Search form

Exodus 39

Agayulirtet Aturaita Piliaqumallrat

1Qiuglinek, purple-aanek, kavirlinek-llu piliaqait tangnirqellriit aturat, agayulirtet atulararkait kevgiuraqameng Tanqilriami. Pilillruat Aaron-aaq agayulirten͞gulriit aturaitnek Atanrem alerquuciatun Moses-aaq.

2As'arcen̄a'ar piliaqaat 'lumarraqegtaarmek qiuglimek, qesuuramek, kavirlimek-llu; suulutaamek yualirluku. 3Mulut'uugtut saanermek suulutaamek, kepurluku-llu amililuku caliaqsunariluku nuvucunariluku 'lumarraqegtaarmun, qiuglinun, qesuuranun, kavirlinun-llu qusngit melqurritnun. 4Tusailiciut-llu malrugnek as'arcen̄araam pikagkenek ellilukek-llu qacarneregkenun ituksugngarivkarlukek. 5Tupinqeggluni taqumalria naqugun piliaqumalria, au͡gkut ayuqaitnek ellimauq as'arcen̄a'armun atauciurnerurrlukek, tua-i Atanrem alerqullruciatun Moses-aaq. 6Teggalqut-llu kavircetellriit carnelian-aat uptait elliluki-llu suulutaanek tusngallirluki. Tamakunun munallerteng aturluku cetrutait Jacob-aam qetunrain qula malrugnek cipluku atrit. 7Elliit tusailitagkenun as'arcen̄araam umyuaqutnguvkarluki qula malrugnek cipluku ilakutellriartainun Israel-aam, Atanrem alerquuciatun Moses-aaq.

Qat'gailitam Piliaqumallra

8Piliaqaat qat'gailitaq aturluteng atullermeng ayuqaitnek as'arcen̄a'ar piliaqellermeggni, qaralii-llu ayuqluki. 9Yaassiigenqegtuq tapingaluni qulngunrita'arnek cetyaarnek taktaluni qulngunrita'arnek-llu cetyaarnek iqtutaluni. 10Nalleqliqellrianek cetamainek teggalquqegtaarnek ellivikaat qainga: Ciuqliit ruby-mek, topaz-aamek, garnet-aamek-llu. 11Tungliit-llu, emerald-aaq, sapphire-aq, diamond-aaq-wa. 12Pingasuingit-llu, turquoise-aq, agate-aq, amethyst-aaq-wa. 13Cetamaingit-wa, beryl-aaq, carnelian-aaq, jasper-aaq-wa. Makut tusngavingqertut suulutaanek. 14Teggalqut atauciuqaqluteng igaumaluteng Jacob-aam qetunrain iliita atranek nallunailkuciumaluki qula malrugnek ilakellgutkelriartai Israel-aam. 15Qat'gailitaq kalivniyagarkiuraat suulutaamek qipumalriamek pelacinagtun. 16Suulutaanek-llu tusngallerkiurtut, malrugnek-llu kulutegnek, ellilukek-llu kulutek kangiraagkenun qulirnerani qat'gailitam. 17Qillrutagket-llu malruk suulutaak pelaciniik kulutegnun. 18Iqukek-llu qillrullukek tusngallerkiuragnun suulutaagnun. Waten piluteng nunalgartagket manulirnekegnun tusailitagken as'arcen̄araam. 19Malrugnek-llu kuluteliut suulutaagnek ellilukek-llu kangiraagkenun atlirnerani qat'gailitam, ilulirneregkenun mengliin as'arcen̄araam tunglirneranun. 20Cali allagnek kulutegnek piliut, ellilukek-llu atlirneranun manulirneragnun tusailitagken as'arcen̄araam, mallgeskiinun mingqumallran, quliinun-llu naqugutem. 21Atanrem alerquuciatun Moses-aaq qillrutait kulutai qat'gailitam kulutainun as'arcen̄araam qiuglimek pelacinagmek qillrucirluki, as'arcen̄araam qaingani uitavkarluku qulirnerani naqugutem tuaken au͡g'artarkaunrirluku.

Allat-llu Agayulirtet Aturaita Piliaqumallrat

22Aturaq as'arcen̄a'armun iluqliuluni atulararkaq tamarmi taqumauq qiuglimek piliaqumalriamek 'lumarrauluku qusngit melqurritnek. 23Pugyaraa allegyailkuciumaluni merigngalriamek kassutmun. 24-26Akua-llu kassutmun ellivikumaluni atsarpaguanek 'lumarraqegtaarmek, qiuglinek, qesuuranek, kavirlinek-llu, akunlirturaumaluteng kuluk'uunarnek suulutaanek, Atanrem alerqullruciatun Moses-aaq.

27Keggatekiurluki-llu aturanek Aaron-aaq qetunrai-llu, 28qamiqurrit-llu nemerkiurluki nacaliluki-llu, mamkilngurmek-llu 'lumarrarmek qerrullililuki nanilngurnek, 29qukait-llu nemerkiurluki 'lumarraqegtaarmek qiuglinek, qesuuranek, kavirlinek-llu tangnircarluku-llu mingeqluku, Atanrem alerqullruciatun Moses-aaq. 30Tangnircaun-llu piliaqaat, kencignarqellria nallunailkutaa allakaumalriim Atanermun kevgauluni. Tauna suulutaaruluku qaingakun-llu igarluku, “Allakaumalria Atanermun.” 31Qillrutaat-llu manulirneranun qamigurran nemrutaanun qillrucirluku qiuglimek pelacinagmek, Atanrem alerquuciatun Moses-aaq.

Caliat Qaqicimarillrat

32Pelatekam caliaqumallra qaqiqurainartuq. Israel-aat caliaqellruit cat tamalkuita Atanrem alerqullruciatun Moses-aaq. 33Taitait-llu Moses-aamun aklui tamalkuita: negcii, enertai, qerarutai, naparyai, tusngallret, 34amit-llu kavircimalriit patukai, qeciit-llu qecigkilnguut, capkutarkat-llu. 35Akqutem-llu Yaassiiga teggalqugnek igarviignek imalek, naparyai-llu patua-llu. 36Estuuluq-llu aklui-llu, kelipat-llu elliitngullret Agayutmun, 37kenurrarvik-llu suulutaarrlainaq, kenurrai-llu, tamalkuita-llu aklui, uquq-llu kenurrain uqurkaat; 38suulutaaq-llu ekuavik, uquq-llu mingugkaq, narnirqellria-llu aruvagkaq, capkutaa-llu iteryaram. 39Punerneq-llu ekuavik, punerneret-llu inguqerri, naparyai, aklui-llu tamalkuita; ermigcuun-llu tusnganraa-llu. 40Capkutai-llu elaqliim, naparyai, tusnganrit-llu, capkutaa-llu iteryaraan elaqliim ilavkui-llu; Pelatekam-llu acilitai, cat-llu atuugarkat Pelatekamun Agayuvigmun; 41tangnirqellriit-llu aturait agayulirtet atulararkait Tanqilriami, kenciknarqellriit-llu aturait Aaron-aam qetunrain-llu. 42Israel-aat caliaqellruit tamalkuita Atanrem alerqullruciatun Moses-aaq. 43Moses-aam-llu yuvrirai cat tamalkuita, tangerrluki-llu caliaqumaciit tamalkuita Atanrem alerquuciatun. Moses-aam-llu atawaqercetai.

Yupik Bible

Yupik Bible © 2012 American Bible Society

More Info | Version Index