Search form

Genesis 15

Agayutem Akqutii Abram-aaq-llu

1Taum kinguakun Abram-aaq cam alairvikellrua (tangerrluni camek) niilluku-llu Ataneq qanelria ellminun, “Alingenrilu, Abram. Aarnarqelriamek capkuciumaciqamken nunulirarkauluten-llu angelriamek.”

2Tau͡gaam Abram-aaq kiuguq, “Ataneq Agayun nunuliuten-mi wangnun cauciqa irniarunii? Eliezer-aaq kiingan Damascus-aarmiu kinguverkaqluku. 3Yugkamnek nakmiin cikiqsaitarpenga, pistem̄a-llu tau͡gaam iliita aklunka paitaqciqai.”

4Ataam-llu Ataneq qanertelluku ellminun niitaa: “Pistem̄un Eliezer-aamun tukuuteten kinguvarngaitut; elpet nakmiin qetunraan kinguvanertaqciqan.” 5Atanrem ellamun anutaa qanerluni-llu, “Qilak pagna kiaresgu, naaqluki-llu agyat piyugngakuvki. Tuaten amllertalrianek kinguvengqerciquten.”

6Abram-aam ukvekaa Agayun. Tuaten-llu pillra pitekluku Atanrem ilukegcitkaa ciuniurluku-llu.

7Tua-llu Atanrem qanrutaa, “Wiinga Atanruunga anutestekellren ciuliqaggluten Ur-amek Babylonia-mi cikirnaluten mat'umek nunamek pikarpenek.”

8Tau͡gaam Abram-aam aptaa, “Ataneq Agayun, qaillun-mi wiinga nallunriciiqsia piksagutarkaucia mat'um nunam?”

9Kiugaa, “Taiskina kuluvagmek, qusngim angucaluanek, qusngirngalngurmek-llu, tamarmeng allrakungelrianek pingayunek, yaquliyagaagnek-llu malrugnek.” 10Abram-aam-llu taukut tamalkuita taitai Agayutmun. Qupraarluki-llu ellii akiqliqaqluki, yaqulgek tau͡gaam qupevkenakek. 11Yaqulget-llu kemegtutulit mit'ut taukut ungungssit nuniitnun, tau͡gaam Abram-aam alingcira'arluki ayagcetai.

12Akerta-llu teviryartullrani Abram-aaq qavartuq mamtulriamek; alingem-llu tull'uku. 13Atanrem-llu Abram-aaq qanrutaa, “Pinritevkenateng kinguveten allanruciqut nunakenrilkem̄eggni, teguaruluteng, nangcimaluteng-llu allrakuni yuinaat yuinaat (400) aturluki. 14Tau͡gaam anucimirqecetaarciqaqa atanruvik teguaruviat, tamatum-llu kinguakun tamaaken anciqut tukuutnek amlleqapigtellrianek ang'aqluteng. 15Elpet-llu tuquciquten uitanqegciluten; qunguumaciquten ak'allak'acagaurrluten. 16Yugpet kinguvallrita cetamaingit maavet uterciiqut; Amorite-at anevkarngailamki maaken anagutengkata tau͡gaam assiilngillermegteggun.”

17Akerta tevirraartelluku tan'gerian aruvilria kenilleq keneq-llu qukaatgun sagingalriit ungungssit temaita ayagtuq. 18Taum nalliini Ataneq akqut'liuq Abram-aaq aipaqluku qanerluni, “Kinguverpenun man'a nuna cikiutekciqaqa Egypt-aamek ayagluku kuik Euphrates engelekluku, 19nuniit ilakluku Kenite-at, Kenizzite-at, Kadmonite-at, 20Hittite-at, Perizzite-at, Rephaim-aat, 21Amorite-at, Canaanite-at, Girgashite-at Jebusite-at-llu.”

Yupik Bible

Yupik Bible © 2012 American Bible Society

More Info | Version Index