Search form

Exodus 36

1“Bezalel-aaq Oholiab-aaq-llu tamarmeng-llu allat munalriit Atanrem piyugngarivkallri umyuarturivkarluki-llu, caliaqsugngarivkarluki caliarkat piliaqellratni Agayuvik, caliarkaugut maligtaquluki Atanrem alerquutai.”

Yuut Elliigut Amllernek

2Moses-aam taisqai Bezalel-aaq Oholiab-aaq-llu tamalkuita-llu allat Atanrem piyugngarivkallri, cali-llu piyugteqellriit ikayuucugluteng, ayagniisqelluki-llu caliarkait. 3Moses-aamek-llu akurturtut yuut elliitellritnek atu'urkanek Pelatekaq Agayuvik piliaqumallrani. Yuut tau͡gaam cali taqeksaunateng elliiguralartut unuaquaqan. 4Tua-i Pelatekam Agayuviim caliaqestain tamarmeng caliateng peggluki ullagluku 5Moses-aaq qanrutaat, “Yuut cali taiqu'rtut elliitnek cipluki aturarkat Atanrem caliaqesqellrinun.”

6Tua-i Moses-aam alerqurai tamaanelnguut elliinermek taqesqelluki Agayuvigkamun; tua-i yuut allanek taicinrirtut. 7Elliitellrit tamakut amllerameng ciptarkaurrluteng-llu caliarata qaqitellerkaanun.

Caliaqumallra Pelatekam Agayuviim

8Tamarmeng munalriartaita tamakut calistet caliaqaat Pelatekaq Agayuvik. Piliaqaat-llu aturluteng qulnek 'lumarraqegtaarnek qilaumalrianek qiuglinek, qesurlinek, kavirlinek-llu qusngit melqurritnek, qaralilirluku-llu mingeqluku cherubim-aanek. 9'Lumarraat angtatkurluteng akimiarunrita'arnek yaaltanek taktaluteng malrugnek-llu yaaltagnek iqtutaluteng. 10Talliman mingqutait itulluki, talliman-llu allat cali tuaten mingqulluki itulluki. 11Putulirlukek-llu qiuglimek 'lumarrarmek menglekenkun elalirnerkun tamarkenka. 12Yuinaak malruk qulmek cipluku (50) putuliraat ciuqliq, aipaa-llu cali tuaten ayuqellrianek putulirluku. 13Negciliut-llu yuinaak malruk qulmek cipluku (50) suulutaanek, tamakutgun itutarkaulukek mingqusngalriik malruk atauciurrlukek.

14Qilagkiuraat Pelatekaq Agayuvik qula ataucimek cipluku 'lumarrarnek qusngirngalnguut melqurritnek piliaqumalrianek. 15Piliaqait angtatekluki, akimiarnek yaaltanek taktaluki malrugnek-llu yaaltagnek iqtutaluteng. 16Tallimauluki itutait ataucimi arvinelguluki-llu allami aipaani. 17Putuliraat-llu yuinaak malruk qulnek cipluku (50) nangneqliat ataucim, yuinaq-llu qulmek cipluku (30) menglii allam. 18Negciliut-llu yuinaak malruk qulnek (50) punernernek, itutessuutekiurlukek patuk quyurrlukek patuulararkaurtellukek. 19Allagnek cali malrugnek patuliut atauciq qusngit angucaluita amiitnek kavircimalrianek, aipaa-llu qecigkilngurnek aminek elaqliuluku patuugarkaq.

20Enertain napartait murakegtaarnek acacia-nek piliaqait. 21Atauciq naparta akimiarnek it'ganernek qertutaluni yuinaq-llu malrunlegnek cipluku (27) cetyaarnek iqtutaluni. 22Tamarmeng-llu enertarkat cipnengqerturluteng itusvigkameggnek. 23Ungalalirnera yuinarnek enerkiuraat, 24yuinaagnek-llu malrugnek (40) qevlercetellrianek tusngallerkiurluki aciit, malruk itusngavigkak tamarkenka nayumiqavkarlukek. 25Neglirnera-llu cali yuinarnek enerkiurluku, 26yuinaagnek-llu malrugnek (40) qerrirlimek tusngallerkiurluki. 27Tunua-llu kanavalirneq arvinlegnek enerkiurluku 28malrutaarluki-llu kangirai. 29Makut kangirain enri aciit kassuusngaut itukluteng-llu qulmun. Ukuk enrek kangiraagkenun malrugnun atulriik tuaten piliaqumauk. 30Pingayunelguut enerkat, akimiaq-llu ataucimek cipluku qevlercetellriit tusnganret malruuqaqluteng ataucimi enermi.

31Akimiarnek-llu canirutnek piliut, murakegtaarnek acacia-nek, talliman ataucim canirneran enertain pikaitnek, 32talliman-llu akiqliitnun talliman-llu kanavalirnermun iquanun. 33Qukaatni canirun ellimaluni qukarluki naparyat, ayaumaluni-llu iquanek iqua tekilluku. 34Qallilirait-llu enri suulutaamek, suulutaanek-llu kulutnek ellivikluki, ellissuutekluki canirutnun, cali patumalrianun suulutaamek.

35Capkutarkiurtut 'lumarraqegtaarnek taqumalrianek, qiuglinek, qesuuranek, kavirlinek-llu, tangnircaumaluteng-llu mingqumalrianek cherubim-aanek. 36Cetamanek-llu napakegtaarnek acacia-nek naparyarkiurait capkutat suulutaamek qaingit patuluki, suulutaanek-llu kulutnek elliivikluki, cetamanek-llu qevlercetellrianek tusngallerkiurluki. 37Iteryaraa-llu capkutarkiurluku 'lumarraqegtaarmek qecigkilngurmek, taqumalriamek qiuglimek qesuuramek kavirlimek-llu, mingeqluku-llu tangnircaumaluni. 38Uumun capmun tallimanek naparyarkiurtut, kulutnek ellivikluki, qallilirluki-llu kangrit qaingit-llu suulutaamek, tallimanek-llu punernernek tusngallerkiurluki naparyat.

Yupik Bible

Yupik Bible © 2012 American Bible Society

More Info | Version Index