Search form

Exodus 33

Atanrem Israel-aat Ayaasqai Unilluku Ingriq Sinai-aq

1Ataneq qanertuq Moses-aamun, “Maaken ayagluci elpet yuut-llu Egypt-aamek anutelten, ayagluci-llu nunamun akqutkellemnun Abraham-aamun, Isaac-aamun, Jacob-aamun kinguvritnun-llu. 2An'gilamek ayagceciciqua ciuliqagtekarpecen̄ek, qimagceciiqanka-llu Canaanite-at, Amorite-at, Hittite-at, Perizzite-at, Hivite-at, Jebusite-at-llu. 3Ayakatartuci nuqlitnailngurmun naungignarqellriamun-llu nunamun. Tau͡gaam wiinga maliggngaitamci, niicuilnguungavci tumevcen̄i piunrirrnayukluci.”

4Man'a niitnirqenrilnguq yuut niicamegteggu angniirutut kenuguteteng-llu yuuluki. 5Atanrem-wa Moses-aaq alerqullruani qanrutesqelluki, “Elpeci niicuilnguuguci. Ellma nayuqacuaqaqumci piunriryaramci nangqapiggluci. Watua yuuciki kenuguceci wiinga-llu qaillun pillerkaqa elpecen̄un caliaqeciqaqa.” 6Tua-i Ingriq Sinai-aq unicamegteggu Israel-aam yui aturnanrirtut kenugutnek.

Pelatekaq Agayuvik

7Israel-aam yui arulairaqata Moses-aam kencignarqellria Pelatekaq Agayuvik napartelaraa yaaqvaariluku qavartarviat. Aterpagcimaluni Pelatekamek Tuanelvianek Atanrem. Tamarmeng-llu ayuqucingnauryulriit Atanermun tuavet ayalartut ullagaqluku. 8Moses-aaq-llu tuavet ayagaqan yuut pelatekameng amiigitni nangengqalartut tangvagluku iternatkaanun. 9Itrumariaqan Moses-aaq napalria amirluq atralartuq Pelatekam-llu amiigani uitaluni, Atanrem-llu Moses-aaq qalarut'laraa amirlumek. 10Yuut amirluq tangrraqamegteggu amiigani Pelatekam ciktelartut qigcigyugluteng. 11Atanrem Moses-aaq qalarut'laraa tungaunaku yuuk yugnikutellriik qalarut'lauciagtun. Moses-aaq utertaqan qavartaumavimeggnun pistii Joshua, Nun-am qetunraa, Pelatekami uitalartuq.

Atanrem Akqai Yun'i Nayurciqniluki

12Moses-aaq qanertuq Atanermun, “Ilumun qanrutellruarpenga wangnun ukut yuut ciuliqagtesqelluki tuavet nunamun, tau͡gaam kina maligkaqa apeqsaunaku. Qanellruuten nallunritnilua ilukegciteknilua-llu. 13Ilumun ilukegcitkekuvnga qanrusnga picirkiurarpenek, kevgiurnaamken ilukegcivkarturluten-llu. Umyuaqiu-llu cali uum nunarpiim yui elpenun nakmiin yuk'uciat.”

14Atanrem qanrutaa, “Maligciiqamci cirlakivkarluci-llu.”

15Moses-aaq kiuguq, “Maligtarkaunrilkuvkut maaken ayagcecaqunakut. 16Qaillun wii ukut-llu yuut nallunriciiqseta elpenun ilukegcitkucirput maligtenrilkuvkut? Nayuquvkut yugni allani maani nunami mistulriatun ayuqeciqukut.”

17Ataneq qanertuq Moses-aamun, “Qanrucirpetun piciqua, tua-i-wa nallunrilamken ilukegcitekluten-llu.”

18Moses-aaq-llu qanertuq, “Ucurnarqucin wangnun tangercessgu.”

19Ataneq kiuguq, “Ciuqerpegun kiturciqamken tangssunarquciqa tamalkuan tangerrniaran, tuani-llu qanruciiqamken kencignarqellriamek atemnek. Wiinga Atanruunga. Nakleksukenka-llu wiinga naklekarkauluki. 20Kegginaqa tangertessngaitaqa elpenun, yuum tangerqunia unguvangailan.” 21Ataneq-llu cali qanertuq, “Canimni teggalqumek pitangqertuq nangengqavigkarpenek. 22Ucurnarquciqa qitngirnarqellria kituqan teggalqum qerranqurranun elliciqamken unatemnek-llu patuluten kiturnatkamnun. 23Unatenka au͡g'aqumki tunuka tangerrniaran kegginaqa pivkenaku.”

Yupik Bible

Yupik Bible © 2012 American Bible Society

More Info | Version Index