Search form

Exodus 3

Agayutem Qayagauraa Moses-aaq

1Erenret iliitni Moses-aam tariknginanermini qusngii qusngirngalngui-llu cakimi Jethro-m, agayulirtiin Midian-aam, ciuliqaggluki qeraraa maraq tekilluni-llu Sinai-amun tanqilriamun ingrimun. 2Tuani Atanrem an'gilaan alairvikaa kenerkun culugtaat akunliitnek. Moses-aam-llu tangrrai culugtaat ekualuteng tau͡gaam ekuange'rmeng qameksaunateng. 3Moses-aaq umyuartequq, “Mat'umi-lli irr'inaqvaa! Ciin culugtaat ekuange'rmeng qamyunritat, malkanirluki tangerqerlaki.”

4Atanrem tangrramiu Moses-aam canimelliinaucia qayagauraa qukaatnek culugtaat qanerluni, “Moses-aaq, Moses-aaq.”

Kiuguq-llu, “Aa-ang, wani-wa.”

5Agayun qanertuq, “Taikaniryaqunak. Kamilarten tau͡gaam, nangengqaviin tauna tanqilriaruan. 6Ciuliarpet Abraham-aam, Isaac-aam, Jacob-aam-llu Agayutkaatnga.” Moses-aam-llu kegginani capaa alingluni tangllerkaanek Agayun.

7Tua-llu Ataneq qanertuq, “Tangellruaqa nangteqluteng yuullrat yum'a Egypt-aami, niitaqa-llu piicautiit aviutesqelluteng atanirturtem̄eggnek. Nallunritaqa tamalkuan nangteqellrat. 8Taumek atrartua aviutnaluki Egypt-aarmiunek, anutnaluki-llu Egypt-aamek ayaulluki-llu assilriamun pivigtulriamun nunamun, Canaanite-at, Hittite-at, Perizzite-at, Jebusite-at-llu watua uitallratnun. Tauna nuna naungignarqelriaruuq enuqitnaunani-llu milegmek evegtaat neqaitnek. 9Ilumun niitaqa qiallrat yum'a tangerrluku-llu qaillun Egypt-aarmiunun nangyuciat. 10Watua ayagcetqataramken Egypt-aam angayuqranun Pharaoh-mun ciuliqagtesqelluki yuunka ayaulluki nuniinek.”

11Tau͡gaam Moses-aaq qanertuq Agayutmun, “Wiinga caunritua. Qaillun ayagciqsia Egypt-aam atanranun Israel-aat-llu anulluki Egypt-aamek?”

12Agayutem kiugaa, “Wiinga nayurciqamken. Egypt-aamek-llu anucimarikuvki kevgiurciqerpenga wani ingrimi; tuatnallren nallunailkutauciquq wiinga ayagcecillrucimnek elpenek.”

13Tau͡gaam Moses-aaq kiuguq, “Ayakuma, Israel-aat-llu qanruskumteng, ‘Agayutiita ciuliarpeci ayagcetaanga elpecen̄un,’ apciiqaatnga, ‘Kitumek atengqerta?’ Tua-llu camek qanerciqsia?”

14Agayun-llu kiuguq, “Wiinga Wanguunga. Waten qanruskiki Israel-aam yui, ‘Wanguunga-mek+ aprumalriim ayagcetaanga elpecen̄un.’ 15Waten qanqina Israel-aam yuinun, ‘Atanrem, Agayutiita ciuliarpeci, Agayutiin Abraham-aam, Isaac-aam, Jacob-aam-llu ayagcetaanga elpecen̄un.’ Una atqaqa iquklicuilngurmek. Una ukegkut kinguverkat tamarmeng tuqluutek'larciqaat wangnun. 16Ayagluten quyureski ciuliqagtait Israel-aat ataucimun qanrulluki-llu wiinga, Ataneq, Agayutiitni ciuliarita Abraham-aam, Isaac-aam, Jacob-aam-llu, elpenun alaillrunilua. Qanrutniaten wangnun tangellruniluku qaillun pimaciat Egypt-aami. 17Picirkiurtua anutarkauluki Egypt-aamek nangcimallratnek, ayautarkauluki-llu nunamun enuqitnailngurmun naungiqnarqellriamun-llu nuniitnun Canaanite-at, Hittite-at, Amorite-at, Perizzite-at, Hivite-at, Jebusite-at-llu.

18“Yum'a niiciiqaat ellaitnun qanellren. Ciuliqagtait Israel-aat malikluki Egypt-aam angayuqra ullagluku qanrutniarci, ‘Ataneq Agayutiit Hebrew-t alaillruuq wangkutnun. Watua ayagceskut ayagniartukut pingayun erenret aturluki yuilqumun, tuani ekuaginiartukut Atanermun Agayutemten̄un.’ 19Nallunritaqa Egypt-aam angayuqran ayagcessngaitaaci ellmini pininrulriim pivkanrilkani. 20Tau͡gaam piniqa aturluku anucimirqecetaarciqaqa Egypt-aaq, alingnarqellriit pivkarluki tuani. Nutaan tamatum kinguani ayagceciiqaaci.

21“Egypt-aarmiunun takaqevkarciqamci, taumek yuunka ayakuneng camek tegumiarilngaitut. 22Tamarmeng arnat Israel-aat kaigavikeciqait elaqliteng enelguteteng-llu Eygpt-aarmiut aturanek, kenugutnek-llu suulutaanek qerrirlinek-llu. Israel-aat-llu makut ac'eciiqait qetunrameggnun panimeggnun-llu, tuaten-llu piluteng uayarciqait tukuutaitnek Egypt-aarmiut.”

Yupik Bible

Yupik Bible © 2012 American Bible Society

More Info | Version Index