Search form

Exodus 40

Napartellra Naaqicimallra-llu Pelatekam Atanrem Tuanlucian

1Ataneq qanertuq Moses-aamun, 2“Ciuqliim iralum erenrin ciuqliatni, napareskiu Pelatekaq. 3Iluanun-llu ellilukek Akqutem Yaassiigek imalgek Qulnek Alerquutnek, capkutamek-llu capluku. 4Estuuluq-llu itrulluku aklui-llu qainganun nek'eggluki; cali-llu kenurrarvik itrulluku kenurrai-llu elliluki. 5Elliluku-llu suulutaaq ekuavik aruviarnek manuanun Akqutem Yaassiigan, agarrluku-llu Pelatekam iteryaraan capii. 6Elliluku-llu ekuavik elliitnek ciuqerranun Pelatekam. 7Elliluku-llu ermigcuun akuliignun Pelatekam ekuaviim-llu, mermek-llu imirluku. 8Elliluku-llu avatiin capkutaa, agarrluku-llu iteryaram capii.

9“Nutaan-llu naaqilluku allakarluku Pelatekaq tamalkuita-llu aklui, mingugluku kencignarqellriamek uqumek, tua-i tanqilriaruciquq. 10Tungiikun naaqitniaran allakarluku ekuavik tamalkuita-llu aklui, mingugluku, tua-i tanqilriaruqapiarciquq. 11Cali-llu naaqilluku allakarluku ermigcuun tusngallra-llu, au͡g'utun pillrucirpetun.

12“Tailluku-llu Aaron-aaq qetunrai-llu Pelatekam iteryaraanun, mermek-llu erurluki. 13Aturarluku-llu Aaron-aaq agayulirtet aturaitnek, mingugluku-llu naaqilluku allakarluku, kevgiurniaraanga agayulirten͞guluni. 14Qetunrai-llu tailluki, keggatnek-llu at'elluki. 15Mingugluki-llu, atiit mingullrucirpetun, kevgiurniaraatnga agayulirten͞guluteng. Mat'um minguumallrata agayulirten͞guvkarciqai, ayagluni allakaumallrat kinguvritnun kinguverkaitnun-llu ukanirpak.”

16Moses-aam caliaqai cat tamalkuita Atanrem alerquuciatun. 17Tua-i iralum ciuqliim erenrin ciuqliatni, allrakum aipaani, Egypt-aaq unitellermeng kinguani, Pelatekaq naparcimallruuq. 18Moses-aam ellillrui tusnganri, enertai, canirutai, naparyai-llu naparrluki. 19Pelatekam-llu qallia saggluku, elaqlia-llu cali elliluku, Atanrem alerquuciatun. 20Tua-llu teggalquk malruk teguak igarviik eklukek-llu Akqutem Yassiiganun. Tegumiaqessuutek-llu nuvullukek kulutegnun Yaassiigmi patua-llu elliluku qaingagnun. 21Itrullukek-llu Pelatekamun capkutaq-llu agarrluku. Waten piluni capkucirak Akqutem Yaassiigek, Atanrem Alerquuciatun.

22Estuuluq-llu itrulluku neglirnermun capem elatiinun, 23qainganun-llu elliluki kelipat elliitngullret Atanermun, Atanrem alerquuciatun. 24Kenurrarvik-llu ellia Pelatekam iluanun, ungalalirnermun estuulum akianun, 25tuani-llu Atanrem takuani kenurrat kumartai, Atanrem alerquuciatun. 26Suulutaaq-llu ekuavik itrutaa Pelatekamun elliluku-llu capem manuanun, 27kumarrluku-llu narnirqellria aruviar, Atanrem alerquuciatun. 28Agarrluku-llu Pelatekam iteryaraan capii. 29Manuanun-llu capem ellia ekuavik, tuani-llu ekuagarkat mukaarkat-llu ekualuki, Atanrem alerqullruciatun. 30Elliluku-llu ermigcuun akuliignun Pelatekam ekuaviim-llu, mermek-llu imirluku erurissuutekamek. 31Moses-aam, Aaron-aam-llu qetunrain-llu erularait unateteng it'gateng-llu tuavet, 32itraqameng Pelatekamun wall'u ekuavigmun, Atanrem alerquuciatun. 33Moses-aam-llu napartaa kassutmun capii Pelatekam ekuaviim-llu, capem-llu iteryaraan capii. Tua-i piarkani tamalkuan qaqitaa.

Amirluq Quliini Pelatekam

34Tua-llu amirlum Pelatekaq patua, qitngirnarqellriim-llu Atanrem tanqian imiraa Pelatekaq Agayuvik. 35Tuaten pian Moses-aaq iterciigatuq Pelatekamun. 36Israel-aam yui pektaullermeggni, upalartut uitavimeggnek amirluq tau͡gaam nalugaqan Pelatekamek. 37Amirlum tuantellran taktaciatun uitalartut nunameggni. 38Israel-aam yuin ayagallermeng taktaciatun tanglaraat Atanrem tuanlucian amirlua. Tauna amirluugaqluni erenrani quliini Pelatekam unugmi-llu kenruluni.

Yupik Bible

Yupik Bible © 2012 American Bible Society

More Info | Version Index