Search form

Genesis 12

Agayutem Qayagaurutii Abram-aamun

1Atanrem qanrutaa Abram-aaq, “Nakmiin nunan, tungayaten, atavet-llu enii unilluki ayii nunamun allamun nallunairarkamnun elpenun. 2Kinguvengevkarciqamken amllernek, tamakut-llu atanruvigpaurciiqut. Atawaqerceciiqamken atren-llu angelriarurtelluku, atawaqautngurrniartuten.

3“Atawaqaasqilriit elpenek atawaqerceciiqanka,

aniqlaasteten-llu aniqlaaluki.

Elpegun-llu atawaqerceciiqanka nunam yui.”

4Abram-aaq allrakungluni yuinarnek pingayunek akimiarmek cipluku (75) ayallruuq Haran-aamek Atanrem pisquciatun; Lot-aam-llu maliggluku. 5Abram-aam malikluki nuliani nurr'ani-llu Lot-aaq, cali tukuuteteng pisteteng-llu tamalkuita pikliutelteng Haran-aami, ayagtut Canaan-aam nuniinun.

Canaan-aam-llu nuniinun tekicameng, 6Abram-aaq ayagtuq nunakun tamaaggun engelekluku napa Moreh-mi kenciknarqelria, tanqilriaruluni tauna Shechem-aami. Tamatum nalliini Canaan-aarmiut tamana cali nunakluku. 7Ataneq alairtuq Abram-aamun qanrulluku-llu, “Man'a nuna cikiutekaqa kinguverpenun.” Abram-aaq-llu ekuaviliuq tuani Atanermun alairvikestellerminun. 8Taum kinguani ayagtuq ungalatmun qemililriamun nunamun calaralirnerani Bethel-aam. Tuani-llu pelatekartuq Bethel-aaq kanaknalirneqluku, Ai-aq-llu calaralirneqluku. Tuani-llu cali ekuaviliuq agayuluni-llu Atanermun. 9Abram-aaq cali ayagtu'rtuq, ciunequ'urluku Canaan-aaq.

Abram-aaq Egypt-aami

10Tau͡gaam piitnallruut Canaan-aami, taumek Abram-aaq ayallruuq Egypt-aamun uitaqeryarturluni, piitnaq tamaani anagucan. 11Tekiteqataameng Egypt-aamun nuliani Sarai qanrutaa, “Elpet-tang kenegnaqapigtellriaten. 12Tangerqunegteggen Egypt-aarmiut umyuarteqciqut, ‘Una nulirqellinia.’ Tuaten-llu umyuarteqluteng tuquciiqaatnga elpet unguvavkarluten. 13Qanqina wangnun nayagaqniluten, elpenek picirluteng elluarrlua ciuniurniaraatnga tuqutevkenii.” 14Tua-i Egypt-aamun itran Egypt-aarmiut tangrraat nulirran kenegnartacia. 15Atanerruarin angayuqam tangrramegteggu qanrutkaat kenegnartacia atanermun; atanrem-llu eniinun Sarai ayaulluku. 16Tua-i Sarai pitekluku angayuqrata Abram-aaq elluarrluku ciuniuraa, cikirluku-llu qusnginek, qusngirngalngurnek, kuluvagnek, ciulvagnek, pisten̄ek, ungungssinek-llu qulugnelegnek.

17Tau͡gaam Atanrem nangteqnarqelriit cangerliit tuc'etai atanratnun ilainun-llu, Sarai Abram-aam nulirra pitekluku. 18Taumek angayuqrata Abram-aaq aqvavkaraa qanrulluku-llu, “Ciin waten pisia? Ciin qanrutenricia nuliqniluku? 19Ciin qanellrusit nayagaqniluku? Wiinga-llu teguyaaqluku nuliqnaluku. Waniwa nulian; teguluku ayii!” 20Angayuqam-llu yuut alerqurai Abram-aaq piluku, Abram-aaq-llu ayagcetaat nulirtuumaan, cautai-llu tamalkuita malikevkarluki.

Yupik Bible

Yupik Bible © 2012 American Bible Society

More Info | Version Index