Search form

Exodus 38

Ekuaviim Ekuagiluni Elliitnek Piliaqumallra

1Ekuagiluni elliivigkaq piliaqaa murakegtaarmek acacia-mek. Yaassiigenqegtuq, malrunlegnek avek-wa it'ganernek taktaluni, malrunlegnek-llu avek-wa it'ganernek iqtutaluni, cetaman-llu avek-wa it'ganernek qertutaluni. 2Qaingan-llu kangiraini pugumalriit piliaqai atauciurnerurrluki ekuavigmun, nutaan-llu qallilirluki punernermek. 3Ekuaviim-llu aklui tamalkuita piliaqai: qantat, qanikciurutet, ilutulriit-llu qantat, negciit, kenrem-llu assigtai. Tamarmeng makut aklui taqumaut punernermek. 4Inguqit'liuq punernernek elliluku-llu mengliin acianun, ekuaviim avga tekisngaluku. 5Cetamanek-llu kulutnek teguyarirluku, elliluki-llu cetamanun kangirainun. 6Murakegtaaraagnek-llu acacia-gnek tegumiaqessuutekiurluku, qallirrlukek punernermek. 7Kulutnun-llu nuvullukek avategkeni ekuaviim. Ekuavik taqumauq tuskanek ilua imaunani.

Ermigcuutem Punernerem Piliaqumallra

8Punerneq-llu ermigcuun piliaqaa, punerneq-llu inguqerra tarenriurutaitnek arnat iteryarami kevgiulriit tuani Pelatekami.

Capkutat Pelatekami

9Pelatekaq Agayuvik capkiuraa 'lumarraqegtaarmek, ungalalirnermi yuinaak malruk qulmek cipluku (50) yaaltanek taktaluni. 10Nayumiqasterluni yuinarnek punernernek naparyanek yuinarnek-llu punernernek tusnganerluteng, negcignek-llu nuvucirluki qevlercetellrianek. 11Capa neglirnermi ayuquq tuaten. 12Kanavalirnermi-llu captangqertuq yuinaq tallimanek (25) yaaltanek taktaluteng, qulnek naparuterluni, qulnek-llu tusnganerluteng negcigluteng nuvuterluteng-llu qevlercetellrianek. 13Calaralirnermi-llu iteryarami yuinaq tallimanek (25) yaaltanek iqtutalriamek captangqertuq. 14-15Avategkeni iteryaram captangqertuq malrunelgen avegmek yaaltanek capmek. Pingayunek naparterluni pingayun-wa tusnganret. 16Tamarmeng capet kassutmun piliaqumaut 'lumarraqegtaarmek. 17Naparyat tusngallrit piliaqumaut punernernek. Negciit, nuvutait, naparyat-llu kangrit qalliliumaut qerrirlimek. Tamarmeng-llu naparutai avatiini itusngaluteng qerrirlinek nuvutnek. 18Iteryaram-llu capkutaa piliaqumauq 'lumarraqegtaarmek, qilaumaluni qiuglimek qesuuramek kavirlimek-llu, mingeqluku tangnircaumaluni. Taktaluni qulnek yaaltanek, pingayuak avguluku yaaltanek, qertutaluni capiitun mengliin. 19Naparuterluni cetamanek, punernernek cetamanek tusnganerluteng. Negciit, naparyat-llu kangrita patuit nuvutait-llu piliaqumaut qerrirlinek. 20Acilitai tamarmeng Pelatekam avatiin-llu capain piliaqumaut punernernek.

Caviit Wall'u Tegglit Atullret Pelatekamun

21Waniwa igausngallrit amllertaciita atullret caviit Pelatekamun qemangqaviagnun igarviik teggalquk. Taukugni Qulen Alerquutet igausngaut. Moses-aam alerqurai igautesqelluki, ukut-llu Levite-at tamana caliaqluku, calillermeggni ayuqucirtuasterluteng Ithamar-amek, qetunraanek Aaron-aam agayulirtem.

22Bezalel-aam, qetunraan Uri-m, tutgariin Hur-am, Judah-m ilakellgutkelriartainek, caliaqellrui cat tamalkuita Atanrem alerquuciatun. 23Ikayurtii Oholiab-aaq, qetunraa Ahisamach-am, ilakellgutkellriartainek Dan-am, tangnircautelisten͞guuq elucirkiurten͞guluni, 'lumarraqegtaarnek-llu 'lumarristen͞guluni, qiuglinek, qesuuranek, kavirlinek-llu.

24Tamarmi suulutaaq Atanermun tunumalleq, kenciknarqellriamun Pelatekamun Agayuvigmun, uqamangqertuq uspernek tiissitsaak malruk yuinaat-llu qulngunritaraat akimiarmek cipluki (2,195), uqamaltassiariaqameng cuqciyaraat aturluku. 25Qerrirlit nunanek naaqumallernek uqamaltaut uspernek malrunelgen tiissitsaat, tiissitsaam-llu avga yuinaak malruk qulmek ciplukek (7,550). 26Waten amllertalria akiliutekelqaat yuut naaqutngullret naaqumallratni, tamarmeng cuq'liumacirteng tekilluku akiliriluteng. Usperilauciat taum nalliini cuqekluku waten akiliutait amllertaut. Tiissitsaam avga, yuinaat-llu talliman pingayunek cipluni tiissitsaat, tiissitsaam avga, yuinaagnek malrugnek qulnek cipluni (603,550) angutet yuinarmek allrakungelriit wall'u ak'allaunrulriit tuani waten amllertaut naaqutngullret. 27Qerrirlimek, malrunelgen avegmek cipluku tiissitsaanek (7,500) uspernek atullruut yuinarnun tallimanun tusngallrinun Pelatekam capet-llu; yuinaat pingayun akimiarmek (75) uspernek aturaqluteng ataucimun tusngallermun. 28Uitaqalria yuinaak malruk qulmek cipluku (50) usperet, qerrirliq aturluku Bezalel-aaq nuvutnek pilillruuq negcignek-llu naparyat pikaitnek kangrit-llu qallilirluki. 29Punerneret-llu Atanermun tunumallret uqamangqertut, talliman tiissitsaat yuinaat-llu akimiaq qulmek (5,310) uspernek. 30Tamatumek tusngallerkiurai Pelatekam iteryaraanelnquut; punerneq ekuavik ingugerri-llu, ekuaviim-llu aklui, 31acikai-llu kassutmun capiin, capem-llu iteryaraan, tamalkuita-llu acilitai Pelatekam avatiin-llu capiin.

Yupik Bible

Yupik Bible © 2012 American Bible Society

More Info | Version Index