Search form

Exodus 30

Ekuavik 'Legcivigkaq Tepkegcilrianek

1“Ekuavilikici murakegtaarmek acacia-mek tepkegcilrianek ekuavigkamek. 2Yaassiigenqeggarkauguq, akimiaq pingayunek cipluku cetyaarnek taktaluni, akimiaq-llu pingayunek cipluku cetyaarnek iqtutaluni, it'ganernek-llu pingayunek qertutaluni. Qaingan kangiraini pugumalriit ilakliiyusngaarkauluteng taumun. 3Qaingan qacarneri tamalkuita pugumalriari-llu patuluki suulutaamek, suulutaamek-llu menglelirluku. 4Malrugnek-llu suulutaagnek kulutegnek teguyarirluku mengliin aciakun avategken'gun, uitavigkiurlukek muriik ayagatsuutekak. 5Makuk ayagatsuutekak murakegtaaraulukek acacia-rulukek qallirrlukek-llu suulutaamek. 6Una ekuavik elliniarci capem elalirneranun agalriim ciuqerrani Akqutem Yaassiigan. Tuani wiinga tanglarciqamken. 7Unuakullra tamalkuan Aaron-aam kenurrat auluksarturaqamiki tuani aruviaralarniartuq tepkegcilriamek. 8Tuaten-llu cali pilarniartuq atakumi kenurrat kumartaqamiki. Una elliiyaraq aruviarnek atulararkaugarci taqsuunaku kinguverpeci-llu. 9Inerquusngalrianek wani aruvagkanek ekuagiksaunaci wall'u ungungssinek mukaarkanek-llu. Elliiksaunaci-llu wine-amek kuvluku qainganun. 10Allrakumi ataucirqumek Aaron-aam menuircalararkaugaa ekuavik, kangiraini pugumalriit augmek mingugluki, ungungssim assiilnguut au͡gaumallerkaatnun ekuamallrem auganek. Man'a atularciqerci ataucirqumek allrakum iluani taqsuunaku ukanirpak. Una ekuavik kencignarqeqapiartuq Atanermun.”

Akiliquraun Pelatekam Agayuviim Pikaa

11Ataneq qanertuq Moses-aamun, 12“Israel-aam yui naaqekuvteng atauciuqaqluteng unguvaseng akilirciqaat Atanermun, cangerlagpak ellmeggnun tut'esqevkenaku naaqumallermeggni. 13Tamarmeng naaqutngulriit akilirarkaugut pisqumatacirmegcetun, cuqcimalriamek tamatum nalliini cuqciyaraat aturluku. Man'a tamarmeng akilirarkaqaat wangnun elliitekluku. 14Tamarmeng naaqutngulriit angutet yuinarnek allrakungelriit cipluku-llu, akiliriciqut elliitekluku Atanermun. 15Tukuulriim cipluku pingaunani, arrsaulriim-llu cali enurrluku pingaunani, Atanermun elliikuvci unguvavci akikaanek. 16Avularniaten akit yuinek Israel-aam aturluki-llu Pelatekam Agayuviim piilutainun. Una akiliquraun unguviita akiliutekaa, wiinga-llu nalluyagusngaitaqa cayailkuciumallerkaat.”

Punerneq Ermigcuun

17Ataneq qanertuq Moses-aamun, 18“Punernermek ermigcuuciluci punernermek-llu tusnganirluku. Elliluku-llu akuliignun Pelatekam Agayuviim ekuaviim-llu, mermek-llu imirluku. 19Aaron-aam qetunrani-llu atularciqaat meq eruraqamegteki unateteng it'gateng-llu 20Pelatekamun Agayuvigmun iterpailegmeng wall'u ekuavik ullagpailegmegteggu ekuagiyarturluteng Atanermun. Waten pilaqilit tuqucimanritniartut. 21Unateteng it'gateng-llu erularciqait tuqunritnaluteng. Man'a piciryaraugarkauguq, ellaita kinguveteng-llu atulararkauluku akwarpak.”

Minguugarkaq Uquq

22Ataneq qanertuq Moses-aamun, 23“Tepkegcilrianek ayuqenrilngurnek piluten: qula malrugnek cipluku usperegnek myrrh-amek, arvinlegnek uspernek narnirqellriamek cinnamon-aamek, arvinlegnek uspernek tepkegcilriamek cane-amek, 24qula-llu malrugnek cipluku cassia-mek, tamarmeng usperumaluteng (tamatum nalliini usperiyaraq aturluku). Atauciq-llu gallon-aaq olive-aat uquat avulluku. 25Tamakut aturluki kencignarqellriamek mingugkiurniartuten pilauciicetun tepkegcauciaqameng tepkegcaucitulit. 26Tauna aturluku mingugniaran Pelatekaq Agayuvik, Akqutem-llu Yaassiiga, 27estuuluq tamalkuita-llu aklui, kenurrarvik aklui-llu, tepkegcilrianek-llu aruviarvik, 28elliitet ekuaviat aklui tapeqluki, ermigcuun tusngallra-llu cali. 29Makut waten piluten allakarciqaten tanqilriarurtevkarluki. Caunge'rmi yuunge'rmi agturtii picurlagcecimaciquq tanqilriim piniakun.+ 30Mingugluku-llu Aaron-aaq qetunrai-llu, naaqilluki-llu, agayulirten͞guluteng kevgiurniaraatnga. 31Qanrulluki-llu Israel-aam yui, ‘Man'a tanqilria minguk atularciqaat kevgiulriit wangnun ukanirpak. 32Kuvumaarkaunrituq yuungina'arnun, aturluku-llu piliaqsaraa allamek ayuqiinek pilingaituci. Tanqilriaruuq, tuaten-llu aulukarkauluku tanqilriaruluku. 33Kia-llu ayuqelikaku wall'u atuqaku yugmun agayulirten͞gunrilngurmun tauna ilaungairuciiquq yumnun.’”

Aruviarkaq

34Ataneq qanertuq Moses-aamun, “Tegulluten amllertatekluki makut tepkegcilriit naunraat, stacte, onycha, galbanum, aruvagkaqegtaarkamek-llu frankincense-aamek. 35Aturluki-llu aruviarkiurluten, akuyulluki tepkegcaucitulim pilauciatun. Taryirluku-llu menuitniartuq tanqigluni-llu. 36Ilii-llu arilluku powder-aarrurrluku, Pelatekamun Agayuvigmun piluku Akqutem Yaassiigan ciuqerra kanevluku. Aulukciqan man'a tanqilriaruqapiaralriatun pitarrluku. 37Tuaten ayuqellriamek piliyaqunaci elpeci aturarkarpecen̄ek. Aulukekiu tanqilriatun pitarrluku allakaumalriatun wangnun. 38Kina imna ayuqiinek pilikuni elliin tepkegcauteknaluku, tauna ilaungairuciiquq yumnun.”

Yupik Bible

Yupik Bible © 2012 American Bible Society

More Info | Version Index