Search form

Exodus 35

Ayuqucirtuutet Sabbath-aamun

1Moses-aam quyurtai tamalkuita Israel-aam yui qanrulluki-llu, “Makut maa-i Atanrem alerquutekellri elpecen̄un atuusqelluki: 2Ernerni arvinlegni caliarkaci caliaqeciqaci tau͡gaam erenret malrunelgat kencignarqellriaruciquq, erneq uitayaraq allakaumalria wangnun Atanermun. Yuk tuani ernermi calilria tuqucimaarkauguq. 3Uitavigpecen̄i-llu kenermek kumarcingaituci ernermi Sabbath-aami.”

Elliitekat Agayuvigkamun

4Moses-aam Israel-aam yui tamalkuita qanrutai, “Waten Ataneq alerquriuq: 5Elliici Atanermun. Tamarmeng yuut piyuumilriit taiskilit Atanermun elliiluteng suulutaamek, tegglimek qerrirlimek wall'u punernermek; 6'lumarraqegtaarmek; qiuglimek, qesurlimek, kavirlimek-llu qusngit melqurritnek 'lumarrarmek; 'lumarrarmek-llu qusngirngalnguut melqurritnek piliaqumalriamek; 7qusngit angucalut amiitnek, kepcimalriamek kavirlimek; qecikegtaarnek; murakegtaarnek acacia-nek; 8kenurrat uqurkaitnek; avukusngalrianek mingugkanek tepkegcilrianek-llu aruvagkanek; 9teggalquqeqtaarnek-llu allanek-llu qevleqsagnek, ellimaarkanek agayulirten͞gunrem as'arcen̄ariinun qat'gailitamun-llu.

Aturarkat Pelatekamun Agayuvigmun

10“Tamarmeng angutet calitulit tailluteng piliaqerkaugait Atanrem alerquutekellri piliaqesqelluki: 11Pelatekaq Agayuvik, elatiin iluan-llu qallirkai, negcii, enertai-llu, canirutai, naparyai naparyain-llu tusngallrit; 12Akqutem Yaassiiga, ayagatsuutekak, patua, capkutarkaa-llu; 13estuuluq, ayagatsuutekak, aklui-llu tamalkuita; kelipat-llu elliitekumalriit Agayutmun; 14kenurrarvik aklui-llu; kenurrat uqurtuumarmeng; 15aruviarvik tepkegcilrianek ayagatsuutek-llu; mingugkaq, narnirqellriit aruvagkat; capkutaa iteryaraan Pelatekam Agayuviim; 16ekuavik elliitnek, punerneret inguqerri tapeqluki, ayagatsuutek, aklui-llu tamalkuita; ermigcuun tusngavia-llu; 17capkutat umegkat, naparyait tusngallrit-llu; capa-llu umgem iteryaraan capii; 18Pelatekam umgem-llu acilitai ilavkui-llu; Pelatekam ilavkui capet-llu ilavkuit; 19tangnirqellriit-llu aturat agayulirtet atulararkait kevgiuraqameng Tanqilriami, kencignarqellriit aturarkai Aaron-aam agayulirtem qetunrain-llu.”

Yuut Elliiteteng Taitait

20Tamarmeng Israel-aat ayagtut, 21tamarmeng-llu piyuumilriit taitut elliiluteng Atanermun, Pelatekam Agayuviim caliaqumallerkaanun. Taitut tamalkuitnek atuugarkanek agayukuneng agayulirtet-llu aturikatki aturyulrianek. 22Tamarmeng-llu piyuumilriit angutet arnat-llu taitut kenugutnek pin-anek, aqlitnek, kulutnek, uyamignek, allanek-llu ayuqenrilngurnek qevleqsagnek, tunluki-llu elliitekluki Atanermun. 23'Lumarraqegtaarnek-llu pilget taitut: qiuglinek, qesurlinek, kavirlinek-llu; qusngirngalnguut melqurritnek piliaqumalrianek 'lumarrarnek; aminek-llu kavircimalrianek, qecigkilngurnek-llu qatvianek. 24Tamarmeng-llu piyugngalriit taitut qerrirlinek punernernek-llu elliitekluki Atanermun. Tamarmeng-llu murakegtaarautellget acacia-nek calianun aturarkanek taitut. 25Tamarmeng-llu calitulit arnat taitut 'lumarraqegtaarnek yualukaitnek-llu qiuglinek, qesurlinek, kavirlinek piliallermeggnek. 26Yualukiurluteng-llu cali qusngirngalnguut melqurritnek. 27Ciuliqagtet-llu taitut teggalquqegtaarnek allanek-llu qevleqsanek qat'gailitami as'arcen̄a'armi-llu uitaarkanek, 28ayuqenrilngurnek-llu tepkegcilrianek uqunek kenurrat uqurkaitnek, uqum mingugkam tepkegcilriit-llu aruvagkat pikaitnek. 29Tamarmeng Israel-aam yui piyuumilriit taitut elliitekluki caliarkamun, Atanrem alerquutekellruciatun Moses-aakun caliaqesqelluku.

Calitulit Caliaqestai Pelatekam Agayuviim

30Moses-aaq-llu qanertuq Israel-aam yuinun, “Atanrem cucukaa Bezalel-aaq qetunraa Uri-m, tutgarii Hur-am, Judah-m ilakelriartainek. 31Agayutem piniminek imillrua piyugngarivkarluku umyuarturivkarluku elisngarivkarluku munarluku-llu caliyugngarivkarluku, 32caliaqumaarkat uptellerkaatnun, aturluki suulutaat, qerrirlit, punerneret-llu; 33teggalquqegtaaraat elliqainaurrluki; muriit-llu canaluki; tamalkuita-llu tangniriluki caliaqnarqellriit. 34Atanrem-llu elitnauruteksugngarivkallrua caliyaraq allanun Bezazel-aankugnun Oholiab-aaq-llu, Ahisamach-am qetunraanun Dan-am ilakellgutkelriartainek. 35Ayuqenrilnguut makut caliaqetukaitnek caliyugngarivkarak: cavignek tangnircaristet; 'lirqistet wall'u elucirkiuristet; 'lumarralistet 'lumarraqegtaarnek; qiuglinek, qesurlinek, kavirlinek-llu qusngit melqurritnek 'lumarrarnek; allanek-llu 'lumarrarnek. Caliaqsugngariakek caliarkat ayuqenrilnguut elucirkiuriyugngalutek-llu elluarrlutek.

Yupik Bible

Yupik Bible © 2012 American Bible Society

More Info | Version Index