Search form

Exodus 31

Munalriit Caliaqestekai Pelatekam Agayuviim

1Ataneq qanertuq Moses-aamun, 2“Cucukellruaqa Bezalel-aaq, qetunraa Uri-m, tutgarii Hur-am Judah-m yuinek, 3pingevkallruaqa-llu pinimnek. Pingevkarluku-llu ayuqucingnamek, munaryaramek-llu, caliyugngarivkarluku munarnarqellrianek. 4Upciurallerkaanek-llu cat ayuqucirkaitnek caliaqluki-llu aturluki suulutaat, qerrirlit, punerneret-llu. 5Teggalquqegtaarnek-llu kepurillerkaa enekaitnun-llu elliaqluki, muraliulallerkaanek, allanek-llu munarcaarluni tangniqluki caliaqnarqellrianek. 6Oholiab-aaq-llu nakmikellruaqa, Ahisamach-am qetunraa, Dan-am yuinek, calillguciisqelluku Bezalel-aaq. Allat-llu elisngalriit calistet piyunarqucilillruanka caliaqesqelluki tamalkuita alerquutellrenka. Makuuluteng caliaqerkait: 7Pelatekaq, Akqutem Yaassiiga patua-llu, Pelatekam-llu aklui tamalkuita, 8estuuluq aklui-llu, kenurrarvik suulutaarrlainarmek piliaqumalria aklui-llu, aruviarmek-llu ekuavik, 9ekuavik elliitnek tamalkuita-llu aklui, ermigcuun acia-llu, 10tangkegcinarqelriit agayulirtet aturait, Aaron-aam qetunrain-llu atulararkait kevgiuraqameng agayulirten͞guluteng. 11Uquq mingugkaq, narnirqellria-llu aruvagkaq Tanqilriami. Makut caliaqellermeggni pisqelqa atuqapiarluku caliaqelararkaugait.”

Sabbath-aaq Mernuinercirvik

12Atanrem alerquraa Moses-aaq 13qanrutesqelluki Israel-aam yui, “Sabbath-aaq atuqiciu, mernuinercirvika, nallunailkutauciqngan elpecen̄un wangnun-llu akwarpak, kinguverpecen̄un-llu tamalkuitnun nallunritesqelluku wangnun yuk'ucirci. 14Una mernuinercirvik aturarkaugarci tanqilriaruan elpecen̄un; menulirtii tuqucimaarkauguq; kina-llu imna tuani ernermi calikuni tuqucimaarkauguq. 15Ernerni arvinlegni caliarkaci caliaqeciqaci tau͡gaam erenret malrunelgat Sabbath-aaruuq, mernuinercirviuluni tanqilriamun Atanermun; kina imna calilria uumi ernermi tuqucimaarkauguq. 16Israel-aam yuin aturarkaugaat una erneq kinguvertuumarmeng nallunailkutauvkarluku akqutmun. 17Nallunailkutauciquq nangyuunani wangnun Israel-aam-llu yuinun, ernerni arvinlegni Atanrem piliaqellruamikek qilak nuna-llu, erenret-llu malrunelgatni mernuinercirluni.”

18Agayutem qalarutenriamiu Moses-aaq Ingrim Sinai-am qaingani cikiraa malrugnek teggalqugnek igarviignek, elliin Agayutem igautellruluki taukugnun qulen alerquutet.

Yupik Bible

Yupik Bible © 2012 American Bible Society

More Info | Version Index