. Waten pillerpeci menuiruciiqaa ekuavik, nutaan-llu kuvluku uqumek kencignarcarluku. 37Waten pilarniartuci ernerni malrunlegni. Nutaan-llu ekuavik tanqigilriarurciiquq tamarmi; yuunge'rmi wall'u caunge'rmi agturtii tanqilriarullran pinian picurlagcetarkauluku.+

Ernerni Tamalkuitni Elliitet

38“Waniwa elliitek'lararkaten ekuavik aturluku: qusngiyagaagnek malrugnek ataucimek allrakungelriignek elliilarciquten unuaquaqan. 39Ekuagaqluku aipaa unuakumi aipaa-llu atakumi. 40Ciuqliq qusngiyagaq tapilarniarci elliiluci malrugnek usperegnek mukaamek, urcimalriamek urucirluku saskat cetaman imaitnek olive-aat uquatnek. Saskat-llu cetaman imaitnek wine-amek elliitekamek. 41Ekualuku-llu aipaa atakumi, tapirluku amllertataitnek mukaam, uqum, wine-am-llu unuakumi pillerpeci. Una elliitnguuq wangnun Atanermun, tepiin-llu ilukegcivkaraanga. 42Taqsuunaku man'a ekuagiyaraqciqerci elpeci kinguverpeci-llu Pelatekam Agayuviim amiigani Atanrem ciuqerrani. Tuani tangerciqamci qalarulluten-llu elpet. 43Tuani tangerciqanka Israel-aam yui, tauna-llu ucurnarqucima kenciknarivkarciqaa. 44Tanqigiciqagka-llu Pelatekaq Agayuvik ekuavik-llu, allakarluki-llu Aaron-aaq qetunrai-llu kevgiuresqellua agayulirten͞guluki. 45Uitallgutkeciqanka-llu Israel-aam yui Agayutkeciqaatnga-llu. 46Nallunriciiqaat-llu Atanruciqa ellaita Agayutiit, anutestekellrat Egypt-aamek ilagarnaluki. Wiinga Atanruunga Agayutiit.

Yupik Bible

Yupik Bible © 2012 American Bible Society

More Info | Version Index