Search form

Genesis 14

Abram-aam Lot-aaq Aqvaa

1Angayuqat cetaman, Amraphel-aaq Babylonia-mek, Arioch-aq Ellasar-amek, Chedorlaomer-aaq Elam-aamek, Tidal-aaq-llu Goiim-aamek, 2anguyallruut angayuqat allat talliman inglukluki ukuuluteng: Bera Sodom-aarmiu, Birsha Gomorrah-rmiu, Shinab-aq Admah-rmiu, Shemeber-aaq Zeboiim-armiu, Bela-m-llu angayuqra. 3Ukut atanret talliman iliksagutellruut anguyagteteng-llu quyurtellruit Siddim-aam kuignayuanun, maa-i aprumalriami Dead Sea-mek. 4Chedorlaomer-aamek ataniurtengqellruyaaqluteng allrakuni qula malrugnek cipluku, tau͡gaam qulen pingayuatni allrakut tauna inglukengluku. 5Akimiarunritariitni allrakut Chedorlaomer-aaq ilini-llu anguyagtet tekitellruut cirlakluki-llu Rephaim-aat Ashteroth Karnaim-aami, Zuzim-aat Ham-ami, Emim-aat marami Kiriathaim-aami, 6Horite-at-llu ingriini Edom-aam, maliggluki Elparan-aaq tekilluku uitalria nunam kinertellriim engeliini. 7Kingutmun-llu ataam uterrluteng Kadesh-aamun, (tamatum nalliini Enmishpat-aamek ap'lallruat). Teguaqellruit nuniit tamalkuan Amalekite-at, cirlakluki-llu Amorite-at Hazazon Tamar-ami uitalriit.

8Tua-llu angayuqrit Sodom-aam Gomorrah-m, Admah-m, Zeboiim-aam, Bela-m-llu quyurtait anguyagteteng callugluteng-llu Siddim-aam kuignayuani, 9inglukluki angayuqri Elam-aam, Goiim-am, Babylonia-m, Ellasar-am-llu. Angayuqat talliman ingluluteng angayuqanek cetamanek. 10Kuignayuani Siddim-aam elanret amllertut taarnek imarluteng. Angayuqaagket Sodom-aam Gomorrah-m-llu qimangnaqsaaquk, tau͡gaam tamakunun taarnun igtuk; taukut-llu allat pingayun angayuqat qimagluteng ingrinun. 11Taukut-llu cetaman atanret avurtut akluitnek Sodom-aarmiut Gomorrah-rmiut-llu, neqkautaitnek tuaten, nutaan-llu ayagluteng. 12Lot-aaq-llu cali teguat qetunraa Abram-aam anelgutiin ayaulluku-llu aklutuumaan.

13Tua-llu iliita anagillrata, ullagluku qanemcitaa Abram-aaq Hebrew-q. Abram-aaq uitaluni yaaqsinrilkiitni napat kenciknarqelriit, Mamre-m Amorite-am napautain. Mamre anelgutekluku Eschol-ankuk Aner-aaq-llu, Abram-aam iliklukek. 14Abram-aam-llu niicamiu nurr'ani tegulliniatgu yun'i angutet callugyaramun elitnaurumalriit tamalkuita quyurcetai. Amllertaluteng yuinaat akimiaq, akimiaq pingayunek cipluku (318), kingunrirturait-llu taukut atanret cetaman Dan-am nuniin engeliinun. 15Tuani-llu avgai anguyagten̄i quyungqaaqluki. Curugait-llu taukut unugmi, cirlakluki-llu. Kingunrirturait-llu engelekluku Hobah-q Damascus-aam neglirnerani, 16tegullrit-llu cat tamalkuita ut'rulluki. Cali-llu ut'rulluku nurr'ani Lot-aaq, aklui-llu tamalkuita, arnat-llu, allat-llu yuut tegullrit ilakluki.

Melchisedek-aam Atawaqercetaa Abram-aaq

17Abram-aaq utercan anguyallerminek cirlakraarluki Chedorlaomer-aaq allat-llu atanret, Sodom-aam atanran pairrsaagaa Shaveh-m kuignayuani (cali aterpagcimalartuq atanrem kuignayuanek). 18Cali Melchizedek-aaq Salem-aam atanra agayulirten͞gunrulria Atanermun Quyinrulriamun, taituq kelipamek wine-amek-llu Abram-aamun, 19atawaqercetaa-llu qanerluni, “Atanrem Quyinrulriim piliaqestiin nunam qiliim-llu atawaqertelliu Abram-aaq! 20Nanraumali Agayun Quyinrulria aviutestellren cirlakevkarluki inglukesteten!” Abram-aam-llu elliivikaa Melchizedek-aaq cat tamalkuita ut'rutellmi qulngurutaitnek.

21Sodom-aam-llu atanran Abram-aaq qanrutaa, “Yuut tailluki wangnun, aklut tegulten elpet pikekiki.”

22Tau͡gaam Abram-aam qanrutaa Sodom-aam atanra, “Akqellruaqa Ataneq Agayun Quyinrulria, piliaqestii qiliim nunam-llu, 23tegusngaunii yualukarraungraan, aluilitam-llu cingiqengraaku, wall'u allamek camek elpet pivnek, waten qanernayukluten, ‘Wiinga Abram-aaq tukuurcetellruaqa.’ 24Wiinga camek pikamnek tegusngaitua. Malillma tau͡gaam atullrit akurturciqanka. Tau͡gaam cat avgumakilit ukunun ikayurteklemnun, Aner-aamun, Eshcol-aamun, Mamre-mun-llu.”

Yupik Bible

Yupik Bible © 2012 American Bible Society

More Info | Version Index